باعاسى 3-15 ميلليون تەڭگەگە دەيىن: استاناداعى جەكەمەنشىك مەكتەپتەردە وقۋ قۇنى قانشا

جاڭا وقۋ جىلى باستالار الدىندا اتا-انالار بالاسىن مەكتەپكە دايىنداپ، كيىمىن ىزدەپ، كىتاپ- داپتەرىن قامداپ جاتىر. جاڭا وقۋ جىلىنا دايارلىق ەلوردا دا قىزۋ. وسى رەتتە Ulysmedia.kz ءتىلشىسى ەلورداداعى جەكەمەنشىك مەكتەپتەردە وقۋ قۇنى قانشا ەكەنىن انىقتاپ، جاڭا وقۋ جىلىندا ول مەكتەپتەردە وقۋ قۇنى قانشالىقتى وزگەرگەنىن شولىپ شىقتى.

قالادا قانشا جەكەمەنشىك مەكتەپ بار

استانادا جالپى ءبىلىم بەرەتىن 180-گە جۋىق مەكتەپ بولسا، سونىڭ 71 - جەكەمەنشىك، جەتەۋى - رەسپۋبليكالىق ماڭىزى بار مەكتەپ. جەكەمەنشىك مەكتەپتەردە 40 مىڭنان استام وقۋشى وقيدى.

ەلوردادا جەكەمەنشىك مەكتەپتەر كەيىنگى 5 جىلدا جاڭبىردان كەيىنگى ساڭىراۋقۇلاقشا كوبەيدى. حالىقارالىق مەكتەپتەر فيليالىن اشىپ، جەكە ينۆەستورلار قاراجاتىن وسى سالاعا سالعاندا مەملەكەت «كەت» دەگەن جوق - ءاردايىم بالالارى سىيماي جاتاتىن مەكتەپ ماسەلەسىن رەتتەۋدىڭ ءبىر امالى دەپ قاراستىردى.

ادەتتە، جەكەمەنشىك مەكتەپتەردە وقۋشىنىڭ كيىم-كەشەگى، وقۋلىقتارى، تاماقتاندىرۋىنا قاراي اقى ءارتۇرلى بولادى.

Ulysmedia.kz پورتالىنا استانا قالاسىنىڭ ءبىلىم باسقارماسى جەكەمەنشىك مەكتەپتەردىڭ ءتىزىمىن جولدادى.

ەڭ قىمبات مەكتەپتەر

ەلوردادا وقۋ اقىسى ەڭ قىمبات مەكتەپتىڭ ءبىرى - QSI. مۇندا بالانى وقىتۋ ءۇشىن ايىنا شامامەن 1 ميلليون تەڭگەدەن ارتىق اقشا تولەۋ كەرەك. بالانى بەس جاستان باستاپ قابىلدايتىن مەكتەپتە وقۋ قۇنى جىلىنا - 28200 ا ق ش دوللار. تەڭگەمەن ەسەپتەگەندە 13,5 ميلليون. بىلتىر وقۋ قۇنى - 12 ميلليون تەڭگە بولعان.

استاناداعى QSI حالىقارالىق مەكتەبى Quality Schools International ۇيىمىنىڭ قۇرامىندا ءارى وقۋشىنى جوعارى وقۋ ورىندارىنا تۇسۋگە دايىندايدى. 2005 -جىلدىڭ قىركۇيەگىندە قۇرىلعان QSI حالىقارالىق مەكتەبىندە بالالار تەك اعىلشىن تىلىندە وقىتىلادى. وقۋ باعدارلاماسى امەريكالىق AP Capstone Diploma Program باعدارلاماسىنا نەگىزدەلگەن.

