شىڭجاڭدا بايگە، كوكپار تورەشىلەرىنە تۇڭعىش رەت ارنايى كۋالىك بەرىلدى
شىڭجاڭدا ات سپورتى، كوكپار ويىنى تورەشىلەرىنىڭ دەڭگەيىن جوعارىلاتۋ ماقساتىندا تۇڭعىش رەت ارنايى كۋرس ۇيىمداستىرىلدى.
اتالعان كۋرسقا ءۇرىمجى، سانجى، قۇلجا، قاشقار قاتارلى وڭىرلەردەن كەلگەن، ءار ۇلت وكىلىنەن قۇرالعان 60 تان استام تورەشى قاتىسىپ، جاقسى ناتيجە كورسەتكەندەرىنە ارنايى كۋالىك الدى. بۇدان كەيىن ولار وسى كۋالىگىن كورسەتۋ ارقىلى بايگە، كوكپار قاتارلى سپورتتىق باسەكەلەردە تورەشى بولا الادى، دەپ حابارلايدى Kazinform قىتايدىڭ «جەنمين جيباو» اقپاراتتىق پورتالىنا سىلتەمە جاساپ.
اتالعان ب ا ق-تىڭ كەلتىرگەن مالىمەتىنە سۇيەنسەك، وسى جولعى كۋرستى شىڭجاڭ ۇيعۇر اۆتونوميالى ولكەلىك سپورت مەكەمەسىنىڭ شەشىمىمەن، اۆتونوميالى ولكەلىك سپورت باس قوعامى جەتەكشىلىك ەتىپ، شىڭجاڭ ات سپورتى قاۋىمداستىعى ۇيىمداستىرعان.
شىڭجاڭ ات سپورتى قاۋىمداستىعىنىڭ باس حاتشىسى بان جىچياننىڭ ايتۋىنشا، شىڭجاڭدا ات سپورتىن، كوكپار ويىنىن ءار ۇلتتىڭ حالقى وتە جاقسى كورەدى. سوندىقتان از ۇلتتاردىڭ سپورت تۇرلەرىنەن ات سپورتىنىڭ، كوكپار ويىنىنىڭ جارىس ەرەجەلەرىنە نەگىزدەلە وتىرىپ، وسى جولعى كۋرستىق جۇمىس ۇيىمداستىرىلعان.
«بۇدان كەيىن بايگە، كوكپار جارىستارىنا تورەشى بولۋ ءۇشىن تورەشىلىك كۋالىگى بولۋى كەرەك. كوكپار تارتاتىن الاڭنىڭ ۇلكەن-كىشىلىگى، كوكپار تاستايتىن شارباقتىڭ بيىكتىگى، كەڭدىگى، فورماسى قاتارلىلارعا ەندى ءبىرتۇتاس ولشەم بەلگىلەنەدى. جارىس پەن تورەشى ءبىرتۇتاس جۇيەگە تۇسىرىلگەندە عانا، شىڭجاڭنىڭ ات سپورتىنىڭ دامۋىنا ءتيىمدى بولادى»، - دەيدى بان جىچيان.
گانسۋ ولكەسى اقساي قازاق اۆتونوميالى اۋداندىق مادەنيەت، سپورت جانە ساياحات مەكەمەسىنەن قىزمەتكەرلەرى باستاپ شىڭجاڭدا وتكەن كۋرسقا ارنايى كوماندا كەلگەن.
كوماندا باسشىسى قابىلبەك قاجىكەي ۇلىنىڭ ايتۋىنشا، بايگە، كوكپار سەكىلدى ات ويىندارى ءاربىر وڭىرگە تۋريستەردى باۋراي الادى. وعان شىڭجاڭنىڭ جىلقى شارۋاشىلىعىنىڭ دامۋى، ات سپورتىن دامىتۋى ەرەكشە اسەر قالدىرعان.
«وسى جولعى كۋرس ەكى ولكە اراسىنداعى تاپتىرمايتىن ورايلى ساتتەردىڭ ءبىرى بولدى»، - دەيدى قابىلبەك قاجىكەي ۇلى.
قىتايلىق ب ا ق- تىڭ دەرەگىنشە، بۇرىن «اۋىل تورەشىلەرى» كۋالىگى بار تورەشىلەر بولدى. ەندى ات سپورتتارى اناعۇرلىم كاسىپتىك دەڭگەيدە جانە تارتىمدى وتكىزىلەتىن بولدى. شىڭجاڭ ات سپورتى قاۋىمداستىعى الداعى ۋاقىتتا ىلە، تارباعاتاي، التاي، قاشقار قاتارلى ايماقتاردا جالعاستى كۋرستار ۇيىمداستىرماق.
اۆتور
بەيسەن سۇلتان ۇلى