EURO 2024: بۇگىن قازاقستان قۇراماسى سلوۆەنيامەن كەزدەسەدى
بۇگىن فۋتبولدان 2024-جىلعى ەۋروپا چەمپيوناتى ىرىكتەۋ ساتىسىندا قازاقستان قۇراماسى سلوۆەنيا قۇراماسىمەن كەزدەسەدى، دەپ حابارلايدى Kazinform.
قۇرامالار H توبىندا ويىن كورسەتەدى. قارسىلاستارى-دانيا، سولتۇستىك يرلانديا، فينليانديا، سان- مارينو.
سلوۆەنيا — قازاقستان كەزدەسۋى 20-قاراشادان 21 نە قاراعان ءتۇنى Qazaqstan جانە Qazsport تەلەارنالارىنان ساعات 1:45 تە كورسەتىلەدى.
ەل قۇراماسى H توبىندا 9 ويىننان كەيىن 18 ۇپاي جيناپ، ءۇشىنشى ورىندا تۇر.
بۇل توپتا دانيا 22 ۇپاي جيناپ، قۇرلىقتىق دودانىڭ فينالدىق ساتىسىنا ءبىر تۋر بۇرىن جولداما الدى.
ال سلوۆەنيا قۇراماسىنىڭ ەنشىسىنە 19 ۇپاي جازىلعان.
ەندى ەكىنشى جولداما تاعدىرى سلوۆەنيا مەن قازاقستان كەزدەسۋىندە شەشىلەدى.
اتالعان كەزدەسۋگە ەل قۇراماسىنان جاراقاتىنا بايلانىستى اسحات تاعىبەرگەن، باۋىرجان يسلامحان، ميحايل گابىشيەۆ، باحتيەر زاينۋتدينوۆ قاتىسا المايدى.
سونداي- اق، بۇل ويىنعا UEFA پرەزيدەنتى الەكساندەر چەفەرين كەلەدى دەپ كۇتىلىپ وتىر.
قازاقستاندىق فۋتبولشىلار جەڭىسكە جەتكەن جاعدايدا ءوز تاريحىندا تۇڭعىش رەت ەۋروپا چەمپيوناتى فينال ساتىسىنا جولداما الادى.
ءبىزدىڭ فۋتبولشىلار 23-ناۋرىزدا ەلوردادا وتكەن ويىندا اتالعان قارسىلاسىنا 1:2 ەسەبىمەن ەسە جىبەردى.