سوت قايرات بورانبايەۆتىڭ جازاسىن ەكى جىلعا قىسقارتتى

استانا قالالىق سوتى قايرات بورانبايەۆ پەن ونىڭ سىبايلاستارىنا قاتىستى قىلمىستىق ءىستى قايتا قاراپ، شەشىم شىعاردى، دەپ حابارلايدى قازاقپارات ءتىلشىسى.

«استانا قالاسىنىڭ قىلمىستىق ىستەر جونىندەگى سوت القاسى ۇكىم شىعاردى. ت. جانۇزاق ق ر قىلمىستىق كودەكستىڭ 189-بابى 2-تارماعىنىڭ 4-بولىگى جانە 55-بابى 4-بولىگىنە سايكەس كىنالى دەپ تانىلىپ، 5 جىل باس بوستاندىعىنان ايىرۋ جازاسى تاعايىندالسىن. ق. بورانبايەۆ پەن ر. ناحانوۆ ق ر قىلمىستىق كودەستىڭ 28-بابى 5-بابى، 189-بابى 4-بولىگى، قىلمىستىق كودەكستىڭ 2-تارماعى 218-بابى 3-تارماعى 3-تارماعى بويىنشا كىنالى دەپ تانىلسىن. ولاردىڭ مۇلىكتەرى تاركىلەنىپ، ءارقايسىسىنا 6 جىل جازا تاعايىندالسىن»، - دەدى سوت كوللەگياسىنىڭ ءتوراعاسى ايسۇلۋ سلامبەكوۆا ۇكىمدى وقي وتىرىپ.

ودان بولەك، سۋديا قايرات بورانبايەۆقا بەرىلگەن مەملەكەتتىك ناگرادالار مەن اتاق-دارەجەلەردەن ايىرۋ تۋرالى پرەزيدەنتكە ۇسىنىس بىلدىرىلەتىنىن ايتتى.

«ق ر قىلمىستىق كودەكستىڭ 58-بابىنىڭ 3-بولىگى نەگىزىندە ق. بورانبايەۆ پەن ر. ناحانوۆتىڭ مۇلىكتەرىن تاركىلەپ، مەملەكەتتىك قىزمەتتە، سۋديادا، جەرگىلىكتى ءوزىن-ءوزى باسقارۋ ورگاندارىندا، قر ۇلتتىق بانكىندە، ونىڭ ۆەدومستۆولارىندا، رەتتەۋ باقىلاۋ جانە رەتتەۋ جونىندەگى ۋاكىلەتتى ورگانداردا، قارجى نارىعىن جانە قارجى ۇيىمدارىن، مەملەكەتتىك ۇيىمداردى جانە كۆازيمەملەكەتتىك سەكتور سۋبەكتىلەرىن قاداعالاۋ قىزمەت اتقارۋ قۇقىعىنان ءومىر بويى ايىرا وتىرىپ، 6 جىلعا باس بوستاندىعىنان ايىرۋ تاعايىندالسىن»، - دەدى ول.

ەسكە سالساق، 2022-جىلى 17- ناۋرىزدا سوتتىڭ شەشىمىمەن قايرات بورانبايەۆ 2 ايعا قامالعان ەدى.

كەيىن قايرات ساتىبالدى مەن قايرات بورانبايەۆتىڭ سىرتقا زاڭسىز شىعارىلعان اكتيۆتەرى قايتارىلا باستاعانى حابارلاندى.

ايتا كەتسەك، استانادا قايرات بورانبايەۆقا قاتىستى سوت وتىرىسى بىلتىر 30- جەلتوقساندا باستالدى.

28- ناۋرىزدا وتكەن سوت وتىرىسىندا پروكۋرور قايرات بورانبايەۆتى 8 جىلعا باس بوستاندىعىنان ايىرىپ، مۇلكىن تاركىلەۋدى سۇرادى.

31- ناۋرىز كۇنى قايرات بورانبايەۆ سوت الدىنداعى سوڭعى ءسوزىن ايتقان ەدى.

سوت شەشىمىمەن قايرات بورانبايەۆقا 8 جىلعا باس بوستاندىعىنان ايىرۋ جازاسى تاعايىندالدى.

كەيىن سوت قايرات بورانبايەۆتىڭ تەرگەۋ ورگاندارىمەن مامىلەگە كەلۋىن قاناعاتتاندىردى.

كۇنى كەشە قايرات بورانبايەۆتىڭ قۇنى 90 ميلليارد تەڭگەدەن اساتىن اكتيۆتەردى مەملەكەتكە قايتارعانى بەلگىلى بولدى.

بۇگىن تۇسكە دەيىن بولعان سوت وتىرىسىندا پروكۋرور قايرات بورانبايەۆقا 6 جىل بەرۋدى سۇراعان ەدى.

ودان بولەك، استانا قالاسىنىڭ پروكۋراتۋراسى قايرات بورانبايەۆپەن پروتسەستىك كەلىسىم جاساعانى بەلگىلى بولدى.