EURO 2024: رامازان ورازوۆ سلوۆەنيامەن وتكەن ماتچتىڭ ۇزدىك ويىنشىسى اتاندى

فۋتبولدان قازاقستان قۇراماسىنىڭ جارتىلاي قورعاۋشىسى رامازان ورازوۆ ەۋروپا چەمپيوناتى ىرىكتەۋ ساتىسىنداعى 20- قاراشادا سلوۆەنيامەن وتكەن ماتچتىڭ ۇزدىك ويىنشىسى اتاندى، دەپ حابارلايدى Kazinform.

بۇل جونىندە قازاقستان فۋتبول فەدەراتسياسى ءمالىم ەتتى.

ەل قۇراماسى H توبىندا سىنعا ءتۇستى. قارسىلاستارى - دانيا، سلوۆەنيا، فينليانديا، سولتۇستىك يرلانديا مەن سان-مارينو.

ايتا كەتسەك، مەملەكەت باسشىسى قاسىم-جومارت توقايەۆ قازاقستان قۇراماسىنىڭ ەلوردادا وتكەن سولتۇستىك يرلانديا جانە سان-مارينو قۇرامالارى كەزدەسۋىن تاماشالاپ، جانكۇيەرلىك جاسادى.

قازاقستاندىق فۋتبولشىلار سولتۇستىك يرلانديانى 1:0 ەسەبىمەن جەڭدى.

ال سان-مارينونى 3:1 ەسەبىمەن تىزە بۇكتىردى.

سلوۆەنيا جانە قازاقستان قۇرامالارى ءوزارا كەزدەسۋىندە ەۋروپا چەمپيوناتى فينالدىق ساتىسىنا بەرىلەتىن ەكىنشى جولداما ساراپقا سالعان ەدى.

ەل قۇراماسى قارسىلاسىنا 1:2 ەسەبىمەن ەسە جىبەرىپ، ءوز توبىندا 18 ۇپايمەن فينليانديامەن بىرگە ءۇشىنشى-ءتورتىنشى ورىندارعا جايعاستى.

كەزدەسۋ بارىسىندا رامازان ورازوۆ توقسان مينۋت بويى ويىن كورسەتتى. ول 47-مينۋتتا قارسىلاستار قاقپاسىنا گول سوعىپ، تارازى باسىن تەڭەستىرگەن ەدى.

سونداي-اق، ول اتالعان ىرىكتەۋ ساتىسىنداعى بارلىق كەزدەسۋدە العاشقى مينۋتتان جاسىل الاڭعا شىقتى.

بۇگىندە رامازان ورازوۆ سلوۆەنيانىڭ «كوپەر» كومانداسىنىڭ نامىسىن قورعايدى.

ول 1999-جىلى الماتى قالاسىندا دۇنيەگە كەلگەن. قازاقستان، رەسەي، لاتۆيا كلۋبتارىندا دوپ تەپتى. ۇلتتىق قۇراما ساپىنداعى العاشقى ويىنىن الەم چەمپيوناتى ىرىكتەۋ ساتىسىندا 2021-جىلدىڭ 31- ناۋرىزىندا ۋكرايناعا قارسى وتكىزدى.