جالعان اتاق بەرىپ، جارىستارعا السىزدەرىن اپارعان: انتيكور سپورتتاعى بىلىقتاردى جايىپ سالدى

استانا. KAZINFORM - سپورت سالاسىنداعى جەمقورلىقا تىكەلەي ىقپال ەتەتىن فاكتورلاردىڭ ءبىرى - حالىقارالىق جارىستارعا قاتىسۋ ءۇشىن سپورتشىلاردى اشىق ىرىكتەۋدىڭ بولماۋى.

«جوعارى جەتىستىكتەر سپورت سالاسىندا پروتسەستەردى سيفرلاندىرۋ مۇلدەم جوق. 2020-جىلى ە-sport ۇلتتىق سيفرلىق پلاتفورماسىن ەنگىزۋگە جوسپارلانعان ازىرلەۋ جۇرگىزىلگەن جوق. ناتيجەسىندە بەيىندى مينيسترلىك قازاقستاندىق سپورتتىڭ جاي-كۇيى تۋرالى تولىق دەرەكتەردى بىلمەيدى، جۇلدەگەرلەردىڭ، سپورت عيماراتتارىنىڭ، سپورت سەكسيالارى مەن جاتتىقتىرۋشىلاردىڭ ءبىرىڭعاي ەسەبىن جۇرگىزبەيدى»، - دەلىنگەن انتيكور اقپاراتىندا.

سيفرلاندىرۋدىڭ بولماۋى جالعان سپورتشىلارعا سپورتتىق اتاقتار بەرۋگە، جارىستارعا قاتىسۋ ءۇشىن سپورتشىلاردى اشىق ەمەس جانە سۋبەكتيۆتى ىرىكتەۋگە ىقپال ەتەدى.

«اتالعان فاكتورلاردىڭ سالدارىنان مۇنداي جاعداي ۇلەستەس جەتكىزۋشىلەردى ىرىكتەۋمەن، وقۋ-جاتتىعۋ جيىندارى مەن سپورت وبەكتىلەرىن جالعا الۋدىڭ جالعاندىعىمەن، لەگيونەرلەرگە ەڭبەكاقىنى اسىرا باعالاۋمەن، قوسارلانعان قارجىلاندىرۋمەن ۇشتاسقان بيۋجەت قاراجاتىنىڭ باقىلاۋسىز يگەرىلۋىنە الىپ كەلدى. تالداۋ قورىتىندىسى بويىنشا سپورتتى دامىتۋ باسىمدىقتارىن قايتا قاراۋ، بۇقارالىق جانە بالالار سپورتىنا بيۋجەتتى ۇلعايتۋ، قارجىلاندىرۋدى ورتالىقتاندىرۋ، ءوز ينفراقۇرىلىمىن جانە بالالار اكادەميالارىن دامىتۋ، سونداي-اق سيفرلاندىرۋدى ەنگىزۋ بويىنشا ۇسىنىمدار ەنگىزىلدى»، - دەلىنگەن اقپاراتتا.