بۇگىن 20-تامىز - دۇنيەجۇزىلىك جالقاۋلىق كۇنى: مەرەكەنىڭ تاريحى مەن ءمانى قانداي؟
استانا. قازاقپارات - 20-تامىز - دۇنيەجۇزىلىك جالقاۋلىق كۇنى. بۇل بەيرەسمي ءارى ءازىل-قالجىڭعا تولى مەرەكە بولسا دا، الەمنىڭ كوپتەگەن ەلدەرىندە تويلانادى ەكەن.
بۇل مەرەكە 40 جىل بۇرىن، 1984 -جىلى كولۋمبيانىڭ يتاگۋي قالاسىندا وتكەن ونەركاسىپ، ساۋدا جانە مادەنيەت فەستيۆالىنىڭ جابىلۋ راسىمىندە تويلانا باستاعان. ءىس-شارادان كەيىن ۇيىمداستىرۋشىلار قاتىسۋشىلارعا جالقاۋلىق كۇنىن اتاپ ءوتۋدى - جۇمىس ىستەمەي، راحاتتانىپ دەمالۋدى ۇسىنعان. ويتكەنى اۋىر ەڭبەكتەن كەيىن ءار ادام ازداپ دەمالۋعا لايىق ەكەنى ايتىلعان.
جالقاۋلىق مەرەكەسىن تويلاۋ يدەياسى فەستيۆال قاتىسۋشىلارى مەن قالا تۇرعىندارىنا ۇناپ، ونى جىل سايىن تويلاۋدى داستۇرگە اينالدىرعان. ۋاقىت وتە كەلە مەرەكە حالىقارالىق دەڭگەيگە جەتتى.
ايتا كەتۋ كەرەك، مەرەكە پايدا بولعان فەستيۆال 12 جىلدان بەرى وتكىزىلمەيدى. ال دۇنيەجۇزىلىك جالقاۋلىق كۇنى ءالى دە بار. مەرەكە وتانى - كولۋمبيادا ونى سالتاناتتى تۇردە اتاپ وتەدى، حالىق دەمالادى. دەگەنمەن بۇل رەسمي مەرەكە ەمەس، سوندىقتان جەرگىلىكتى تۇرعىندار ونى جۇمىستان كەيىن نەمەسە دەمالىس كۇندەرى عانا تويلاي الادى.
مەرەكەنىڭ باستى يدەياسى - بارىنشا تىنىعىپ، اسىقپاي، ۋايىمسىز دەمالۋ، سونداي-اق وتباسى، دوس-جارانمەن ۋاقىت وتكىزۋ.