Haileybury Astana

Haileybury Astana حالىقارالىق مەكتەبىندە دايىندىق سىنىبىنان باستاپ، 13-سىنىپقا دەيىن ءبىلىم بەرىلەدى. وقۋ ورداسىنىڭ بالاباقشاسى دا بار. ماسەلەن، بالانى 2 جاس ءۇش ايدان باستاپ Haileybury مەكتەبى 3,9 ميلليون تەڭگە الادى. دايارلىق سىنىبىنا 6,9 ميلليون تەڭگە تولەۋ كەرەك بولسا، 1-2-سىنىپ ءۇشىن اقى 10 ميلليون تەڭگە، 3-6-سىنىپ ارالىعى 11,8 ميلليون تەڭگە، 7-9-سىنىپ ارالىعى 13,5 ميلليون تەڭگە، 10-11-سىنىپ ارالىعىنداعى بالالار ءۇشىن 14,8 ميلليون تەڭگە تولەۋگە تۋرا كەلەدى.

بىلتىر جوعارى سىنىپتاعى بالالار ءۇشىن وقۋ قۇنى 13,3 ميلليون تەڭگە بولعان. ياعني، Haileybury باعانى بيىل كوتەرىپ جاتىر.

Spectrum حالىقارالىق مەكتەبى

بۇل مەكتەپتە جىلدىق وقۋ قۇنى مىناداي: 1-5-سىنىپتار ءۇشىن - 7,2 ميلليون تەڭگە، 6-8- سىنىپتارعا - 7,59 ميلليون تەڭگە، 9-12-سىنىپتار ءۇشىن 7,98 ميلليون تەڭگە. بىلتىرعا قاراعاندا بۇل مەكتەپتە جىلدىق وقۋ قۇنى شامامەن 700 مىڭ تەڭگەگە قىمباتتاعان.

مەكتەپ 2008 -جىلى «نۇروردا» حالىقارالىق مەكتەبى اتاۋىمەن اشىلعان (2017 -جىلى اتاۋى وزگەرگەن). 2011 -جىلى كەمبريدج حالىقارالىق ستاندارتىنا يە بولعان. 2014 -جىلدان باستاپ حالىقارالىق مەكتەپ مارتەبەسىنە يە.

Ardingly Astana

بريتانيانىڭ دەربەس وقۋ ورنى Ardingly College مەكتەبىنىڭ فيليالى - Ardingly Astana مەكتەبى كەمبريدج وقۋ باعدارلاماسى بويىنشا ءبىلىم بەرەدى. مەكتەپ سايتىندا ونىڭ تۇلەكتەرى جىل سايىن Cambridge, Oxford, ايۆي ليگاسى ۋنيۆەرسيتەتتەرىنە تۇسەتىنى جازىلعان. بۇل مەكتەپتە وقۋ قۇنى 9-10 ميلليون تەڭگە. الايدا ەرتەرەك تىركەلىپ، اقىسىن تولەگەندەرگە 10-20 پايىز ارالىعىندا جەڭىلدىك بەرىلەدى.

Canadian حالىقارالىق مەكتەبى

بۇل ءبىلىم ورداسىندا وقىتۋدىڭ جالپى جىلدىق قۇنى 5775000 تەڭگە. ونى جىل بويى ءۇش ءبولىپ تولەتەدى. بىردەن تولەگەن اتا-اناعا 10 پايىزدىق جەڭىلدىك بەرىلەدى. بۇل – ۇلى بريتانيا مەن قازاقستانداعى كامپۋستارى ارقىلى بريتان ءبىلىم بەرۋ جۇيەسىنە ءبىلىم بەرۋدى ۇسىناتىن تاۋەلسىز مەكتەپ. بىلتىرعا قاراعاندا بۇل مەكتەپتە وقۋ قۇنى 275000 تەڭگەگە قىمباتتاعان.

مەكتەپ 2008 -جىلى جۇمىسىن باستاعان.

