ديماش قاتىسقان «Singer» بايقاۋىندا تاعى ءبىر قازاقستاندىق ءانشى باق سىنايدى

استانا. KAZINFORM - قازاقستاندىق ءانشى، ءتۇرلى بايقاۋلاردىڭ جەڭىمپازى رۋحيا بايدۇكەن قىتايداعى «Singer» ءان بايقاۋىندا باق سىنايدى. بۇل جونىندە ءانشىنىڭ پروديۋسەرى ەرتاي ءنۇسىپجانوۆ ءمالىم ەتتى.

«اراعا 7 جىل ۋاقىت سالىپ «Singer» ساحناسىنا قايتا ورالدىق. بۇل جولى - رۋحيا. 4 جىل ۇزىلىستەن كەيىن تاعى دا ميلليونداعان كورەرمەنگە جول تارتقان اتى الەمگە ايگىلى مۋزىكالىق تەلەجوبا بيىلعى مامىر ايىندا باستالدى. بۇل ماۋسىمنىڭ باستى ەرەكشەلىگىنىڭ ءبىرى - جوبا تىكەلەي ەفيردە، قىتايدا ءوتىپ جاتىر. باعالاۋ حالىقتىڭ داۋىس بەرۋى نەگىزىندە بولادى»، - دەپ جازدى ە. ءنۇسىپجانوۆ Facebook جەلىسىندە.

رۋحيا بۇگىن قازاقستان ۋاقىتىمەن ساعات 17:00 دە 8 كەزەڭدە ونەر كورسەتەدى. «توپ جارۋ» ستاتۋسىمەن كەلگەن شەتەلدىك انشىگە قويىلعان تالاپ بويىنشا، رۋحيا الدىڭعى 7 كەزەڭدە ۇزدىك 4 كە ەنگەن انشىلەردىڭ ءبىرىن تاڭداپ، ونىمەن جەكپە- جەك سايىسقا تۇسەدى.

«باعالاۋشى بارشا كورەرمەننىڭ داۋىس بەرۋ ناتيجەسىندە جەڭسە، كەلەسى كەزەڭگە وتەدى. ال جەڭىلسە ءبىز ءۇشىن سايىس وسى تۇستا اياقتالادى. قالاي بولعاندا دا، بۇل - ۇلكەن ەڭبەك، ارتىس- تارتىسپەن كەلگەن جەڭىس. جەڭىس دەيتىنىم، ۇلكەن ساحنادا تاعى ءبىر قازاق كۇللى الەمگە ونەر كورسەتىپ، قازاقتىڭ اتىن شىعارادى. بۇدان اسقان جەڭىس بار ما، ءسىرا»، - دەيدى پروديۋسەر.

ەسكە سالا كەتسەك، 2017 -جىلى ديماش قۇدايبەرگەن قىتايدىڭ حۋنان تەلەارناسىنىڭ «Singer 2017» ءان بايقاۋىنا قاتىسىپ، ەكىنشى ورىندى جەڭىپ الدى جانە الەمدىك ارەنادا تانىمال انشىگە اينالدى.