ماڭعىستاۋدىڭ ەكونوميكاسى مۇناي-گاز سالاسىنا ابدەن تاۋەلدى بولىپ قالدى - ءوڭىر باسشىسى

استانا. KAZINFORM - ماڭعىستاۋدىڭ ەكونوميكاسى مۇناي-گاز سالاسىنا ابدەن تاۋەلدى بولىپ قالدى.

بۇل تۋرالى ماڭعىستاۋ وبلىسىنىڭ اكىمى نۇرداۋلەت قيلىباي «Jibek Joly» تەلەارناسىنىڭ «ۋادە» باعدارلاماسىنا بەرگەن سۇحباتىندا ايتتى.

«كەشە عانا 85 جىلدىق مەرەيتويىن اتاپ وتكەن عۇلامامىز ءابىش كەكىلبايەۆ ءبىر سوزىندە: «ءبىزدىڭ باعىمىزعا دا، سورىمىزعا دا بەرگەنى - مۇناي»، دەگەنى بار. شىندىعىندا دا كەڭەس داۋىرىنەن باستاپ، بۇگىنگە دەيىن ماڭعىستاۋدىڭ ەكونوميكاسى مۇناي-گاز سالاسىنا ابدەن تاۋەلدى بولىپ قالدى، ونى مويىندايمىز. قازىردىڭ وزىندە حالىقتى قابىلداعاندا جاستاردىڭ، تۇرعىنداردىڭ كوپشىلىگى مۇناي-گاز سالاسىنان جۇمىس سۇرايدى. بۇل سالادا جالاقى دا، الەۋمەتتىك قامسىزداندىرۋ دا ءتاۋىر. ال شاعىن جانە ورتا بيزنەس دۇرىس دامىماي وتىر. مىسالى، مۇناي مەن گازى جوق وڭىرلەردە كاسىپكەرلىك بىزگە قاراعاندا الدە قايدا جاقسى دامىعان»، - دەدى ءوڭىر باسشىسى.

دەگەنمەن، وبلىس اكىمى تۋريزمدى دامىتۋ ارقىلى شاعىن جانە ورتا بيزنەستىڭ تامىرىنا قان جۇگىرتۋگە بولاتىندىعىن ايتادى. ال ول ءۇشىن جاستاردى بيزنەسكە باۋلۋ كەرەك.

«ونسىز بولاشاق جوق. ەرتە مە، كەش پە سوعان تاۋەلدى بولامىز. «اۋىل اماناتى» دەگەن باعدارلاما بار. باعدارلاما قولعا الىنعان العاشقى جىلى ماڭعىستاۋ وبلىسى 800 ميلليون تەڭگە السا، ودان كەيىن 1,2 ميلليارد تەڭگەگە جەتتى. قازىر اۋىلداردان سۇرانىس كوپ. ويتكەنى، شاعىن جانە ورتا بيزنەس اشۋعا نيەتتى تۇرعىنداردىڭ قاراسى قالىڭ. ەندى 1,8 ميلليارد تەڭگە سۇراپ وتىرمىز. بۇل باعدارلامانىڭ اۋىلدىق جەرگە تيگىزەتىن اسەرى وتە جوعارى. بۇگىندە ماڭعىستاۋ حالقى نەنى كوپ تۇتىناتىنىن، قانداي نارسەگە قاراجات كوپ جۇمسايتىندىعىن زەرتتەپ جاتىرمىز. مىنە سولاردى وزىمىزدە اشۋىمىز كەرەك»، - دەدى نۇرداۋلەت قيلىباي.

اۆتور

مارلان جيەمباي