اۋسترالياعا دومبىرانى تاپسىرىسپەن الدىرتتىم - مارك يستون
استانا. قازاقپارات - سىزدەر بۇگىندە اۋستراليا تۋرالى كوپ دەرەك بىلمەيسىزدەر. سەبەبى بىزدە راسىمەن سىزدەردەگىدەي باي مادەنيەت جوق. سىزدەردە شىنىمەن باي مادەنيەت بار.
بۇگىندە Instagram جەلىسىندەگى كوپشىلىك پرەزيدەنت وركەسترىنىڭ «رۋح»، «تۇران» ەتنو- فولكلورلىق انسامبلىنىڭ «ەر تۇران»، HasSak توبىنىڭ «امانات» سەكىلدى رۋحتى شالقىتاتىن كومپوزيتسيالارىن ءجيى قولدانادى. كەيىنگى كەزدە بۇل قاتارعا «Kazakhstan» تۋىندىسى قوسىلدى. اسىرەسە، ول بوكس كەشتەرىندە بىلعارى قولعاپ شەبەرلەرى شارشى الاڭعا بەتتەپ كەلە جاتقان كەزدە ءجيى قويىلاتىن بولدى.
كوپشىلىك بۇل تۋىندىنى قازاقستاندىق سازگەردىكى دەپ ويلاپ جۇرسە كەرەك. ال نەگىزىندە ونى اۋستراليادا تۇراتىن مۋزىكانت ءارى كومپوزيتور مارك يستون جازعان. جۋىردا الماتىعا كەلىپ، «Almaty» شىعارماسىن جارىققا شىعارعان مارككە حابارلاسىپ، اڭگىمەگە تارتقان ەدىك.
- بۇگىندە ا ق ش-تا دومبىرانىڭ ۇنىنە ەلىتىپ، قازاقستانعا ارنايى كەلىپ، ساباق الىپ جۇرگەن امەريكالىق مۋزىكانتتار جەتەرلىك. مەن ءسىزدى ءدال سولار سەكىلدى ءبىزدىڭ ءداستۇرلى ونەرگە قىزىققان امەريكالىق بولار دەسەم، اۋستراليا تۋماسى ەكەنسىز. جەر شارىنداعى ەڭ كىشى ماتەريك تۇرعىندارىنىڭ ۇلتتىق اسپابىمىزعا وسىنشالىق قىزىعاتىنىن بىلمەپپىز.
- مەنى امەريكالىق دەپ ويلادىڭىز با سوندا؟ (كۇلىپ). مەن - اۋستراليا تۋماسىمىن. اۋستراليانىڭ وڭتۇستىك- شىعىسىندا ورنالاسقان، سەرفينگى، جاعاجايىمەن تانىمال گولد-كوست قالاسىندا تۇرامىن. ۇلتتىق اسپاپتارىڭىزعا جاي عانا قىزىعىپ قويمايمىن، قاتتى قىزىعامىن. مەن - مۋزىكانتپىن. ەس بىلگەلى مۋزىكامەن شۇعىلدانامىن. روك، بليۋز، پانك-روك ستيلىندەگى مۋزىكامەن اۋەستەندىم. ال دومبىرانى قايدان ءبىلدىڭ دەسەڭىز، بىردە بىزدەگى تەلەارنالاردىڭ بىرىنەن كورسەتىلەتىن «اۋستراليا داۋىسى» شوۋىن كوزىم شالدى.
الەمدىك فورماتتاعى سايىس، ونداي باعدارلاما سىزدەردە دە بار شىعار. سول كەزدە موڭعوليالىق قاتىسۋشىنىڭ ءوزىنىڭ ءتول اسپابىن تارتا وتىرىپ، كورسەتكەن ونەرىنە ريزا بولدىم. وسىلايشا، موڭعولداردىڭ مۋزىكاسىنا «عاشىق» بولدىم. ونى زەرتتەپ جۇرگەندە دومبىرانىڭ ۇنىنە «تاپ» بولدىم. العاش ونى ەستىگەن كەزدە تاڭ-تاماشا بولعانىم سونشا، «مىناۋ قايدان شىعىپ جاتقان اۋەن؟»، «مىناۋ قانداي اۋەن؟» دەپ قايتا-قايتا تىڭداۋمەن بولدىم. دومبىرانىڭ ءۇنى قاتتى ۇنادى. موڭعولداردىڭ مۋزىكاسى ءالى دە ۇنايدى، الايدا قازاقتاردىڭ مۋزىكاسى الدەقايدا اۋەزدى، سازدى، سارىندى. دومبىرادان «توگىلەتىن» اسەم اۋەن، ادامنىڭ تۇلا بويىن شىمىرلاتىپ، وزگەشە كۇيگە ەنگىزەتىن قۇدىرەتى مەنى بەيجاي قالدىرمادى. وسىلايشا، دومبىرامەن ورىندالاتىن اندەردىڭ جانكۇيەرىنە اينالدىم. سوسىن 2020 -جىلى الەمدى پاندەميا جايلاعان كەزدە YouTube-تان قازاق مۋزىكاسى تۋرالى دەرەكتەر ىزدەستىرە باستادىم.
