بيىل قىستا اۋا رايى قانداي بولادى؟

استانا. قازاقپارات - سينوپتيكتەر كۇزدىڭ سوڭعى ايلارىندا، قىستا جانە كوكتەمنىڭ العاشقى ايىندا اۋا رايى قانداي بولاتىنىن ايتتى.

قاراشا ايىنىڭ اۋا رايى

قاراشا - قىس الدىنداعى العاشقى اي. جىلى جانە ايازدى كۇندەردىڭ ءجيى وزگەرۋى، قار ارالاس جاۋىن-شاشىن، وڭتۇستىك-باتىس، وڭتۇستىك ايماقتاردا دا قار ارالاس جاڭبىر جاۋادى دەپ بولجانىپ وتىر. قاتتى جەل، بۇرقاسىن، كوكتايعاق جانە تۇمان ءبىر اي بويى كۇتىلەدى.

ايازدى اۋا رايى ايدىڭ ەكىنشى جارتىسىندا بولجانادى. سۋىق اۋا ماسسالارى ەنگەن كەزدە تەرمومەترلەردىڭ باعاندارى ەڭ سۋىق كۇندەردە تومەندەيدى:

رەسپۋبليكانىڭ سولتۇستىگىندە، ورتالىعىندا جانە شىعىسىندا تۇنگى ۋاقىتتا 15-24- گرادۋسقا دەيىن، كۇندىز -7-12 گرادۋسقا دەيىن؛

باتىستا جانە ەلدىڭ وڭتۇستىك جارتىسىندا تۇندە 3-15- گرادۋسقا دەيىن، كۇندىز 0،-7 گرادۋسقا دەيىن.

سۋىق كۇندەردىڭ ورنىنا ورتا ازيا مەن جەرورتا تەڭىزىنەن جىلى اۋا ماسسالارىنىڭ كەلۋى اسەرىنەن كۇندىز جىلىنادى:

رەسپۋبليكانىڭ كوپ بولىگىندە 3+8+ گرادۋسقا دەيىن؛

وڭتۇستىك جارتىسىندا 8+15 گرادۋس دەيىن.

جالپى، قاراشادا اۋا تەمپەراتۋراسى رەسپۋبليكانىڭ باسىم بولىگىندە نورما شاماسىندا (نورمالار قوسىمشادا كەلتىرىلگەن)، قيىر باتىستا - 1 گرادۋس نورمادان جوعارى، ەلدىڭ وڭتۇستىك، وڭتۇستىك- شىعىسىنداعى تاۋلى جانە تاۋ بوكتەرىندەگى اۋدانداردا – 1 گرادۋس نورمادان تومەن بولادى دەپ كۇتىلىپ وتىر (تۇركىستان، جەتىسۋ وبلىسى، شىعىس قازاقستان، اباي وبلىسىندا، جامبىل جانە الماتى وبلىستارىنىڭ وڭتۇستىگىندە).

قاراشا ايىندا جاۋىن-شاشىن مولشەرى قازاقستان اۋماعىنىڭ باسىم بولىگىندە نورما شاماسىندا، سولتۇستىك-باتىس جانە سولتۇستىك-شىعىس جارتىسىندا نورمادان كوپ (باتىس قازاقستان، پاۆلودار وبلىستارىندا، اتىراۋ جانە اقتوبە وبلىستارىنىڭ سولتۇستىك-باتىسىندا، سولتۇستىك قازاقستان، اقمولا وبلىستارىنىڭ شىعىسىندا، شىعىس قازاقستان جانە اباي وبلىستارىنىڭ قيىر سولتۇستىگىندە)، ەلدىڭ وڭتۇستىك وڭىرلەرىندە - نورمادان از بولۋى بولجانادى (ەلدىڭ وڭتۇستىگىنىڭ جارتىسىندا جانە قاراعاندى مەن ۇلىتاۋ وبلىسىنىڭ قيىر وڭتۇستىگىندە).

قىستا اۋا رايى

كونسۋلتاتيۆتىك بولجامعا سايكەس، قىستا تەمپەراتۋرا رەجيمى كليماتتىق نورما شەگىندە بولجانادى، جاۋىن- شاشىن كوپجىلدىق نورمادان اسادى. الايدا جاۋىن-شاشىننىڭ توقتاۋىمەن جانە تەمپەراتۋرانىڭ ءانومالدى تومەن فونىمەن (سولتۇستىك، ورتالىق جانە شىعىس ايماقتاردا تۇندە 30-45-گرادۋس اياز، ەلدىڭ باتىسى مەن وڭتۇستىگىندە 25-35-گرادۋس اياز) سيپاتتالاتىن كەزەڭدەر ىقتيمالدىعى جوققا شىعارىلمايدى.

