قازاقستان حالقى تىلدەرى كۇنى: مەملەكەتتىك ءتىل - تاتۋلىقتىڭ نەگىزى
مەملەكەتتىك ءتىلدىڭ مارتەبەسىن ارتتىرىپ، ماڭىزىن ناسيحاتتاۋعا ارنالعان جيىنعا ءىس باسقارماسىنىڭ ورتالىق اپپاراتى مەن ۆەدومستۆولىق قاراستى ۇيىمدارىنىڭ قىزمەتكەرلەرى، ۋاكىلەتتى ورگانداردىڭ وكىلدەرى، ءتىل ماماندارى قاتىستى.
باس قوسۋدى جۇرگىزگەن پرەزيدەنت ءىس باسقارماسىنىڭ ۇيىمداستىرۋ-باقىلاۋ جانە كادر جۇمىسى ءبولىمىنىڭ مەڭگەرۋشىسى ەربول ادايەۆ قۇتتىقتاۋ ءسوز سويلەپ، مەكەمەدە قازاق ءتىلىنىڭ قولدانىلۋ اياسى كەڭەيىپ كەلە جاتقانىنا توقتالدى.
«بيىل پرەزيدەنتتىڭ ءىس باسقارماسى جۇيەسىندە كادرلاردىڭ الەۋەتىن كوتەرۋ ءۇشىن مەملەكەتتىك ءتىلدى تەرەڭدەتىپ وقىتۋ جانە ىسكەرلىك قازاق ءتىلىن ۇيرەتۋ كۋرسى اشىلدى. از ۋاقىت ىشىندە 700 قىزمەتكەر وسى كۋرسقا قاتىسۋعا تىلەك ءبىلدىردى. جالپى، ءىس باسقارماسى ءتىل ساياساتى كوميتەتىمەن ىنتىماقتاستىقتا جۇمىس ىستەپ، مەملەكەتتىك تىلدەگى قۇجات اينالىمىنا مونيتورينگ جۇرگىزىپ وتىرادى. بيىل Ⅱ توقسانداعى مونيتورينگ ناتيجەسى بويىنشا، مەملەكەتتىك تىلدەگى شىعىس قۇجاتتارىنىڭ ۇلەسى 91 پايىزعا جەتتى»، - دەدى ول.
ە. ادايەۆ ايتىپ وتكەندەي، ىرگەلى ۇجىمدا مەملەكەتتىك تىلدە ءىس جۇرگىزۋ دەڭگەيى جوعارى دەۋگە بولادى. جۇمىستى ءالى دە جانداندىرىپ، ءجۇز پايىزدىق كورسەتكىشكە جەتۋ كوزدەلىپ وتىر.
القالى جيىندا عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ ءتوراعاسى، بەلگىلى الاشتانۋشى عالىم ەربول تىلەشوۆ «ءتىل جانە تانىم» تاقىرىبىندا مازمۇندى بايانداما جاسادى.
«مەملەكەتتىك ءتىل - حالقىمىزدى تۇتاستىراتىن، ىنتىماقتاستىراتىن نەگىزگى فاكتور. قازاق ءتىلىن ءبىلۋ – وتان سۇيگىشتىكتىڭ كورىنىسى. ءوزىمىزدى تانىعىمىز كەلسە، مەملەكەتتىك ءتىلدى مەڭگەرۋىمىز كەرەك. قازاق ءتىلى - قوعامدىق ءومىردىڭ بارلىق سالاسىندا قولدانۋعا بولاتىن ءتىل. بۇل تىلدە عىلىم جاسالدى، رەسمي ءىس قاعازدارى جۇرگىزىلەدى. ءتىل - تانىمنىڭ قۇرالى ەكەنىن ءاردايىم ەسىمىزدە ۇستايىق»، - دەدى عالىم.
بۇدان بولەك، دوڭگەلەك ۇستەلدە تانىمال اۋدارماشى كامال الپەيىسوۆا «ىلەسپە اۋدارما - مەملەكەتتىك ءتىلدىڭ قولدانىس اياسىن كەڭەيتۋ قۇرالى» تاقىرىبىندا ءدارىس وقىپ، كوپ جىلعى ءىس-تاجىريبەسىمەن ءبولىستى. ءىس باسقارماسى جۇيەسىندە قىزمەت ەتەتىن مەملەكەتتىك ءتىلدى دامىتۋ جونىندەگى ماماندار مەن قازاق ءتىلىن جەتىك بىلەتىن، ءتۇرلى سالادا تابىستى ەڭبەك ەتىپ جۇرگەن وزگە دە ازاماتتار بايانداما جاساپ، ءتىل ۇيرەنۋدەگى ۇتىمدى ادىستەرىمەن ءبولىستى.
پرەزيدەنت ءىس باسقارماسىنىڭ ورتالىق اپپاراتىندا جانە ۆەدومستۆوعا قاراستى مەكەمەلەردە ۇزاق جىلداردان بەرى ەڭبەك ەتىپ، مەملەكەتتىك ءتىلدىڭ قولدانىس اياسىن كەڭەيتۋگە اتسالىسىپ جۇرگەن قىزمەتكەرلەر از ەمەس. جيىن سوڭىندا وسى مامانداردىڭ مەملەكەتتىك ءتىلدى دامىتۋعا قوسقان ۇلەسى ەرەكشە اتالىپ، ولار پرەزيدەنت ءىس باسقارماسىنىڭ اپپاراتى باسشىسىنىڭ العىس حاتىمەن ماراپاتتالدى.