سەمەيلىك ايەل توقتاپ قالعان ليفت ىشىندە بوساندى

سەمەي قالاسىندا جۇكتى ايەل توقتاپ قالعان ليفت ىشىندە بوساندى، دەپ حابارلايدى قازاقپارات ءتىلشىسى.

وقيعا 3-قىركۇيەك كۇنى وبلىستىق پەريناتالدىق ورتالىقتىڭ №1-عيماراتىندا بولعان. ءبىراق اقپارات الەۋمەتتىك جەلىدە تەك بۇگىن جاريالاندى. قازاقپارات ءتىلشىسى اتالمىش ورتالىقتىڭ باس دارىگەرىنە حابارلاسىپ كوردى.

«جۇكتى ايەلدەردى اكۋشەردىڭ سۇيەمەلدەۋىمەن جۇكتى ايەلدەر پاتولوگياسى بولىمشەسىنەن پەرزەنتحاناعا اۋىستىرۋ كەزىندە وسىنداي جاعداي بولدى. 2-دەن 4-قاباتقا كوتەرىلىپ كەلە جاتقان ليفت كەنەت توقتاپ قالعان. شۇعىل تۇردە قىزمەت كورسەتەتىن ۇيىمنان ليفتشى شاقىرىلدى، ول كەلىپ، بىردەن ليفتتى جوندەۋگە كىرىستى»، - دەيدى ارحات قۇدايبەردى ۇلى.

ليفت ىشىندە تولعاعى كەلگەن جۇكتى ايەل جانە پەريناتالدىق ورتالىقتىڭ تاجىريبەلى اكۋشەركاسى بولعان. اكۋشەركاعا ايەلدى ليفتتە بوساندىرىپ الۋعا تۋرا كەلدى. سالماعى 3460 گرام ۇل بالا اسقىنۋسىز دۇنيەگە كەلگەن.

ايەل ادام ەكىنشى كۇنى نارەستەسىمەن قاناعاتتانارلىق جاعدايدا ۇيىنە شىعارىلدى. ونىڭ پەريناتالدىق ورتالىققا ەشقانداي شاعىمى جوق.

ليفتتىڭ اياق استى توقتاپ قالۋى العاش رەت ەمەس. بيىل ورتالىققا پارلامەنت ءماجىلىسىنىڭ دەپۋتاتى كەلگەن كەزدە دە ليفت ىستەمەي قالىپتى.

«№1-عيماراتتىڭ ليفتى 1988 -جىلى پايدالانۋعا بەرىلىپ، جىل سايىن تەكسەرىلىپ تۇرادى. وسىنداعى 2 ليفتتى اۋىستىرۋ ماقساتىندا جوبالىق-سمەتالىق قۇجاتتاما ازىرلەنگەن. جوباعا قارجى بەكىتىلىپ، بيىلعى جىلدىڭ 20-قازانىندا ءتيىستى جۇمىستار باستالۋى ءتيىس»، - دەيدى باس دارىگەر.