سول كەزدە « ۇلىتاۋ»، HasSak، «تۇران» سەكىلدى قازاقستاندىق توپتاردىڭ شىعارماشىلىعىمەن تانىستىم. ولارعا حات جازىپ، يدەيا الماستىم. « ۇلىتاۋدىڭ» دومبىراشىسى ماعان بار اقىلىن ايتىپ، كوپ كومەگىن تيگىزدى. ودان بولەك، تاعى باسقا ءدۇلدۇل دومبىراشىلار تۋرالى كوپ دەرەك ءبىلدىم. سودان سوڭ الماتىدا دومبىرا شەرتۋدى ونلاين ۇيرەتەتىن مامانمەن تانىسىپ، الەمنىڭ 20 ەلىنەن ۇيرەنگىسى كەلەتىندەرمەن بىرگە ودان بىرنەشە ساباق الدىم. ول ساباقتاردا دومبىرا تارتۋدىڭ نەگىزىن جەتە ءتۇسىندىم. سودان سوڭ ءارى قاراي ءوز بەتىمەن ۇيرەنەمىن دەپ شەشتىم. ويتكەنى مەن توپپەن بىرگە دامۋدى ەمەس، ءوز دارا جولىمدى سالىپ، جەكە بولمىسىمدى قالىپتاستىرعىم كەلدى. ەشكىمگە ۇقساعىم كەلمەدى. ءتۇرلى ستيلدى جانىما سەرىك ەتىپ جۇرگەندىكتەن، دومبىرامەن وزگەشە دۇنيە ازىرلەپ شىعارۋدى ماقسات ەتتىم.
بۇگىندە حيتكە اينالعان «Kazakhstan» تۋىندىسىنىڭ «قۇرىلىمىنا» زەر سالعان قازاقستانداعى كوپشىلىك ماعان حابارلاسىپ، «سەن مۇنى قالاي ىستەدىڭ؟» دەپ سۇرايدى. مەن باتىستىڭ گيتارا تارتۋ مادەنيەتىنە ەلىكتەپ وسكەن مۋزىكانتپىن. مەندە دومبىرانىڭ ءۇنىن ايرىقشا ەتەتىن ستيل بار. البەتتە، دومبىرا تارتۋدى ۇيرەنۋ ماعان چەللەنج بولدى. سەبەبى مەن بۇرىن-سوڭدى مۇنداي اسپاپتا ويناپ كورمەگەنمىن. ءسويتىپ، 3 جىل بۇرىن العاشقى دومبىرامدى ساتىپ الدىم. كۇن سايىن ويناپ، قولىمدى ۇيرەتىپ الدىم. ءتىپتى، توقتاماي، ۇزاق ۋاقىت شەرتكەن كەزدەرىم دە بولدى.
- ال «Kazakhstan» تۋىندىسىنىڭ قازاقستاندا كوپ تىڭدالاتىنىن الەۋمەتتىك جەلىدەن ءبىلدىڭىز بە؟
- ءيا، ول وسى ومىرىمدە قۇراستىرعان وزگە اۋەندەرمەن سالىستىرعاندا، ەڭ كوپ تارالعان شىعارما سول بولدى. Instagram جەلىسىندەگى كەڭىنەن قولدانىلىپ جۇرگەنىن بايقاپ، قاتتى تاڭعالدىم. سەبەبى مەن ولاي بولادى دەپ ءتىپتى دە ويلاعام جوق. كەيىن قازاقستاننان ءبىر بالا حابارلاسىپ، ول تۋىندىمنىڭ ۇنايتىنىن ايتتى. «سەن ونى قايدان ەستىدىڭ؟» دەگەن ەدىم، «قازاقستاندا بارلىعى وسى اۋەندى تىڭداپ ءجۇر. اسىرەسە، Instagram-داعى جازبالارىن سول شىعارمامەن «سۇيەمەلدەيدى»، - دەدى.
