بيىل ءتۇرلى ماماندىقتارعا وقۋعا ءتۇسۋدىڭ شەكتى بالى بەلگىلى بولدى

استانا. قازاقپارات - عىلىم جانە جوعارى ءبىلىم مينيسترلىگى بيىل مەكتەپ بىتىرەتىن وقۋشىلار ج و و-عا ءتۇسۋ ءۇشىن ۇلتتىق ءبىرىڭعاي تەستىلەۋدەن قانشا بال جيناۋ كەرەگىن مالىمدەدى. بۇل تۋرالى Stan.kz اقپارات اگەنتتىگى حابارلايدى.

 

2024 -جىلى جوعارى وقۋ ورىندارىنا ءتۇسۋدىڭ شەكتى بالى بەلگىلى بولدى.

. ج و و-عا نەگىزگى باعىتتار بويىنشا شەكتى بالى - 50 بال؛

. ۇلتتىق جوعارى وقۋ ورىندارىنا ءتۇسۋ ءۇشىن - 65 بال؛

. دەنساۋلىق ساقتاۋ جانە الەۋمەتتىك قامسىزداندىرۋ (مەديتسينا)» ماماندىعى بويىنشا - كەمىندە 70 بال؛

. «قۇقىق» جانە «پەداگوگيكا عىلىمدارى» ءبىلىم بەرۋ باعدارلامالارى بويىنشا شەكتى بال - 75 بال؛

. «اۋىل شارۋاشىلىعى جانە بيورەسۋرستار»، «ۆەتەريناريا» ءۇشىن - كەمىندە 60 بال.

شىعارماشىلىق ەمتيحان تاپسىراتىندار وقۋ ساۋاتتىلىعى مەن ماتەماتيكالىق ساۋاتتىلىقتان كەمىندە 3 بال جانە قازاقستان تاريحى پانىنەن 5 بال جيناۋى ءتيىس. ياعني كەمىندە 11 بال جيناۋى قاجەت.

مينيسترلىك جوعارى ءبىلىم بەرۋ بويىنشا 2024-2025 وقۋ جىلىنا ارنالعان گرانتتاردىڭ ءتىزىمىن جاريالادى. بيىل جوعارى وقۋ ورىندارىندا وقۋعا 112 مىڭ گرانت بولىنگەن. سونىڭ ىشىندە باكالاۆرياتقا ءتۇسۋ ءۇشىن 79 مىڭ، ماگيستراتۋراعا 13 مىڭعا جۋىق، دوكتورانتۋراعا تۇسۋگە 1900-تان استام گرانت ءبولىندى.

. «ينجەنەرلىك، وڭدەۋ، قۇرىلىس سالالارى» ءبىلىم بەرۋ باعدارلاما توپتارىنا - 19344،

. «پەداگوگيكالىق عىلىمدارعا» - 13735،

. «اقپاراتتىق- كوممۋنيكاتسيالىق تەحنولوگيالار» سالاسىنا – 10903،

. «جاراتىلىس تانۋ عىلىمدارى، ماتەماتيكا جانە ستاتيستيكا» باعىتىنا - 8288 گرانت تيەسىلى.

بيىل العاش رەت ءىشىنارا وقۋ اقىسى بار گرانتتار ەنگىزىلدى. «پەداگوگيكالىق عىلىمدار» جانە «الەۋمەتتىك عىلىمدار، جۋرناليستيكا جانە اقپارات» بويىنشا 150 سارالانعان گرانتتان بولىنگەن.

«سەرپىن» باعدارلاماسى ارقىلى تۇسۋشىلەرگە 3903 گرانت بولىنگەن. «سەرپىن» جوباسى ارقىلى پەداگوگيكالىق عىلىمدار، ينجەنەرلىك- تەحنيكالىق، اقپاراتتىق تەحنولوگيالار، اۋىلشارۋاشىلىعى ماماندىقتارى بويىنشا وقۋعا تۇسۋگە بولادى. باعدارلاماعا وڭتۇستىك وڭىردەگى اۋىل جاستارى قاتىسادى. وقۋ بىتىرگەسىن گرانت وتەۋ مەرزىمى 3 جىلدان 2 جىلعا قىسقارتىلدى. ەندى گرانتتى 11 ايماقتا وتەۋ مۇمكىندىگى بار»، - دەپ مالىمدەدى عىلىم جانە جوعارى ءبىلىم مينيسترلىگىنىڭ باسپا ءسوز قىزمەتى.

باتىس وڭىرلەردىڭ جاستارىن جەتەكشى جوعارى وقۋ ورىندارىندا وقىتۋ ءۇشىن ماقساتتى ءبىلىم گرانتتارى بار. ولار اتىراۋ جانە ماڭعىستاۋ وبلىسى تۇلەكتەرىنە ارنالعان.

2024-2025 وقۋ جىلىنا اتالمىش وبلىس تالاپكەرلەرى ءۇشىن 3200 گرانت بولىنگەن. نەگىزگى جاڭاشىل باسىمدىقتارى پەداگوگيكالىق، ونەر جانە گۋمانيتارلىق، IT، الەۋمەتتىك، ەكونوميكالىق، قۇقىق، ينجەنەرلىك سىندى دايىندىق باعىتتارىنىڭ تىزبەسى كەڭەيتىلگەن.

سونىمەن قاتار قىسقارتىلعان ءبىلىم بەرۋ باعدارلامالارى بويىنشا كوللەدج تۇلەكتەرىنە گرانتتار كونكۋرسىنا قاتىسۋ مۇمكىندىگى ۇسىنىلعان. وسىلايشا ماڭعىستاۋ جانە اتىراۋ وبلىستارىنىڭ تالاپكەرلەرى ەلىمىزدىڭ 40 تان استام جەتەكشى جوعارى وقۋ ورىندارىندا ءبىلىم الا الادى.

ەسكە سالساق، بۇعان دەيىن مەملەكەتتىك ءبىلىم بەرۋ گرانتتارىنىڭ ءتىزىمى جاريالاندى.