دەسترۋكتيۆتى مىنەز-قۇلىقتىڭ كەز كەلگەن تۇرىنە قارسى كۇرەس كەشەندى ءىس-قيمىلدى تالاپ ەتەدى - ەرلان قارين

زاڭدىلىق پەن ءتارتىپ قاعيداتىن ورنىقتىرۋ ءىسى ۆانداليزم، بالالارعا قارسى قىلمىس، تۇرمىستىق زورلىق-زومبىلىق سياقتى جاعىمسىز قۇبىلىستارمەن كۇرەستەن باستالادى، دەپ جازدى بۇگىن ءوزىنىڭ Telegram-كانالىندا ق ر مەملەكەتتىك كەڭسەشىسى ەرلان قارين.

مۇنداي قۇقىقبۇزۋشىلىقتارعا قويىلاتىن العاشقى جانە وتە ماڭىزدى توسقاۋىل - ازاماتتاردىڭ ولارعا بەي- جاي قاراماۋى. سوندىقتان ەلىمىزدە جۇگەنسىزدىكتىڭ، وزبىرلىقتىڭ جانە قىلمىستىڭ كەز كەلگەن تۇرىنە مۇلدەم توزبەۋشىلىك ۇستانىمىن قالىپتاستىرۋدىڭ ءمان-ماڭىزى زور. قوعامدا بەلسەندى ازاماتتىق كوزقاراس ۇستەمدىك قۇرىپ، ىزگىلىك، تىلەكتەستىك، ءوزارا كومەك سياقتى باستى قۇندىلىقتار دارىپتەلۋگە ءتيىس.

مەملەكەت باسشىسى قاسىم-جومارت توقايەۆ بالالاردىڭ قاۋىپسىزدىگى مەن ولاردىڭ قۇقىعىن قورعاۋ، تۇرمىستىق زورلىق-زومبىلىققا قارسى كۇرەس ماسەلەلەرى تۋرالى ۇنەمى ايتادى. ونىڭ سويلەگەن سوزدەرىنەن دايەكتىلىك جانە مىزعىماس ۇستانىم بايقالادى. پرەزيدەنت جۇگەنسىزدىكتىڭ كەز كەلگەن تۇرىنە، ۆانداليزم مەن زورلىق-زومبىلىققا قاتاڭ توسقاۋىل قويۋ كەرەك، اسىرەسە، ايەلدەر مەن بالالارعا قارسى قىلمىس ءۇشىن جازانى كۇشەيتۋ قاجەت دەپ ەسەپتەيدى.

قازاقستاندا 2020 -جىلدان بەرى وتباسىلىق- تۇرمىستىق زورلىق-زومبىلىققا قارسى كۇرەس جولىندا جۇيەلى شارالار قابىلدانىپ كەلەدى. ۇلتتىق قوعامدىق سەنىم كەڭەسىنىڭ باستامالارىن ىسكە اسىرۋ اياسىندا پوليتسيانىڭ ءتيىستى بولىمشەلەرىنىڭ شتاتتىق سانى ارتتى، وتباسىلىق-تۇرمىستىق زورلىق- زومبىلىق ىستەرىن قاراۋ ءۇشىن تەرگەۋشى- ايەل ماماندىعى ەنگىزىلدى.

زاڭناماداعى سوڭعى تۇزەتۋلەرگە سايكەس، ەندى مۇنداي قىلمىستار تەك جابىرلەنۋشى ارىزىنىڭ نەگىزىندە عانا ەمەس، سونىمەن بىرگە كۋاگەرلەردىڭ، كورشىلەردىڭ مالىمەتى، بەينەكامەرالاردىڭ جازباسى جانە ت. ب. نەگىزدە انىقتالاتىن بولادى. بۇدان بولەك، قازىر ءبىر رەت ىمىراعى كەلگەن تاراپتاردىڭ كەيىن قايتا تاتۋلاسۋىنا جول بەرىلمەيدى. جالپى، تۇرمىستىق زورلىق- زومبىلىق ءۇشىن اكىمشىلىك جانە قىلمىستىق جاۋاپكەرشىلىك كۇشەيتىلدى.

ارينە، قوعامدا باسقا كوزقاراس تا بار. كەيبىرەۋلەر زاڭنامانى ودان ءارى قاتاڭداتۋ مۇنداي قىلمىستاردىڭ اشىلۋ كورسەتكىشىن تومەندەتەدى دەپ ەسەپتەيدى. الايدا تاجىريبە كورسەتىپ وتىرعانداي، جازانىڭ قاتاڭدىعى جانە ودان بۇلتارۋ مۇمكىندىگىنىڭ بولماۋى - قىلمىسقا قارسى ءىس- قيمىلدىڭ ەڭ ءتيىمدى تەتىگى.

بۇل ماسەلەنى تەك زاڭناماعا وزگەرىس ەنگىزۋ ارقىلى شەشۋ مۇمكىن ەمەس. سونىمەن بىرگە ازاماتتاردىڭ كوزقاراسى، مورالدىق ۇستانىمى دا وزگەرۋى كەرەك. وسىنداي ارەكەتتەرگە كوز جۇمىپ قارايتىن بولساق، وندا مەملەكەت قابىلداپ جاتقان شارالاردان ەش ناتيجە شىقپايدى.

ياعني، دەسترۋكتيۆتى مىنەز-قۇلىقتىڭ كەز كەلگەن تۇرىنە قارسى كۇرەس كەشەندى ءىس-قيمىلدى تالاپ ەتەدى. قوعامدا قىلمىسقا مۇلدەم توزبەۋشىلىك قاعيداتى، ال مەملەكەتتىك دەڭگەيدە زاڭ مەن ءتارتىپ قاتاڭ ساقتالۋ قاعيداتى دارىپتەلۋى كەرەك. سوندىقتان مەملەكەتتىك ورگاندار مەن قوعامدىق ۇيىمدار جۇگەنسىزدىك پەن زورلىق- زومبىلىققا قارسى تۇرۋدىڭ تيىمدىلىگىن ارتتىرۋ ءۇشىن كۇش جۇمىلدىرىپ، ورتاق امال-ءتاسىل ازىرلەۋى قاجەت.

اۆتور

ايدار وسپاناليەۆ