اۋدان، قالا اكىمدەرىن سايلاۋ: كانديداتتاردى ۇسىنۋ، تىركەۋ جانە سايلاۋالدى ۇگىت قاشان باستالادى

ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ اۋدانداردىڭ جانە وبلىستىق ماڭىزى بار قالالاردىڭ اكىمى لاۋازىمىنا كانديداتتاردى ۇسىنۋدىڭ، تىركەۋدىڭ جانە سايلاۋالدى ۇگىتتىڭ قاشان باستالاتىندىعىن ايتتى، دەپ حابارلايدى قازاقپارات ءتىلشىسى.

«كانديداتتاردى ۇسىنۋ سايلاۋ كۇنى تاعايىندالعاننان كەيىنگى كۇننەن باستالادى. ەگەر تاعايىنداۋدى ەرتەڭگە كۇتسەك، وندا بۇرسۇگىنى ۇسىنۋ باستالىپ، ول داۋىس بەرۋ كۇنىنە 30 كۇن قالعاندا اياقتالادى. «سايلاۋ تۋرالى» كونستيتۋتسيالىق زاڭعا سايكەس، ەگەر ۇسىنۋ مەرزىمى اياقتالعان كۇنى ەكى كانديداتتان كەم ۇسىنىلسا، وندا اۋماقتىق سايلاۋ كوميسسياسى ۇسىنۋ مەرزىمىن ۇزارتۋعا قۇقىلى»، - دەدى ول ورتالىق سايلاۋ كوميسسياسىنىڭ وتىرىسىندا.

ونىڭ اتاپ وتۋىنشە، ساياسي پاريالار ءوز كانديداتتارىن ۇسىنا الادى. سونىمەن قاتار ازاماتتاردىڭ دا كانديدات بولۋعا مۇمكىندىگى بار. بۇل رەتتە ءوزىن ءوز ۇسىنعان ازامات سايلاۋعا ءتۇسىپ وتىرعان سايلاۋ وكرۋگىندە تىركەلگەن سايلاۋشىلاردىڭ جالپى سانىنىڭ 1 پايىز قولداۋىن جيناۋى قاجەت. كانديداتتاردى تىركەۋ كەزەڭى 25 كۇنگە سوزىلادى. تىركەۋ قاجەتتى بارلىق قۇجاتتار ۇسىنىلعان سوڭ باستالادى جانە سايلاۋ وتەتىن كۇنگە 25 كۇن قالعاندا اياقتالادى.

«كانديداتتار تىركەلگەننەن كەيىن اۋماقتىق سايلاۋ كوميسسياسى ب ا ق- تا كانديداتتى تىركەۋ تۋرالى شەشىمىن جاريالاۋعا مىندەتتى. سايلاۋالدى ۇگىت تىركەۋ اياقتالعان سوڭ بىردەن باستالىپ، 24 كۇنگە سوزىلادى. ادەتتەگىدەي داۋىس بەرۋ ءۇشىن جەرگىلىكتى ۋاقىت بويىنشا تاڭەرتەڭگى 07:00 دەن 20:00 گە دەيىن ۋاقىت بەلگىلەنگەن. ۆاحتالىق ادىسپەن جۇمىس ىستەيتىن ازاماتتارعا قولايلى بولۋى ءۇشىن باسقا ۋاقىت بەلگىلەنۋى، ءبىراق، ساعات تاڭعى 6:00 دەن ەرتە ەمەس، ال 22:00 دەن كەش ەمەس ۋاقىت بەلگىلەنۋى مۇمكىن. داۋىستاردى ساناۋ 12 ساعاتتان اسپاۋى قاجەت. باسەكەلەسىنەن كوپ داۋىس جيناعان كانديدات سايلاندى دەپ سانالادى»، - دەدى كونستانتين پەتروۆ.