سوسىن فۋتبول، كۇرەس، تەننيس جارىستارىنا، ءتىپتى Miss World Kazakhstan سىندارىندا دا ءجيى قولدانىلاتىنىن ايتتى. مەن باسىندا سەنىڭكىرەمەي، قالجىڭداپ تۇرعان بولار دەپ ويلادىم. سودان سوڭ الەۋمەتتىك جەلىنى اقتارىپ شىقسام، راسىندا ءتۇرلى يۆەنتتە قويىلىپ ءجۇر ەكەن. قاتتى تاڭىرقادىم.
- ءبىر اي بۇرىن الماتىعا كەلىپ كەتتىڭىز. ال بىرنەشە كۇن بۇرىن «Almaty» اتتى تۋىندىڭىز جارىققا شىقتى...
- ءيا، الماتىعا بارىپ قايتتىم. جالپى، قازاقستاندى ءوز كوزىممەن كورگىم كەلدى. ادامدار مەنىڭ مۋزىكامدى ۇناتىپ، ۇنەمى تىڭدايتىن بولسا، تىڭدارمانىم تۇراتىن ول ەلگە بارىپ، ول ەلدىڭ قانداي ەل ەكەنىن كورۋىم كەرەك دەپ ويلادىم. مادەنيەتىمەن جاقىن تانىسقىم كەلدى. قازاقستانعا بۇرىن- سوڭدى تابانىم تيمەگەندىكتەن، ءۇش كۇنگە بارعانىم جەتەر دەپ ويلادىم. ءبارى مەن ويلاعاننان دا كوڭىلدى ءوتتى. الماتى ۇناپ قالدى. اسىرەسە، مەيىرىمگە تولى ادامدارىن جاقىن تارتتىم. تيىسىنشە، كوپ دوس تاپتىم. قالانىڭ ءبىراز كورىكتى جەرىن ارالادىم. كوشەدە بىرنەشە رەت دومبىرا تارتتىم. سول كەزدە ءوتىپ بارا جاتقان كوپشىلىك تاڭعالىپ، ۆيدەوعا ءتۇسىرىپ، العىستى قارشا بوراتتى. مۋزىكا ادامدى جاقىنداستىرادى عوي. دومبىرا ورىنداپ تۇرعانىمدا، ءبارىمىزدىڭ ءبىر تىلدە سويلەپ تۇرعانىمىزدى سەزىندىم. كەرەمەت ۋاقىت وتكىزدىم. ءۇش كۇننەن دە ارتىق ۋاقىتقا قالۋىما بولاتىن ەدى. اسىرەسە، استانادا وتەتىن دۇنيەجۇزىلىك كوشپەندىلەر ويىنىن قاتتى كورگىم كەلگەن- ءتىن. الايدا اۋستراليادا بىرنەشە شوۋ مەن فەستيۆال وتكىزۋىم كەرەك بولدى. ءسويتىپ، امال جوقتىقتان ەلگە قايتىپ كەتتىم.
- الەۋمەتتىك جەلىدەگى سۋرەتتەرىڭىزدەن قازاقستاننىڭ تۋى بەينەلەنگەن جەيدەنى كوپ كيەتىنىڭىزدى بايقادىم.
- ول جەيدەنى كوكتوبەدەگى جەيدە ساتاتىن دۇكەننەن ساتىپ العانمىن. الدىندا قازاقستاننىڭ تۋى بەينەلەنگەن، ال ارتىندا ى’m big in Kazakhstan دەگەن جازۋ بار. ول جەيدەنى قازىر اۋستراليادا تاستاماي كيىپ ءجۇرمىن. مۇنى كورگەن كوپشىلىك مەنى ەسىنەن اداسقان دەپ ويلايدى (كۇلىپ). ال دوستارىم مەنى «قازاقستان پاتشاسى» دەپ قالجىڭدايدى. سەبەبى ولار مەنىڭ قازاق مۋزىكاسىنا دەگەن سۇيىسپەنشىلىگىمدى بەسكە بىلەدى. ءارى مەن قۇر جۇرمەي، اۋستراليالىقتارعا قازاقستاندى تانىستىرىپ ءجۇرمىن. اۋستراليادا بىرنەشە قازاق تۇرادى. الايدا مۇنداعى كوپشىلىك، قازاق ۇلتى، قازاقستان تۋرالى ەشتەڭە بىلمەيدى.
