الماتى زووباعىندا قاۋىپتى بالىق مەكەن ەتەدى

الماتى زووباعىنىڭ ماماندارى سۋدا جۇزەتىن «قابىلانداردىڭ» ۆيدەوسىن جاريالادى، دەپ حابارلايدى قازاقپارات ءتىلشىسى.

«بۇل - مۋرەنا قابىلان بالىعى. ءتۇر-ءتۇسى قابىلاندىكىندەي قوڭىر الا بولعاندىقتان وسىلاي اتالىپ ەتكەن. ءبىزدىڭ زووباعىمىزدا ولاردىڭ ەكەۋى بار. ولار ۇلكەن، دوڭگەلەك اكۆاريۋمدا ءجۇزىپ جۇرەدى. مۋرەنا جىلانبالىق تۇقىمداسىنا جاتادى. كوبىنە تىنىق مۇحيت پەن ءۇندى مۇحيتىن مەكەندەيدى»، - دەپ اتاپ ءوتتى زووباق وكىلدەرى

ونىڭ باسقا بالىقتاردىكىندەي قابىرشىعى جوق. ونىڭ ورنىنا سىلەكەيلەنگەن جۋان، قالىڭ تەرىسى بولادى. زووباقتاعى مۋرەنالاردىڭ ۇزىندىعى ءبىر مەترگە جەتەدى. اۋزى ۇلكەن، ەكى جاق سۇيەگى بار. مىقتى تىستەرىمەن جەمتىگىن شاپ بەرىپ ۇستاپ الادى. مۋرەنامەن كەزدەسكەن بالىقتار ودان وڭاي قاشىپ قۇتىلا المايدى.

«مۋرەنا ءوزىنىڭ الدىڭعى جاق سۇيەگىمەن جەمتىگىن تىستەسە، وڭەشىنە جاقىن ورنالاسقان ەكىنشى جاق سۇيەگىمەن جەمتىكتى ىشىنە قاراي يتەرىپ، جۇتىپ الادى. ونىڭ تىستەرى ارتقا قاراي مايىسىپ تۇرادى. كادىمگى قاقپان سياقتى تۇسكەن جەمتىگىن تىرپ ەتكىزبەيدى. وسىنداي جىرتقىشتىعىنا قاراماستان مۋرەنا ۋلى ەمەس. الايدا ول تىستەپ السا، ورنى قاتتى اۋىرىپ، ۇزاق جازىلادى. سەبەبى ونىڭ اۋىز قۋىسىنداعى سىلەكەيىندە اۋرۋ تۋدىراتىن ميكروبتار بار. بۇل ميكروبتار اۋىز قۋىسىندا قالعان جەمتىكتىڭ قالدىقتارىنان پايدا بولادى»، - دەپ سۋرەتتەدى زووباقتاعىلار.

مامانداردىڭ ايتۋىنشا، مۋرەنا ادامدار ءۇشىن قاۋىپتى ەمەس. ءبىراق ونى ۇركىتىپ، تۇرتەتىن بولساڭىز، قاۋىپ ءتوندىرۋى مۇمكىن.

«زووباعىمىزدا مۋرەنالار بالىق، سەگىزاياق، اسشايان، كالمارلارمەن قورەكتەنەدى. ولاردىڭ كوبەيۋى تولىق زەرتتەلمەگەن. ءومىر ءسۇرۋ ۇزاقتىعى - 10 جىل»، - دەپ اتاپ ءوتتى زووباقتان.