مۇنداي ماسەلە ەشقاشان قاراستىرىلعان ەمەس - ءمادينا ءابىلقاسىموۆا ە ا ە و اۋماعىندا ءبىرىڭعاي ۆاليۋتا ەنگىزۋ جايىندا

قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ە ا ە و اۋماعىندا ءبىرىڭعاي ۆاليۋتا ەنگىزۋ ماسەلەسىنە وراي پىكىر ءبىلدىردى، دەپ حابارلايدى Kazinform.

«مۇنداي ماسەلە ءبىزدىڭ ينتەگراتسيالىق ىنتىماقتاستىق اياسىندا ەشقاشان قاراستىرىلعان ەمەس. بۇل سۇراق ەش ۋاقىتتا دا قاراۋعا شىعارىلعان جوق. ۇسىنىس تا بولعان ەمەس. بارلىق تاۋار اينالىمى ۇلتتىق ۆاليۋتامەن جۇرگىزىلەدى. ءبىز ەلدەر اراسىنداعى ۇلتتىق ۆاليۋتاداعى تولەمدەردى كەڭەيتۋدى قولدايمىز»، - دەدى اگەنتتىك ءتوراعاسى اقوردادا ب ا ق وكىلدەرىنىڭ ساۋالىنا وراي.

سونىمەن قاتار ول رۋبل باعامىنا قاتىستى پىكىرىمەن ءبولىستى.

«ءاربىر ۇلتتىق ۆاليۋتانىڭ باعامى جەكە ءبىر مەملەكەتتەگى اقشا- نەسيە ساياساتپەن، ەكونوميكالىق جاعدايمەن ايقىندالادى. رەسەيلىك رۋبلدىڭ باعامى رەسەي فەدەراتسياسىنداعى جاعدايعا، ورتالىق بانك تاراپىنان جۇرگىزىلەتىن اقشا ساياساتىنا بايلانىستى بەلگىلەنەدى. بىزدەگى باعام ەكونوميكالىق جاعدايىمىزعا بايلانىستى انىقتالادى. ەكسپورت تا، يمپورت تا ىقپال ەتەدى»، - دەدى ءمادينا ءابىلقاسىموۆا.

اۆتور

مارلان جيەمباي