سوندىقتان ءوزىمدى اۋسترالياداعى قازاقستان امباسسادورى سەكىلدى سەزىنەمىن. مۇندا كونتسەرتتە، كوشەدە قازاق مۋزىكاسىن كوپ وينايمىن. الماتىدا ساتىپ العان قازاقتىڭ ءداستۇرلى كيىمدەرىن فەستيۆال بولعاندا ۇنەمى كيىپ شىعامىن. راسىندا، ءوزىمدى اۋسترالياداعى قازاقستاننىڭ بەيرەسمي امباسسادورىمىن دەپ ەسەپتەيمىن (كۇلىپ). جوعارىدا ءار سينگلگە ۆيدەو جاسايمىن دەدىم عوي. وسى جولى الماتىعا بارعان ساپارىمنان كليپ ازىرلەپ شىعاردىم.
الماتىنىڭ اسەمدىگىن كورسەتكىم كەلىپ، درونمەن تۇسىرىلگەن بەينەلەردىڭ ءبىرازىن سۇراپ الدىم. ونى كورگەن اۋسترالياداعىلار «مىنا جەردىڭ ادەمىسىن-اي!» دەپ تاڭعالدى. كوپ ادام قوڭىراۋ شالىپ، «قازاقستان كەرەمەت ەل ەكەن عوي! ءبىز دە سەنىڭ سوڭىڭنان باراتىن سەكىلدىمىز»، - دەپ اعىنان جارىلدى.
وسىلايشا، كەلەسى جىلى مەنىمەن ەرە بارعىسى كەلەتىندەردىڭ قاتارى ارتتى. وسىدان كەيىن تۋريست اگەنتى بولىپ جۇمىس ىستەۋىم كەرەك سەكىلدى (كۇلىپ). باسىندا كوپشىلىك «قازاقستانعا نە ءۇشىن بارعىڭ كەلەدى؟» دەيتىن. راسىندا، قازاقستان اۋستراليالىقتار بارىپ دەمالاتىن جەر ەمەس. سول كەزدە شىنىمەن نە ءۇشىن بارعىم كەلەتىنىن تۇسىنبەيتىنمىن. اقىرىندا تابانىم تيگەن سوڭ قايتا- قايتا بارعىم كەلەتىن ورىنعا اينالدى. ءارى ادەپكىدە «نە ءۇشىن؟» دەگەندەر، قازىر «ەندى تۇسىنىكتى بولدى» دەيتىندى شىعاردى. ءارى ولارعا قازاقستانعا بارۋعا كەڭەس بەرىپ، بار بىلگەنىمدى ايتىپ ءجۇرمىن.
- دومبىرا ءۇنىن ەستىگەنگە دەيىن قازاقستان تۋرالى بىلەرىڭىز بار ما ەدى؟
- مەن قازاقستان تۋرالى العاش «بورات» فيلمىنەن ءبىلدىم. وعان دەيىن ونداي ەلدىڭ بارىن ەش ەستىمەگەنمىن. ماعان ول كينو ءتىپتى دە ۇناعان جوق. كەيىن دومبىراعا قىزىعا باستاپ، ينتەرنەتتەن قازاقستان تۋرالى كوپ دەرەك ىزدەستىرگەن شاقتا الگى كينونىڭ وتىرىككە قۇرىلعانىن اڭعاردىم. وكىنىشتىسى سول، مەن سەكىلدى وسىنداعى كوپشىلىك تە ول ەلدى سول كينو ارقىلى تانىپ- ءبىلدى. اۋستراليادا دومبىرانى تانىستىرىپ، «مىنا ءان - قازاقستانداعى مۋزىكانتتاردىڭ شىعارماسى» دەپ ايتىپ جاتسام، ءبىرازى «بورات سيپاتتاعان ەل مە؟» دەپ شىعادى. ولارعا «بورات - قازاق ەمەس، شەتەل ازاماتى ءارى ول كينو قازاقستاندا تۇسىرىلمەگەن، سەنبەڭىزدەر» دەپ، ۇنەمى تۇزەتىپ جۇرەمىن. ويىن وزگەرتۋ ءۇشىن بار بىلەتىنىمدى ايانىپ قالمايمىن. مەن ءۇشىن بۇل - قۇرمەت. مەن قازىر البوم جازىپ جاتىرمىن. ونىڭ ىشىنە بىلتىر شىققان حيت تۋىندىم «Kazakhstan»، جۋىردا جاريالانعان «Almaty» شىعارماسىن قوستىم. قازىر ءۇشىنشىسىن جازىپ جاتىرمىن. ول بىرنەشە ايدان سوڭ جارىق كورەدى. قازاقستان تۋرالى تۇتاس البوم شىعارماقپىن. قازاقستاننىڭ 10 قالاسىنا 10 ەرەكشە تۋىندى ارنايمىن دەپ شەشتىم. سوندىقتان ول قالالارعا قايتسەم دە بارامىن دەپ بەلىمدى بەكەم بۋىپ وتىرمىن.
