ەلىمىزدە 5855 ب ا ق جۇمىس ىستەيدى

 استانا. KAZINFORM - مادەنيەت جانە اقپارات مينيسترلىگى بۇقارالىق اقپارات قۇرالدارى قىزمەتكەرلەرىن مەرەكەمەن قۇتتىقتادى.

«بۇگىن - كۇن سايىن تالماي اقپارات تاراتىپ، ماڭىزدى ماسەلەلەر كوتەرىپ، قوعامدىق پىكىر قالىپتاستىراتىن جانە قوعامنىڭ دامۋىنا زور ۇلەس قوسىپ جۇرگەن جانداردىڭ ەڭبەگىن ەرەكشە اتاپ وتەتىن كۇن. جۋرناليستيكا جاي عانا كاسىپ ەمەس، قاستەرلى مىندەت ءارى ۇلكەن جاۋاپكەرشىلىك. سىزدەرگە جۇكتەلگەن مىندەت كاسىبي بىلىكتىلىكتى، وبەكتيۆتىلىكتى، ادالدىق پەن باتىلدىقتى قاجەت ەتەدى. قانشاما قيىندىقتار مەن سىن- سىناقتارعا قاراماستان، ءوز مىندەتتەرىن ابىرويمەن اتقارىپ، ادىلدىك پەن شىندىقتىڭ جولىندا ايانباي ەڭبەك ەتىپ كەلە جاتقان بارشا ب ا ق وكىلدەرى قاشاندا جوعارى قۇرمەتكە لايىق»، - دەلىنگەن قۇتتىقتاۋ ماتىنىندە.

مينيسترلىكتىڭ مالىمەتىنشە، بۇگىندە قازاقستاندا جالپى باسپا باسىلىمدارى، تەلەارنالار، راديو جانە ينتەرنەت- رەسۋرستاردى قوسقاندا 5855 ب ا ق تىركەلگەن.

«سىزدەردىڭ جەمىستى جۇمىستارىڭىز ەلىمىزدىڭ اقپاراتتىق كەڭىستىگىن نىعايتۋعا جانە اشىق ءارى ءادىل قوعام قۇرۋعا ىقپال ەتەدى. جۋرناليست - بۇقارا مەن بيلىكتىڭ اراسىن جالعايتىن التىن كوپىر. وسى ورايدا ەل مۇددەسى ءۇشىن قاجىرلى قىزمەت اتقارىپ جۇرگەن بارشا ب ا ق وكىلدەرىنە ەرەكشە العىس بىلدىرەمىز»، - دەدى مينيسترلىكتەن.

بۇعان دەيىن مەملەكەت باسشىسى بۇقارالىق اقپارات قۇرالدارى قىزمەتكەرلەرىن مەرەكەمەن قۇتتىقتاعان بولاتىن.