قىستىڭ العاشقى ەكى ايى جەلتوقسان جانە قاڭتاردا قازاقستاننىڭ باسىم بولىگىندە اۋا تەمپەراتۋراسى نورما شاماسىندا دەپ بولجانادى، تەك قاڭتاردا ەلدىڭ باتىسىندا، سولتۇستىك- باتىسىندا نورمادان 1 گرادۋس جوعارى بولادى دەپ كۇتىلىپ وتىر (باتىس قازاقستان، اتىراۋ، ماڭعىستاۋ وبلىستارىندا، اقتوبە وبلىسىنىڭ باسىم بولىگىندە، قوستاناي وبلىسىنىڭ سولتۇستىك- باتىسىندا).

جەلتوقسان ايىندا جاۋىن-شاشىن مولشەرى:

رەسپۋبليكانىڭ باسىم بولىگىندەگى نورمادان كوپ دەپ بولجانىپ وتىر؛

باتىس قازاقستان، اقتوبە، قىزىلوردا، ۇلىتاۋ وبلىستارىندا، تۇركىستان وبلىسىنىڭ باسىم بولىگىندە، اتىراۋ وبلىسىنىڭ سولتۇستىگىندە، قوستاناي، اقمولا وبلىستارىنىڭ وڭتۇستىگىندە، قاراعاندى جانە جامبىل وبلىستارىنىڭ سولتۇستىك-باتىسىندا نورما شاماسىندا كۇتىلەدى؛

ماڭعىستاۋ وبلىسىندا، اتىراۋ وبلىسىنىڭ باسىم بولىگىندە، اقتوبە وبلىسىنىڭ وڭتۇستىك-باتىسىندا نورمادان از بولجانىپ وتىر.

قاڭتار ايىندا جاۋىن-شاشىن مولشەرى:

رەسپۋبليكانىڭ باسىم بولىگىندە نورما شاماسىندا بولادى دەپ كۇتىلىپ وتىر؛

سولتۇستىك قازاقستان، شىعىس قازاقستان وبلىستارىندا، اقمولا، پاۆلودار وبلىستارىنىڭ باسىم بولىگىندە، قوستاناي وبلىسىنىڭ سولتۇستىك-شىعىسىندا، اقتوبە وبلىسىنىڭ وڭتۇستىك-باتىسىندا، قىزىلوردا وبلىسىنىڭ باتىسىنىڭ جارتىسىندا نورمادان كوپ كۇتىلەدى؛

باتىس قازاقستان، اتىراۋ جانە ماڭعىستاۋ وبلىستارىنىڭ باسىم بولىگىندە نورمادان از بولجانىپ وتىر.

اقپان ايىندا رەسپۋبليكانىڭ باسىم بولىگىندە اۋا تەمپەراتۋراسى نورمادان 1 گرادۋس جوعارى، ەلىمىزدىڭ سولتۇستىك ايماقتارىندا نورما شاماسىندا بولجانادى. بەلسەندى تسيكلوندار اسەرىنەن جاۋىن-شاشىن ەلىمىزدىڭ كوپتەگەن ايماقتارىندا نورمادان اسىپ تۇسەدى، جاۋىن-شاشىن رەسپۋبليكانىڭ وڭتۇستىك-باتىس جارتىسىندا كليماتتىق نورما شەگىندە بولجانادى.

ناۋرىز ايىنىڭ اۋا رايى

ناۋرىز - قىس پەن كوكتەم اراسىنداعى وتپەلى كەزەڭ، جىلى كۇندەردەن كەيىن اياز بەن قالىڭ قار قايتالانۋى مۇمكىن.

الدىن الا بولجام بويىنشا ناۋرىز ايىندا تەمپەراتۋرا ەلىمىزدىڭ باسىم بولىگىندە نورمادان 1 گرادۋس جوعارى، رەسپۋبليكانىڭ وڭتۇستىك-شىعىس جارتىسىندا نورما شاماسىندا بولادى دەپ كۇتىلىپ وتىر.

ناۋرىز ايىندا جاۋىن-شاشىن مولشەرى رەسپۋبليكانىڭ باسىم بولىگىندە نورمادان كوپ، قىزىلوردا، ۇلىتاۋ، قاراعاندى وبلىستارىندا، اقتوبە، تۇركىستان، جامبىل وبلىستارىنىڭ باسىم بولىگىندە، اتىراۋ، قوستاناي، اقمولا وبلىستارىنىڭ وڭتۇستىگىندە، اباي وبلىسىنىڭ وڭتۇستىك- باتىسىندا، ماڭعىستاۋ، الماتى وبلىستارىنىڭ سولتۇستىگىندە، جەتىسۋ وبلىسىنىڭ سولتۇستىك- باتىسىندا نورما شاماسىندا، ماڭعىستاۋ وبلىسىنىڭ باسىم بولىگىندە نورمادان از كۇتىلەدى.