سوسىن ول ساپارىم تۋرالى ۆيدەو جاساپ، ونى البوم ىشىنە قوساتىن بولامىن. تەڭدەسى جوق جوبا بولاتىنىنا سەنىمىم مول. ايتپاقشى، الماتىدا ءلايلا ەسىمدى قوبىزشىنى جولىقتىردىم. ەكەۋىمىز بىرگە كوللاب جاساپ، ءبىر تۋىندى ازىرلەپ شىعارماق ويىمىز بار. ودان بولەك، بىرنەشە قازاق مۋزىكانتىن بىرلەسىپ جۇمىس ىستەۋگە شاقىردىم. قالاي بولاتىنىن الداعى ۋاقىتتا كورەمىز. ءلايلاعا «ەگەر ءبارى ويداعىداي شىقسا، سەنى اۋسترالياعا شاقىرامىن. مەنىمەن بىرگە فەستيۆالدەر مەن شوۋلارعا قاتىسىپ، ونەرىڭدى ءبىزدىڭ جاققا پاش ەت» دەگەنمىن. سوسىن كەلەسى جازدا مەن قازاقستانعا بارعاندا بىرلەسىپ، كونسەرت ۇيىمداستىرساق كەرەمەت بولار ەدى.
- جاڭا ءبىر سوزىڭىزدە «دومبىرا ساتىپ الدىم» دەپ قالدىڭىز. ونى اۋسترالياعا تاپسىرىسپەن الدىرتتىڭىز با سوندا، الدە؟
- ءيا. العاشقى دومبىرامدى eBay جەلىسى ارقىلى ونلاين ساتىپ الدىم. ول ارزان قۇرال ءارى ساپاسى ناشار بولدى. الماتىعا بارعان سەبەبىمنىڭ ءبىرى دە سول. الەۋمەتتىك جەلىدە جوعارى ساپاداعى دومبىرا جاسايتىن بىرنەشە ماماننىڭ جۇمىسىن كوزىم شالىپ قالدى. ولار بەرىپ جىبەرگىسى كەلگەن ەدى، الايدا مەن ءوزىم بارىپ، ساتىپ العىم كەلدى. قولىمنان تۇسپەيتىن بولعاسىن، جاقسى ەستىلەتىن، ساپالى اسپاپ بولعانىن قالادىم. جالپى، مەن مۋزىكالىق اسپاپتى ونلاين ساتىپ العاندى ۇناتپايمىن. كوزىممەن كورىپ، قولىممەن ۇستاۋىم كەرەك. ءۇنىن دە ەستۋىم كەرەك. ءسويتىپ، الماتىدا دومبىرا دۇكەنىنە ارنايى بارىپ، ساپالىسىن ساتىپ الدىم. ويلاعانىمنان دا اسىپ تۇسەتىن اسپاپ العانىم ءۇشىن باقىتتىمىن.
