جەمقورلىق قىلمىسى بويىنشا قاي سالا ءبىرىنشى ورىندا تۇر؟

استانا. KAZINFORM - ءبىلىم بەرۋ سالاسى جەمقورلىق قىلمىس بويىنشا ءبىرىنشى ورىندا. انتيكور مالىمەتىنشە، 2022-2023-جىلداردىڭ ىشىندە عانا پاراقور باسشىلار مەن ەسەپشىلەردىڭ كەسىرىنەن مەملەكەتكە 17 ميلليارد تەڭگە كولەمىندە زالال كەلگەن، - دەپ حابارلايدى ك ت ك تەلەارناسى.

انتيكور مالىمەتىنشە، بۇل قوماقتى قاراجات.

«ماسەلەن، تالدىقورعان قالاسىندا ءبىلىم بەرۋ ءبولىمىنىڭ مەڭگەرۋشىسى، باس ەسەپشى، بىرنەشە مەكتەپتىڭ ديرەكتورلارى 4 ميلليارد تەڭگەدەن اسا قارجى جىمقىرعان. ولاردىڭ ءبىرىن تۇتقىنداۋ كەزىندە كولىگىنەن شامامەن 1 ميلليارد تەڭگە شىقتى. مۇنداي بىلىق باسقا ايماقتاردا دا انىقتالدى»، - دەيدى ق ر سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى ۇلان سارقۇلوۆ.

ءبىرقاتار بىلىقتى انىقتاعان انتيكور ءتيىستى مەملەكەتتىك ورگاندارمەن، سونىڭ ىشىندە جاۋاپتى مينيسترلىك جانە اكىمدىكتەرمەن قويان-قولتىق جۇمىس ىستەپ جاتىر. سونىڭ ناتيجەسىندە جەمقورلىق جايلاعان سالادا بارلىق پروتسەسس سيفرلاندىرىلاتىن بولادى. بۇل ءوز كەزەگىندە ادامي فاكتوردىڭ الدىن الىپ، جۇيەنىڭ اشىقتىعىن قامتاماسىز ەتەدى. سارقۇلوۆتىڭ ايتۋىنشا، قازىردىڭ وزىندە ءتۇرلى اقپارات جۇيەلەرى مەن باعدارلاما ەنگىزىلىپ، ول ءبىرشاما پايداسىن تيگىزىپ ۇلگەردى.