اتىراۋ تۇرمەسىندە ەسىرتكى قىلمىسىمەن سوتتالعان 33 ايەل جازاسىن وتەپ ءجۇر

اتىراۋداعى ايەلدەر تۇرمەسىندە ءتۇرلى قىلمىس جاساعاندار جازاسىن وتەپ ءجۇر. ولاردىڭ اراسىندا ەسىرتكى قىلمىسىمەن سوتتالعان 33 ايەل بار، دەپ حابارلايدى Kazinform.

وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بىلتىر ەسىرتكى قىلمىسىنىڭ الدىن الۋ ءۇشىن 671 ءىس-شارا وتكىزىلگەن.

ەسىرتكى جانە پسيحوتروپتىق زاتتاردى تاراتۋ تۋرالى اقپاراتتى قامتيتىن كونتەنتى بار 108 سايت پەن باسقا رەسۋرستار بۇعاتتالعان.

«ادامزاتتىڭ بولاشاعىنا بالتا شاباتىن ءقاۋىپتىڭ قاتارىندا ەسىرتكىمەن بايلانىستى قىلمىس تا بار. اسىرەسە، ورىمدەي جاسوسپىرىمدەردىڭ ەسىرتكىنىڭ قۇربانىنا اينالعانى الاڭداتادى. ادام اعزاسىنا تيگىزەر زيانى مەن زاردابىن بىلسە دە ەسىرتكىنى تۇتىنۋشىلاردىڭ سانى ازايار ەمەس. ەسىرتكىگە تاۋەلدىلىكتىڭ سوڭى قىلمىس جاساۋعا ۇلاسادى. اتىراۋداعى تۇرمەدە ەسىرتكى، پسيحوتروپتىق جانە سول تەكتەس زاتتاردى زاڭسىز وتكىزىپ، دايىنداعانى، تاسىمالداعانى، سونداي-اق، ساقتاعانى ءۇشىن ءار وڭىردەن سوتتالعان 33 ايەل جازاسىن وتەپ ءجۇر. سوتتالۋشىلاردىڭ جاسى - 19 بەن 40 تىڭ اراسىندا. سوت ۇكىمىمەن ولارعا 5 جىلدان 19 جىلعا دەيىن باس بوستاندىعىنان ايىرۋ جازاسى بەرىلگەن» دەپ حابارلادى دەپارتامەنتتىڭ باسپا ءسوز قىزمەتى.

ەسكە سالا كەتەلىك، بۇدان بۇرىن اتىراۋ وبلىسىندا ءبىر جىلدا 65 ەسىرتكى قىلمىسى تىركەلگەنىن حابارلاعان بولاتىنبىز.