Astana Garden school

حالىقارالىق باعدارلاما بويىنشا وقىتاتىن Astana Garden مەكتەبىنە بالانى اۋەلى تىركەۋ ءۇشىن 500 مىڭ تەڭگە الادى. بالاڭىزدى 1-6-سىنىپ ارالىعىندا وقىتۋ ءۇشىن بۇل مەكتەپتە 4,1 ميلليون تەڭگە، 7-8-سىنىپ ءۇشىن 4,95 ميلليون تەڭگە، 9-سىنىپتا وقىتۋ ءۇشىن 5,5 ميلليون تەڭگە، 10-11-سىنىپتا وقىتۋ ءۇشىن 6,6 ميلليون تەڭگە تولەۋ كەرەك. بىلتىردان بەرى بۇل مەكتەپتە وقۋ قۇنى قىمباتتاعانى بايقالمايدى.

Astana Garden مەكتەبى 0-دەن 6-سىنىپقا دەيىنگى بالالاردى ءۇش تىلدە وقىتادى. جوعارى سىنىپتاردا الەمنىڭ ۇزدىك جوعارى وقۋ ورىندارىنا جانە نازاربايەۆ ۋنيۆەرسيتەتىنە ءتۇسىرۋ ءۇشىن ناتيجەلى باعدارلى دايىندىق جۇرگىزەدى.

Miras حالىقارالىق مەكتەبى

اتالعان مەكتەپتە وقۋ قۇنى تومەنگى جانە جوعارى سىنىپتارعا دەيىن 3,3 ميلليون تەڭگەدەن باستاپ 6,7 ميلليون تەڭگەگە دەيىن بارادى.

حالىقارالىق مەكتەپتىڭ نەگىزىن نۇرسۇلتان نازاربايەۆتىڭ ءبىلىم قورى قالاعان. «ميراس» استانادا 1999 -جىلى قۇرىلعان. مەكەمەنىڭ قابىرعالارىندا بەس جىلدىق بالالار مۋزىكالىق مەكتەبى مەن فرانسۋز مەكتەبى جۇمىس ىستەيدى.

استانا حالىقارالىق مەكتەبى

ءبىلىم ورداسى 2013 -جىلى اشىلعان. سول جىلى مەكتەپتە 4-سىنىپ پەن 10 مۇعالىم بولسا، قازىر مەكتەپتە ءبىلىم الۋشىلاردىڭ سانى 1200-دەن اسادى. قازاقستان ازاماتتارىنا وقۋ قۇنى 2,7-4 ميلليون تەڭگە ارالىعىندا بولسا، قازاقستان ازاماتتىعى جوق ازاماتتاردىڭ بالالارىنا وقۋ قۇنى 4,2-6,2 ميلليون تەڭگە ارالىعىندا.

Riviera School

Riviera International School-دا وقۋ قۇنى - 4140000 تەڭگە. رەسمي سايتىندا بىلتىردان بەرى تۇرعان بۇل سوما وزگەرمەپتى.

RIS- تەگى ءبىلىم بەرۋ پروتسەسى ءۇش تىلدە: قازاق، ورىس جانە اعىلشىن تىلدەرىندە جۇرگىزىلەدى. سونىمەن قاتار، RIS- تە وقۋشىلاردىڭ كىنشى شەت تىلدەرىن ۇيرەنۋگە مۇمكىندىگى بار، بۇل ولاردىڭ ەۋروپا، ازيا جانە امەريكانىڭ ۇزدىك شەتەلدىك ۋنيۆەرسيتەتتەرىنە ءتۇسۋ جانە باسەكەگە قابىلەتتى بولۋ مۇمكىندىگىن ارتتىرادى.

Nurorda

Nurorda مەكتەبىندە 1-سىنىپتا بالانى وقىتۋ ءۇشىن 4370000 تەڭگە (655000+ - كۇنىنە ءۇش مەزگىل تاماقتانۋ)، 2-3-سىنىپتا وقىتۋ ءۇشىن 4180000 تەڭگە، 4-سىنىپ ءۇشىن 3960000 تەڭگە، 5-سىنىپ ءۇشىن 3740000 تەڭگە، 6-سىنىپ ءۇشىن 3610000 تەڭگە، 7-11-سىنىپتار ءۇشىن 3960000 تەڭگە تولەۋ كەرەك. كورسەتىلگەن باعاعا وقۋ اقىسى، مەكتەپ فورماسى، وقۋلىقتار، ۇيىرمەلەر كىرەدى.

بىلتىردان بەرى اتالعان ءبىلىم ورداسىندا وقۋ قۇنى شامامەن سىنىپتارىنا قاراي 100-200 مىڭ تەڭگەگە قىمباتتاعان.

مەكتەپ 2007 -جىلى اشىلعان. «ءبىلىم وردا» حالىقارالىق قورىنا قارايدى.

New Generation مەكتەبى

New Generation مەكتەبى بىلتىردان بەرى وقۋ قۇنىن 450 مىڭ تەڭگەگە قىمباتتاتقان. ول مەكتەپتە بالانى وقىتۋ ءۇشىن جىلىنا 4245000 تەڭگە تولەۋ كەرەك. العاشقى تىركەۋ قۇنى - 500 مىڭ تەڭگە.

New Generation مەكتەبى رەسمي سايتىندا وقۋشىنى كرەاتيۆتى ويلاپ، جاڭا جوبالار مەن باعدارلامالاردى ازىرلەۋگە باۋليتىنىن جازادى.

Tamos Space school

Tamos Space مەكتەبىندە سىنىبىنا قاراي وقۋ قۇنى ءارتۇرلى. العاشقى تىركەۋگە مەكتەپ اكىمشىلىگى 300 مىڭ تەڭگە الادى. 1-4-سىنىپقا (قازاق سىنىپتارىنا) دەيىن مۇندا جىلدىق وقۋ قۇنى 3,07 ميلليون تەڭگە بولسا، ورىس تىلىندەگى 1-7-سىنىپقا دەيىنگى وقۋشىلارعا وقۋ قۇنى 3,6 ميلليون تەڭگە. 8-10-سىنىپقا دەيىن وقۋشىلارعا 3,8 ميلليون تەڭگە. بۇل باعاعا تاماقتانۋ، وقۋ ماتەريالى (وقۋلىقتار، جۇمىس داپتەرلەرى جانە باسقالار)، وقۋشىنىڭ ءوزىن-ءوزى دامىتۋعا ارنالعان ينتەراكتيۆتى پلاتفورمالار جانە وقۋ پروتسەسىنىڭ ءوزى كىرەدى.

جەكەمەنشىك مەكتەپتىڭ قانداي ەرەكشەلىگى بار

جەكەمەنشىك مەكتەپتەردىڭ مەملەكەتتىك مەكتەپتەردەن ارتىقشىلىعىن ءبىلۋ ماقساتىندا بەلگىلى ساراپشى، ۇلتتىق مەكتەپتەر جوباسىنىڭ جەتەكشىسى اياتجان احمەتجانعا قوڭىراۋ شالعانبىز. ول اتا-انالار بالالارىن وقىتقاندا بىرىنشىدەن، ساپالى ءبىلىم، ەكىنشىدەن قولايلى جاعداي ءۇشىن اقشا تولەيتىنىن ايتادى.

- شىنى كەرەك، مەملەكەتتىك مەكتەپتەردە شارتتى جاعداي جوقتىڭ قاسى. ءبىر سىنىپتا 40 بالا وقيدى، ەكى نەمەسە ءۇش اۋىسىمدا وقۋ جالعاسا بەرەدى. زەرتحانالارى سۇراق تۋعىزادى. جەكەمەنشىك مەكتەپتەردە ءبىر سىنىپتا ەڭ كوپ دەگەندە - 20 بالا. سونىمەن قاتار، قىمبات مەكتەپتەردە حالىقارالىق ستاندارتتارعا ساي مەكتەپ باعدارلاماسىنان تىسقارى ءارتۇرلى ءپان بار. ماتەريالدىق شارت جاعدايى، زەرتحانا، باسسەينىنەن باستاپ ءارتۇرلى سپورت ۇيىرمەلەرىنە دەيىن قامتىلعان، - دەيدى ساراپشى.

ءىرى قالالاردا مەملەكەت سۋبسيدياسىنا كۇن كورىپ وتىرعان جەكەمەنشىك مەكتەپتەر دە بار. ولار دا وقۋشىلاردى ەكى اۋىسىمدا وقىتادى. اياتجان احمەتجاننىڭ سوزىنشە، جەكەمەنشىك مەكتەپتەردىڭ كەيبىرىندە كۇنىنە ءتورت ۋاقىت تاماق بەرىلەدى. ماسەلەن، مەملەكەتتىك مەكتەپتىڭ بالاسى جارتى كۇن مەكتەبىندە جۇرسە، تۇستەن كەيىن باسقا جەردەگى ۇيىرمەلەرگە، قوسىمشا ءبىلىم بەرۋ ۇيىمدارىنا بارادى. ال جەكەمەنشىك مەكتەپتەردە ءبارى ءبىر جەردە قامتىلعان.

ايتسە دە، مەملەكەتتىڭ مەكتەپتەرگە بەلگىلەپ بەرگەن ستاندارتى بار. ونى جەكەمەنشىك مەكتەپتەر دە ورىنداۋعا مىندەتتى. ال ودان تىس باعدارلامانى جەكەمەنشىك مەكتەپتەر وقۋشىلارعا ۇسىنا الادى. ياعني، مەملەكەت اپتاسىنا «24 ساعات بالا وقۋى ءتيىس» دەپ تالاپ قويسا، مەكتەپتەر سونى ورىندايدى. 24 ساعاتتان تىس نە وقىتادى - ءوزى بىلەدى.

جەكەمەنشىك مەكتەپتەر - بيزنەس كوزىنە اينالىپ كەتكەن جوق پا

بۇل سۇراققا جاۋاپ بەرگەن اياتجان احمەتجان مەملەكەتتىڭ ستاندارتتى تالاپ ەتسە، سونىڭ قاداعالانۋىن دا مەملەكەتتىك مەكتەپتەي باقىلاۋى ءتيىس دەپ ەسەپتەيدى. ەكىنشىدەن، اتا-انالاردىڭ ساۋاتتىلىعى ماڭىزدى.

- ەگەر ءبىز وتاندىق جەكەمەنشىك مەكتەپتەردى قولداي الماساق، شەتەلدىك جەكەمەنشىك مەكتەپتەردىڭ تابىسىنا جۇمىس ىستەپ كەتەمىز. مىسالى، جىلىنا 15 ميلليون تەڭگە الاتىن مەكتەپتە كەمى 800 بالا وقيدى. ال ول مەكتەپتىڭ قۇرىلتايشىسى - باسقا ەلدە. بۇل مەملەكەتتىڭ ەكونوميكاسىنىڭ سىرتقا شاشىلۋى.

يدەولوگيا ماسەلەسى بار. شەتەلدىك مەكتەپتەردىڭ فيليالى ءبىزدىڭ ەلدە كوپتەۋ ءارى ولار قىمباتتاۋ. ولار كوبىندە اعىلشىن جانە ورىس ءتىلدى مەكتەپتەر. ولاردىڭ يدەولوگيالىق ماسەلەسىمەن كىم اينالىسادى دەگەن سۇراق تۋادى. ال قازاق ءتىلدى ورتا اقىلى مەكتەپتى ءالى تولىق قابىلداپ ۇيرەنگەن جوق. مويىنداۋ كەرەك. استانادا جەكەمەنشىك 60-تان اسا مەكتەپتىڭ تەك بەسەۋى قازاقشا. ال 5-11-سىنىپ اراسىندا تازا قازاقشا وقىتاتىن بىزدىكىنەن (QAZBILIM) باسقا تازا قازاق مەكتەبى جوق. سوندىقتان، يدەولوگيا - ويلاناتىن ماسەلە، - دەيدى ول.

ساراپشى جەكەمەنشىك مەكتەپكە ليتسەنزيا بەرەتىن كەزدە ولارعا قازاق سىنىبىن اشۋ جونىندە تالاپ قويۋ كەرەكتىگىن اتاپ وتەدى.