كاسپيي يتبالىقتارى رەزەرۆاتىنىڭ قۇرىلۋىنا بايلانىستى ماڭعىستاۋ وبلىسىنىڭ شەكاراسى كەڭەيەدى

  اقتاۋ. KAZINFORM - ماڭعىستاۋدا ءماسليحات كاسپي يتبالىقتارى ءۇشىن مەملەكەتتىك تابيعي رەزەرۆات قۇرۋعا بايلانىستى وبلىس شەكاراسىن كەڭەيتۋ ماسەلەسىن ماقۇلدادى.

ماڭعىستاۋدا وبلىستىق ءماسليحاتتىڭ VIII شاقىرىلىم دەپۋتاتتارى كەزەكتەن تىس توعىزىنشى سەسسيادا ايماقتىڭ اكىمشىلىك شەكاراسىن وزگەرتۋ تۋرالى ماسەلە قارادى.

ماڭعىستاۋ وبلىسى جەر قاتىناستارى باسقارماسى باسشىسىنىڭ مىندەتىن اتقارۋشى باتىربەك ءتاجىمۇحانوۆ كاسپيي يتبالىقتارى ءۇشىن مەملەكەتتىك تابيعي رەزەرۆات قۇرۋ كەزىندە وبلىس شەكارالارىن كەڭەيتۋ قاجەت ەكەنىن ايتتى، دەپ حابارلايدى ماڭعىستاۋ وبلىسى اكىمىنىڭ باسپا ءسوز قىزمەتى.

«كاسپي تەڭىزىنىڭ 12 ميل اكۆاتورياسىن قوسۋ جوسپارلانۋدا. بۇل اۋماقتى قوسۋ مەملەكەت باسشىسىنىڭ كاسپيي يتبالىقتارى ءۇشىن تابيعي رەزەرۆات قۇرۋ جونىندەگى تاپسىرماسىنىڭ ورىندالۋىن قامتاماسىز ەتۋگە قاجەت»، -دەدى باتىربەك ءتاجىمۇحانوۆ.

تابيعي رەزەرۆات ماڭعىستاۋ وبلىسىنىڭ شەكاراسى مەن كاسپي تەڭىزىندەگى 12 ميلدىك بەلدەۋ اراسىنداعى اۋماقتا ورنالاساتىن بولادى. كاسپيي تەڭىزىندەگى قوسىلاتىن اۋماقتىڭ جالپى اۋدانى 1 ميلليون 487,4 مىڭ گەكتاردى قۇرايدى.

«ماسليحات بۇگىن شەكارا بويىنشا شەشىمدى بەكىتتى. تابيعي رەزەرۆاتتىڭ سحەمالىق كارتاسىن ق ر „اكىمشىلىك- اۋماقتىق قۇرىلىس تۋرالى“ زاڭىنا سايكەس دەرەكتەردى كورسەتە وتىرىپ، ازىرلەگەننەن كەيىن جانە قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ ماماندارى الدىن الا قاراعان سوڭ، قازاقستان رەسپۋبليكاسىنىڭ ۇكىمەتىنە كەلىسۋگە جىبەرىلەدى» - دەپ ءتۇسىندىردى باتىربەك ءتاجىمۇحانوۆ.

وبلىس شەكارالارىن بەلگىلەۋ جانە تەڭىزدىڭ 12 ميلدىك ايماعىن اكىمشىلىك باسقارۋعا قوسۋ يتبالىقتار پوپۋلياتسياسىنىڭ ساقتالۋىن قامتاماسىز ەتىپ قانا قويماي، كاسپي تەڭىزى جاعالاۋىندا ءتۋريزمنىڭ دامۋىنا ىقپال ەتەدى. بۇل ءوز كەزەگىندە ءوڭىردىڭ تۇراقتى ەكونوميكالىق دامۋىن ىنتالاندىراتىن بولادى.

ءوڭىر باسشىسى نۇرلان نوعايەۆ كاسپي تەڭىزىندە رەزەرۆات قۇرۋ - يتبالىقتار پوپۋلياتسياسىن ساقتاۋدىڭ ءبىر جولى ەكەنىن جانە بۇل ارنايى قورعالاتىن قورىق ايماعى بولاتىنىن اتاپ ءوتتى.

«كاسپي تەڭىزىندە تۇراتىن يتبالىقتاردىڭ ەندەميكتەرىنە قاتىستى الاڭداۋشىلىق بار. بۇگىن ءبىز وسى تەڭىز سۇتقورەكتىلەرىن ساقتاۋ ءۇشىن وبلىس اۋماعىنا 12 ميلدىك سۋ ايماعىن قوسۋ مۇمكىندىگىن تالقىلادىق. جىل سايىن يتبالىقتىڭ كۇشىكتەرى سانىنىڭ ازايۋى بايقالادى. كاسپي يتبالىعى قازاقستاننىڭ قىزىل كىتابىنا ەنگىزىلگەن جانە ولاردىڭ سانى جىلدان جىلعا ازايۋدا. ماماندار قازىرگى جاعدايعا قاتىستى ۇلكەن الاڭداۋشىلىق تانىتىپ وتىر. جانۋارلاردىڭ ازايۋى ولاردىڭ جويىلىپ كەتۋ ءقاۋپىن تۋدىرادى. ءبىز ءوز قۇزىرەتىمىز شەگىندە ەكولوگيا مينيسترلىگىمەن جانە باسقا دا ورتالىق مەملەكەتتىك ورگاندارمەن ىنتىماقتاستىقتا كاسپيي تەڭىزىندە رەزەرۆات قۇرۋ مۇمكىندىگىن قاراستىرامىز»، — دەپ اتاپ ءوتتى نۇرلان نوعايەۆ.

ەسكە سالا كەتەيىك، پرەزيدەنت قاسىم- جومارت توقايەۆ 2021 -جىلدىڭ قىركۇيەگىندە كاسپيي تەڭىزىنىڭ سولتۇستىگىندە كاسپي يتبالىعىنىڭ پوپۋلياتسياسىن ساقتاۋ ءۇشىن رەزەرۆاتتار قۇرۋدى ۇسىنعان بولاتىن.

سول كەزدە مەملەكەت باسشىسى كاسپي يتبالىقتارىنىڭ پوپۋلياتسياسى ماسەلەسى وتە وزەكتى ەكەنىن، وسى بىرەگەي جانۋاردى ساقتاۋ، ولاردىڭ مەكەندەۋ ورتاسى مەن سانىن ارتتىرۋ جونىندە شارالار قابىلداۋ قاجەت ەكەنىن ايتقان بولاتىن.