- رەپەرتۋارىڭىزدا دومبىرامەن ورىندايتىن قانشا تۋىندى بار؟
- «كوك تۋ» شىعارماسىن ويناي الامىن. قازىر ەستىگەننىڭ دەلەبەسىن قوزدىراتىن «اداي» كۇيىن ۇيرەنىپ ءجۇرمىن. سوسىن « ۇلىتاۋ» توبىنىڭ «Two Warriors» تۋىندىسى قاتتى ۇنايدى. سونى دا ۇيرەنۋدى قولعا الدىم. ودان بولەك، HasSak-تىڭ قورجىنىنان بىرنەشە تۋىندى ۇيرەنىپ ءجۇرمىن. سودان سوڭ «تۇراننىڭ» ورىنداۋىنداعى «دومبىرا» تۋىندىسىن تارتا الامىن. ولاردىڭ ەل ىشىنە تاراتقان سول نۇسقاسى قاتتى ۇنادى. مەن دە سولاي ءوز نۇسقامداعى تۋىدىنى ويلاپ تابامىن. اۋەن جازۋ - جان قالاۋىم. مەن جاس ءوسپىرىم كەزىمنەن بەرى ساحنادا ءجۇرمىن.
الايدا ماعان بارىنەن بۇرىن اۋەن جازعان ۇنايدى. بۇل ونەردىڭ قۇدىرەتى بار. سەن ءبىر اسپاپپەن جاي شىعارما ەمەس، ادامداردى ءوزارا بايلانىستىراتىن ۇلكەن دۇنيە جاساپ شىعاراسىڭ. كەز كەلگەن مۋزىكانت يا دومبىراشى سازگەر بولا المايدى. ساز قۇراستىرۋدىڭ ءوزى - بيىك ونەر.
سەنىڭ تۋىندىڭنىڭ تىڭدارمانعا ۇمىتىلماس اسەر سىيلايتىنىن ويلاساڭ، ءتىپتى كوپ شارۋا اتقارعىڭ كەلەدى. كەلەسى جىلى قازاقستاننىڭ ءبىراز قالاسىن ارالايمىن. شوۋ جاساعىم كەلەدى. وعان دەيىن البومىمدى اياقتاۋىم قاجەت. الماتى تۋرالى تۋىندىم شىقتى. ەندى استاناعا ارناپ، كومپوزيتسيا شىعارامىن. وندا تۇراتىن امەريكالىق دوسىمنان قالا تۋرالى دەرەك سۇراعانىمدا استانانىڭ جاڭا، زاماناۋي قالا ەكەنىن باسا ايتتى. وندا ءداستۇرلى مۋزىكا جانە حيپ-حوپ پەن حەۆي مەتال ءستيلىن ارالاستىرىپ، تۋىندى شىعارۋدى ماقسات ەتتىم.
مەن قازاقتىڭ تەك مۋزىكاسىنا ەمەس، مادەنيەتىنە دە قىزىعامىن. اسىرەسە، كوشپەندىلەر مادەنيەتى، سونىڭ ىشىندە بۇركىتپەن اڭ اۋلاۋ ءىسى ماعان سونداي قىزىق. دومبىرا تۋرالى زەرتتەۋىمنىڭ سوڭىندا ەلدىڭ تاريحى تۋرالى كوپ وقىدىم، كوپ ءبىلدىم. قاتتى قىزىقتىرعان تۇسى وسى بولدى. سىزدەر بۇگىندە اۋستراليا تۋرالى كوپ دەرەك بىلمەيسىزدەر.
سەبەبى بىزدە راسىمەن سىزدەردەگىدەي باي مادەنيەت جوق. سىزدەردە شىنىمەن باي مادەنيەت بار. بىزدەگى مادەنيەت سونشالىق قىزىق ەمەس. ەكى ءجۇز جىل بۇرىن بىرنەشە توپ جينالىپ، وسىندا جان ءبىتىرىپ، تۇراقتاۋدى ءجون كورگەن. مۇنداعى تاريح قازاقستان تاريحى سەكىلدى قىزىق ءارى ەلەڭ ەتەتىندەي ەمەس. قازاقستاننىڭ تاريحى ودان الدەقايدا قىزىعىراق. ءارى اھ دەگىزەتىن تۇسى كوپ. سونداي- اق ماعان ءدامى ءتىل ۇيىرەتىن ۇلتتىق تاعامدارىڭىز قاتتى ۇنايدى. مۇنىڭ ءبارىن كورۋ، قىزىقتاۋ - اۋستراليالىقتارعا قىزىق. سوندىقتان كەلەسى جىلى ءبىزدىڭ ماتەريكتەن قازاقستانعا ساياحاتتايتىندار سانى ارتادى دەگەن سەنىمدەمىن.
- اڭگىمەڭىزگە راحمەت! ىسكە ءسات!
سۇحباتتاسقان
ءاليا تىلەۋجان قىزى