ماجارستانعا مال ونىمدەرىن كوبىرەك ساتساق دەپ وتىرمىز - سەرىك جۇمانعارين

 مەملەكەت باسشىسى قاسىم-جومارت توقايەۆ پەن ماجارستان پرەمەر-ءمينيسترى ۆيكتور ورباننىڭ اقورداداعى كەزدەسۋى الدىندا ۇكىمەت باسشىسىنىڭ ورىنباسارى سەرىك جۇمانعارين ب ا ق وكىلدەرىنە ەكى ەل اراسىنداعى الىس-بەرىستىڭ اۋقىمى تۋرالى مالىمەت بەردى، دەپ حابارلايدى Kazinform اگەنتتىگى. 

«بىلتىر ماجارستانمەن اراداعى تاۋار اينالىمىنىڭ كولەمى 100 ميلليون ا ق ش دوللارى بولدى. بيىلعى توعىز ايدا 24 پايىزعا ءوستى، تاعى دا ءوسۋى مۇمكىن. ونىڭ كوبى - ماجارستاننان كەلەتىن يمپورت. ءدارى-دارمەك، كوكونىس، كوبى تاعام. ساپاسى وتە جوعارى. ءبىز نە اپارامىز دەسەك، بيىل بالىق جەتكىزۋدى باستادىق. بيىل كولەمى ەكى ەسە كوبەيدى. بۇرىن 67 توننا بولسا، قازىر 120 توننا جىبەردىك. جالپى ەۋروپاعا بالىق ەكسپورتىن بيىل اشتىق دەۋگە بولادى. سونى بۇگىن تالقىلايمىز»، - دەدى سەرىك جۇمانعارين.

ونىڭ ايتۋىنشا، ەكى اراداعى ساۋدا-ساتتىقتىڭ اياسىن كەڭەيتۋگە مۇمكىندىك بەرەتىن تاۋارلاردىڭ ءتىزىمى ايقىندالعان.

«وكىنىشكە قاراي ەكى ەل اراسىنداعى ساۋدا اينالىمى ءبىز قالاعانداي اۋقىمدى ەمەس. ءبىراق وتە جىلدام ءوسىپ كەلەدى. جىل سايىن 25 پايىز ارتىپ جاتىر. ەكسپورت سونشا ۇلكەن ەمەس. ءبىرىنشى كەزەكتە مال شارۋاشىلىعىنىڭ ءونىمىنىڭ ەكسپورتىن ارتتىرۋىمىز كەرەك»، - دەدى ۆيتسە-پرەمەر.

ەسكە سالساق، كەشە كەشكە ۆيكتور ورباندى استانا اۋەجايىندا پرەمەر-ءمينيستردىڭ ورىنباسارى سەرىك جۇمانعارين كۇتىپ العان بولاتىن.

قازاقستان باسشىلىعىمەن كەلىسسوز بارىسىندا قازاقستان مەن ماجارستان اراسىنداعى ساۋدا- ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى تەرەڭدەتۋ ماسەلەلەرى تالقىلانادى دەپ جوسپارلانىپ وتىر.

ايتا كەتۋ كەرەك، استانادا تۇركى مەملەكەتتەرى ۇيىمىنىڭ X سامميتى وتەدى.

وعان ازەربايجان، قىرعىزستان، تۇركيا، وزبەكستان پرەزيدەنتتەرى، باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى.