ەندى دارىندى وقۋشىلار «بولاشاق» باعدارلاماسى اياسىندا ءبىلىم الا الادى
استانا. KAZINFORM - جۇمىس توبىنىڭ وتىرىسىندا حالىقارالىق وليمپيادالار مەن عىلىمي جوبالار جەڭىمپازدارىن قولداۋ تۋرالى نورما قابىلداندى.
ەندى حالىقارالىق وليمپيادالار مەن عىلىمي جوبالار بايقاۋلارىنىڭ جەڭىمپازدارى «بولاشاق» باعدارلاماسى اياسىنداعى ءتيىستى تالاپتارعا سايكەس كەلسە، باكالاۆريات دەڭگەيىندە ءبىلىم الا الادى. بۇل تۋرالى دەپۋتات اسحات ايماعامبەتوۆ الەۋمەتتىك جەلىدەگى پاراقشاسىنا جازدى.
«بۇل وتە ماڭىزدى تۇزەتۋ: بۇعان دەيىن «بولاشاق» تەك ماگيستراتۋرا جانە دوكتورانتۋرا دەڭگەيىندەگى وقۋدى قارجىلاندىراتىن. بۇل ءوز الدىنا دۇرىس شەشىم بولعانىمەن، حالىقارالىق وليمپيادالار جەڭىمپازدارىنا قاتىستى ماسەلە تۋىندايتىن ەدى. الەمدىك جەتەكشى ۋنيۆەرسيتەتتەر بۇل تالانتتى بالالارعا بىردەن باكالاۆرياتقا گرانتتار ۇسىناتىن، سول سەبەپتى ولار شەتەلگە كەتىپ قالاتىن. سول كەزەڭدە ءبىز ولارعا ءدال وسىنداي قولداۋ كورسەتە المادىق، سوندىقتان ولاردى ءجيى جوعالتىپ وتىردىق. كوپشىلىگى شەتەلدە وقۋمەن قاتار، سول جاقتا تۇراقتاپ قالىپ جاتتى»، - دەپ جازدى اسحات ايماعامبەتوۆ.
دەپۋتاتتىڭ پىكىرىنشە، وسىنداي بالالارعا مەملەكەتتىك بيۋدجەت ەسەبىنەن گرانت بەرۋ -ماڭىزدى قادام.
«سايكەسىنشە، ەندى «بولاشاق» باعدارلاماسى ەڭ دارىندى وقۋشىلار ءۇشىن باكالاۆرياتتان باستاپ قولجەتىمدى بولادى. بۇل - جاس تالانتتاردى قولداپ، ولاردى ەلدە ۇستاۋعا مۇمكىندىك بەرەتىن ماڭىزدى جاڭاشىلدىق. ولار الەمنىڭ ۇزدىك جوعارى وقۋ ورىندارىندا ءبىلىم الىپ، كەيىن ەلگە ورالىپ، قازاقستاننىڭ دامۋىنا ءوز ۇلەستەرىن قوسادى. دارىندى بالالاردى قولداۋ - ولاردىڭ بولاشاعىنا سالىنعان ينۆەستيتسيا عانا ەمەس، بۇل قازاقستاننىڭ دامۋىنا باعىتتالعان ستراتەگيالىق قادام»، - دەيدى ول.
ەسكە سالا كەتەيىك، بۇعان دەيىن ءادىل قۇسمانوۆ حالىقارالىق باعدارلامالار ورتالىعىنىڭ باسقارما ءتوراعاسى بولىپ تاعايىندالعانىن جازعان بولاتىنبىز.