جۋرناليستەردىڭ قاۋىپسىزدىگىنە باسا نازار اۋدارۋ قاجەت - بيبىگۇل جەكسەنباي
تۇركىستان قالاسىندا «مەدياكراتتار مەديافورۋمى» ءوتتى. ب ا ق وكىلدەرى باس قوسقان جيىندا «ماسس-مەديا تۋرالى» زاڭ جوباسى تالقىلاندى، دەپ حابارلايدى Kazinform.
مەديفورۋمعا اۋداندىق، قالالىق گازەتتەردىڭ باس رەداكتورلارىنان باستاپ وبلىستىق، ايماقتىق مەدياحولدينگتەردىڭ ديرەكتورلارى، ەلىمىزدەگى جەتەكشى اقپارات قۇرالدارىنىڭ وكىلدەرى قاتىستى.
العاش بولىپ بايانداما جاساعان «Aulieata» مەدياحولدينگىنىڭ ديرەكتورى ورالحان ءداۋىت اقپارات سالاسىنداعى رەفورمالاردىڭ ءتيىمسىز تۇستارىن اتاپ ءوتتى. وڭىرلەردەگى مەدياحولدينگتەردىڭ جۇمىستارىندا بىرىزدىلىكتىڭ بولماۋىنان ءار وڭىردە مەملەكەتتىك تاپسىرىستىڭ باعاسى دا ءارتۇرلى ەكەنىن ايتتى.
مەملەكەت جانە قوعام قايراتكەرى دارحان مىڭباي «ماسس-مەديا تۋرالى» زاڭ جوباسىندا ءبىرقاتار جاقسى جاڭالىقتىڭ بارىن العا تارتتى. سونداي-اق اسا جاۋاپتى كەزەڭدە جۋرناليستەردىڭ ءوزارا بىرلىگى وتە قاجەت ەكەنىن جەتكىزدى.
«ماسس-مەديا تۋرالى» زاڭ جوباسى بويىنشا قۇرىلعان جۇمىسشى توبىنىڭ جەتەكشىسى، ءماجىلىس دەپۋتاتى جاناربەك ءاشىمجان وسى ۋاقىتقا دەيىن زاڭ جوباسىنا قاتىستى ەكى جۇزدەن استام ۇسىنىس تۇسكەنىن مالدىمدەدى. ال سەناتور بيبىگۇل جەكسەنباي جۋرناليستەردىڭ قاۋىپسىزدىگىنە باسا نازار اۋدارۋ قاجەتتىگىنە توقتالدى.
«جاسىراتىنى جوق، ءوزىمىز جۋرناليستيكادا جۇرگەنىمىزدە تەلەارنانىڭ كامەراسىن 45 مىڭ دوللارعا، ال جۋرناليستى 1 مىڭ دوللارعا عانا ساقتاندىرىپ، شەت مەملەكەتكە، سوعىستىڭ ورتاسىنا جىبەرگەن كەزدەردى دە كورگەنبىز»، - دەدى ول.
زاڭ جوباسى بويىنشا جۇمىس توبىنىڭ مۇشەلەرى ەسەنكۇل كاپ قىزى، جۇلدىز ءابدىلدا، سەرىك ابىكەن ۇلى تۇركىستان تورىندە ۇلتتىق جۋرناليستيكانىڭ ەرتەڭىنە قانداي قاۋىپ ءتونۋى مۇمكىن ەكەنىنە ناقتى ايعاقتار كەلتىردى. مادەنيەت جانە اقپارات مينيسترلىگىنىڭ ب ا ق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احمەتوۆ جاڭا زاڭ جوباسىندا جۋرناليستەرگە كورسەتىلەتىن قولداۋلاردى ءتۇسىندىردى.
جيىندا احمەت ياساۋي اتىنداعى ح ق ت ۋ رەكتورى جانار تەمىربەكوۆا، تۇركىستان وبلىستىق قوعامدىق دامۋ باسقارماسىنىڭ باسشىسى ەرلان كۇزەمبايەۆ، «سىر مەديا» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى امانجول وڭعاربايەۆ جانە تۇركىستاندىق جۋرناليستەر كۇن تارتىبىندەگى تاقىرىپ توڭىرەگىندە ورامدى ويلارىن ايتىپ، ۇسىنىستارىن جەتكىزدى.
مەدياكراتتار مەديافورۋمىنىڭ قورىتىندىسى بويىنشا سالالىق مينيسترلىككە جانە پارلامەنتكە «ماسس-مەديا تۋرالى» زاڭ جوباسىنا قاتىستى ۇسىنىستار جولداناتىن بولدى.