شەتەلدەگى قازاقتاردىڭ «قانداس» ەكەنى قالاي انىقتالادى

استانا. KAZINFORM - ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتىنىڭ ءتوراعاسى اسقاربەك ەرتايەۆ سىرتتان كەلەتىن وتانداستارىمىزعا «قانداس» ستاتۋسى قالاي بەرىلەتىنىن ءتۇسىندىرىپ بەردى.

«جەرگىلىكتى اتقارۋشى ورگاننىڭ جانىنان كوميسسيا قۇرىلادى. ونىڭ قۇرامىنا جۇمىسپەن قامتۋ، ءبىلىم بەرۋ، ىشكى ساياسات جانە ىشكى ىستەر باسقارمالارىنىڭ، ۇلتتىق قاۋىپسىزدىك كوميتەتى وكىلدەرى كىرەدى. ودان بولەك، ۇلتتى ايقىنداۋ سالاسىنداعى ءتۇرلى پروفەسسورلار مەن ساراپشىلار قاتىسادى»، - دەدى اسقاربەك ەرتايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، «قانداس» مارتەبەسىن بەرۋدى اتالعان كوميسسيا قاراپ، انىقتايدى.

«كوميسسيانىڭ جۇمىس فۋنكسيالارى، ازاماتتارمەن سۇحباتتاسۋ ءتارتىبى، ياعني ءوز ۇلتىن راستاي المايتىن ادامعا قانداي سۇراقتار قويۋعا بولاتىنى تۋرالى ەرەجەلەر ازىرلەنگەن. سونداي- اق، كوميسسيادا قانداي دا ءبىر كۇمان تۋىنداعان جاعدايدا گەنومدىق ساراپتاما جۇرگىزۋدى قاراستىرىلعان. ساراپتاما ارقىلى ازاماتتىڭ قازاق ۇلتىنا قاتىسى بار- جوعى انىقتالادى»، - دەيدى ول.

اۆتور

داۋلەت ىزتىلەۋ