سوڭعى جىلدارى «ورتالىق ازيا +» فورماتى اياسىنداعى ىنتىماقتاستىق جاندانا ءتۇستى - پرەزيدەنت

«گەوساياسي شيەلەنىستىڭ كۇشەيۋىنە بايلانىستى بىزگە ءوڭىردىڭ تۇراقتىلىعىن، قاۋىپسىزدىگىن جانە ورنىقتى دامۋىن قامتاماسىز ەتۋ ءۇشىن كۇش- جىگەرىمىزدى بىرىكتىرۋ اسا ماڭىزدى.

بۇل تۋرالى پرەزيدەنت قاسىم- جومارت توقايەۆ ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋىندە ايتتى، دەپ حابارلايدى قازاقپارات.

«XXI عاسىردا ورتالىق ازيانى دامىتۋ ماقساتىنداعى دوستىق، تاتۋ كورشىلىك جانە ىنتىماقتاستىق تۋرالى شارتتا اتالعان يگى مىندەتتەردى ورىنداۋدىڭ ءوزارا وڭتايلى فورمۋلاسى بەكىتىلگەن دەپ ويلايمىن. بۇگىندە ءبىزدىڭ باستى مىندەتىمىز - وسى قۇجاتتىڭ تەزىرەك كۇشىنە ەنۋىن قامتاماسىز ەتۋ. بۇل شارت مەملەكەتتەرىمىزدىڭ كەمەلىنە كەلگەنىنە جانە ءوز ايماعىمىزدىڭ تاعدىرىن دەربەس انىقتاۋعا دايىن ەكەنىنە ايقىن ساياسي دالەل بولادى»، - دەدى مەملەكەت باسشىسى.

ول سوڭعى جىلدارى «ورتالىق ازيا +» فورماتى اياسىنداعى ىنتىماقتاستىق ايتارلىقتاي جاندانا تۇسكەنىن اتاپ ءوتتى.

«اتالعان فورماتتار بارىنشا ءتيىمدى بولۋى ءۇشىن ۇلتتىق مۇددەلەرىمىزدى ەسكەرە وتىرىپ، ولاردىڭ ساپالى مازمۇنىن بىرلەسە بايىتا ءتۇسۋىمىز قاجەت. ءبىزدىڭ ويىمىزشا، ورتاق نەمەسە بارىنشا ۇقساس ۇستانىمعا كەلىپ، الەمدىك قوعامداستىققا ىنتىماعىمىز بەن بىرلىگىمىزدى كورسەتۋ ماڭىزدى»، - دەدى پرەزيدەنت.