ميلليوندارعا ساتىلۋى مۇمكىن: مۇحاممەد ءاليدىڭ تانىمال جىرتىق قولعابى اۋكسيونعا قويىلدى

استانا. قازاقپارات - ونلاين اۋكسيون 31-قازاندا اياقتالادى، ال ساتىلىمنان 4-تەن 6 ميلليون فۋنت ستەرلينگ (4,8-دەن 7,2 ميلليون ەۋروعا دەيىن) جينالادى دەگەن بولجام بار.

مۇحاممەد ءاليدىڭ ەڭ تانىمال بوكس قولعابى اۋكسيونعا قويىلدى. تاريحي جىرتىعىمەن تانىمال قولعاپ ميلليونداعان فۋنتقا ساتىلۋى مۇمكىن دەپ كۇتىلۋدە.

1963 -جىلى گەنري كۋپەرگە قارسى جەكپە-جەكتە مۇحاممەد ءالي (ول كەزدە كاسسيۋس كلەي) كيگەن Baily's of Glastonbury سول جاق قولعابى بوكس تاريحىنداعى ەڭ ايگىلى قولعاپتىڭ ءبىرى سانالادى. ءاليدىڭ باپكەرى اندجەلو داندي قولعاپتى جىرتىپ، بوكسشىعا ۋاقىت ۇتۋ ءۇشىن راۋندتى ۇزارتقان دەپ بولجانادى.

ەندى سول كەزدەگى ويىننان قالعان قوي تەرىسىنەن تىگىلگەن قىزىل قولعاپ Stuart Bull Auctions اۋكسيونىنا قويىلدى. اۋكسيون ءۇيى ونىڭ ءتۇپنۇسقا ەكەنىن جانە قولعاپتىڭ شىعۋ تاريحى جاقسى ساقتالعانىن مالىمدەدى.

ونلاين اۋكسيون 31-قازاندا اياقتالادى، ال ساتىلىمنان 4-تەن 6 ميلليون فۋنت ستەرلينگ (4,8-دەن 7,2 ميلليون ەۋروعا دەيىن) جينالادى دەگەن بولجام بار.

قولعاپتى 1963 -جىلى British Boxing Board of Control ءۇشىن Baily's Tanneries of Glastonbury تىككەن. جەكپە-جەكتەن كەيىن قولعاپ Baily فابريكاسىنا قايتارىلىپ، سوندا ساقتالعان. 1992 -جىلى مايەرس قايتىس بولعاننان كەيىن ول سەللەرس وتباسىنا بەرىلگەن جانە اۋكسيونعا دەيىن سول جەردە ساقتالعان.

قولعاپپەن بىرگە ساۋدا جەڭىمپازى 70 بەتتىك دوسەنى دە الادى، وندا قولعابتىڭ شىعۋ تاريحى تۋرالى Stuart Bull كومانداسى جۇرگىزگەن مىڭداعان ساعاتتىق زەرتتەۋلەردىڭ ناتيجەلەرى قۇجاتتالعان.