ماربۋرگ ۆيرۋسى: دەنساۋلىق ساقتاۋ مينيسترلىگى ەپيد جاعدايعا بايلانىستى باقىلاۋدى كۇشەيتتى

استانا. KAZINFORM - دەنساۋلىق ساقتاۋ مينيسترلىگى دۇنيەجۇزىلىك دەنساۋلىق ساقتاۋ ۇيىمىنىڭ جاڭا قاۋىپتى ينفەكتسيا - ماربۋرگ ۆيرۋسىنىڭ ءورشۋى تۋرالى ەسكەرتۋىنە بايلانىستى ەپيدەميولوگيالىق جاعدايدى باقىلاۋدى كۇشەيتتى. بۇل تۋرالى ق ر باس مەملەكەتتىك سانيتاريالىق دارىگەرى سارحات بەيسەنوۆا حابارلادى.

ماربۋرگ ۆيرۋستىق اۋرۋى - ادامدارعا دا، باسقا پريماتتارعا دا اسەر ەتەتىن سيرەك كەزدەسەتىن، اۋىر ۆيرۋستىق گەمورراگيالىق قىزبا. ۆيرۋس تابيعاتتا جارقاناتتاردا كەزدەسەدى جانە جارقاناتتاردان ادامدارعا بەرىلۋى مۇمكىن.

ماربۋرگ قىزباسىنىڭ تابيعي وشاقتارى - وڭتۇستىك، باتىس جانە ورتالىق افريكا ەلدەرى: وڭتۇستىك افريكا (وڭتۇستىك افريكا رەسپۋبليكاسى)، گابون، سۋدان، كونگو دەموكراتيالىق رەسپۋبليكاسى، ليبەريا، گۆينەيا، زيمبابۆە، كەنيا.
اۋرۋدىڭ كلينيكالىق كورىنىستەرى ۆيرۋستى جۇقتىرعاننان كەيىن 2-21 كۇننەن كەيىن پايدا بولادى.

دەنساۋلىق ساقتاۋ مينيسترلىگى كەلەسىدەي پروفيلاكتيكا شارالارىن ساقتاۋدى ۇسىنادى:

حالىقتىڭ جوعارى كوشى-قونىن ەسكەرە وتىرىپ، قازاقستان دەنساۋلىق ساقتاۋ مينيسترلىگى قازاقستاندىقتارعا ەندەميالىق ەلدەرگە بارعان كەزدە مىناداي پروفيلاكتيكالىق شارالاردى ساقتاۋدى ۇسىنادى:

1) جۇقتىرعان ادامدارمەن بايلانىستا بولۋدان اۋلاق بولۋ؛
2) افريكا جۋنگليىندە كەزدەسەتىن جابايى جانۋارلاردان ساق بولۋ؛
3) جەرگىلىكتى جانۋارلاردىڭ ناشار قۋىرىلعان ەتىن جەمەۋ؛
4) مىسىرلىق جارقاناتتاردىڭ كوپ سانى - ۆيرۋستىڭ اسيمپتوماتيكالىق تاسىمالداۋشىلارى بار ۇڭگىرلەر مەن شاحتالارعا بارماۋ؛
5) اۋرۋدىڭ بەلگىلەرى پايدا بولعان كەزدە دەرەۋ مەديتسينالىق كومەككە جۇگىنۋ؛
6) جەكە گيگيەنا ەرەجەلەرىن ساقتاۋ.

بۇل ۆيرۋس نەسىمەن قاۋىپتى؟

ماربۋرگ ۆيرۋسىنا قارسى ارنايى ەم مەن ۆاكتسينا جوق. تەك سيمپتوماتيكالىق ەمدەۋ عانا جۇرگىزىلەدى.

ۆيرۋس ادامعا تىكەلەي بايلانىس ارقىلى بەرىلەدى. ءسىز زاقىمدالعان تەرى نەمەسە شىرىشتى قابىقتار ارقىلى جۇقتىرا الاسىز. سونىمەن قاتار، ۆيرۋستى زاتتاردىڭ بەتىنە تيگەندە جانە توسەك-ورىن نەمەسە ناۋقاستىڭ كيىمى سياقتى ماتەريالداردى ۇستاعان كەزدە جۇقتىرۋعا بولادى.

اۋرۋدىڭ نەگىزگى بەلگىلەرى: قىزبا؛ تاماق اۋرۋى؛ بورتپە؛ ءىشتىڭ اۋىرۋى؛ مۇرىن مەن كوزدىڭ قاناۋى.

ماربۋرگ ۆيرۋسىنىڭ تارالۋ قاۋپىنە بايلانىستى شەكتەۋ شارالارى قابىلدانا ما؟

«دەنساۋلىق ساقتاۋ مينيسترلىگى ماربۋرگ ۆيرۋسىنىڭ ەپيدەميولوگيالىق جاعدايىنىڭ دامۋىن مۇقيات قاداعالايدى. حالىقارالىق اۋەجايلاردا اۋرۋدىڭ رەسپۋبليكاعا اكەلىنۋىنە جانە تارالۋىنا جول بەرمەۋ ماقساتىندا بارلىق كەلەتىن جولاۋشىلاردىڭ بايلانىسسىز تەرمومەترياسى جۇرگىزىلەتىن مەملەكەتتىك شەكارادا سانيتاريالىق-كارانتيندىك باقىلاۋ جۇزەگە اسىرىلادى»، - دەپ اتاپ ءوتتى س. بەيسەنوۆا.

اۆتور
باقىتگۇل اباي قىزى