عالىمدار التىن وردا داۋىرىندەگى كوستيۋمدەردى جاڭارتىپ جاتىر
مارعۇلان ۋنيۆەرسيتەتى جانىنداعى ارحەولوگيالىق زەرتتەۋلەر ينستيتۋتىنىڭ «ۇماي» مادەني مۇرالاردى ساقتاۋ جانە قالپىنا كەلتىرۋ جونىندەگى حالىقارالىق زەرتحاناسىنىڭ عالىمدارى وتكەن جىلى ءبىرقاتار تاريحي مۇرالاردى زەرتتەۋ جانە ناسيحاتتاۋ جۇمىستارىنا قاتىستى،
دەپ حابارلايدى Kazinform عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
سونىڭ ءبىرى - التىن وردا داۋىرىنە جاتاتىن تالماس اتا كەسەنەسىنەن تابىلعان تاريحي كيىمدەردى رەكونسترۋكتسيالاۋ تۋرالى جوبا. «ۇماي» حالىقارالىق زەرتحاناسىنىڭ مەڭگەرۋشىسى تاتيانا كرۋپانىڭ ايتۋىنشا، تالماس اتا كەسەنەسىنەن تابىلعان ارحەولوگيالىق جادىگەرلەر الەمدىك ارحەولوگيالىق قاۋىمداستىق ءۇشىن ماڭىزدى تاريحي ولجا سانالادى (ارحەولوگ ا. قاسەناليننىڭ ۇلىتاۋ اۋماعىنداعى قازبا جۇمىستارى ناتيجەسىندە انىقتالعان).
«تالماس اتا كەسەنەسى التىن وردا داۋىرىنە جاتادى. بۇل ۇلىتاۋ اۋماعىندا ورنالاسقان. زەرتتەۋشىلەر وسى كەسەنەدە جەرلەنگەن ادامدى بولعان انا كەسەنەسىمەن تۋىستىق قاتىناسى بار دەپ بايلانىستىرادى. ال ونىڭ شاپانى بىرنەشە جىلدان بەرى وسىندا ساقتالعان. قازىر سول شاپان بويىنشا كونسەرۆاتسيا (ۇزاق ۋاقىتقا ساقتاۋ) جۇمىسى جالعاسىپ جاتىر. وتكەن جىلى ۆارشاۆا ۋنيۆەرسيتەتىندە (پولشا) جانە كوپەنگاگەن ۋنيۆەرسيتەتىندە (دانيا) وتكەن حالىقارالىق كونفەرەنسيالاردا قازاقستان مەن ۋكراينا اۋماعىنداعى التىن وردا ارتەفاكتىلەرىن زەرتتەۋگە ارنالعان بايانداما جاسادىم. سونىمەن قاتار بولعان انا كەسەنەسىنەن تابىلعان شاپان تۋرالى جەكە بايانداما جاسالدى. تالماس اتا كەسەنەسىنەن تابىلعان ماتەريالداردىڭ ىشىندەگى تاعى ءبىر ەرەكشە جادىگەر ول - ەر ادامنىڭ ەتىگى. ونىڭ اينالاسىنان تالماس اتا كەسەنەسىندە جەرلەنگەن ادامنىڭ بەينەسى بار دەگەن تۇجىرىمداما جاسالعان. سودان كەيىن ەجەلگى ەتىكتەردىڭ كوشىرمەسىن جاساۋ جۇمىستارى جۇرگىزىلدى. بولاشاقتا اتالعان جادىگەرلەردى كونسەرۆاتسيالاۋ جۇمىستارى جوسپارلانىپ وتىر»، - دەدى ول.
قازبا جۇمىستارىنان تابىلعان ەتىكتىڭ وكشەسى مەن تابانىنان باسقا بولىگى تولىق ساقتالعان. ءتىپتى، ساقتالعان بولىكتەردە قازىرگى قازاق ويۋ-ورنەگىنە وتە ۇقساس قىزىقتى دەكورلاردى كورۋگە بولادى. تاتيانا كرۋپا مۇنى التىن وردا ءداۋىرىنىڭ تەحنولوگيالارى مەن كيىم داستۇرلەرىنىڭ ساباقتاستىعى دەپ سانايدى.
اۆتور
ەلميرا ورالبايەۆا