شەتەلدىك ەڭبەك ميگرانتتارىن ەمحاناعا تىركەۋ ءتارتىبى وزگەردى
بۇل ساۋالدارعا وڭىرلىك كوممۋنيكاتسيالار قىزمەتىندە وتكەن بريفينگىدە مەديتسينالىق ساقتاندىرۋ قورىنىڭ الماتى قالالىق فيليالى ديرەكتورى تىلەۋحان ابىلدايەۆ جاۋاپ بەردى، دەپ حابارلايدى قازاقپارات ءتىلشىسى.
تىلەۋحان ابىلدايەۆتىڭ سوزىنە سۇيەنسەك، كامپانيا بارىسىندا قازاقستاندىقتارمەن بىرگە ەۋرازيالىق ەكونوميكالىق وداق ەلدەرىنەن كەلگەن ەڭبەك ميگرانتتارى مەن ولاردىڭ وتباسى مۇشەلەرى دە ەمحاناعا تىركەلە الادى.
«بيىل شەتەلدىك ەڭبەك ميگرانتتارىن ەمحاناعا تىركەۋ ءتارتىبى وزگەردى. ەندى ولار ەمحاناعا ەرىكتى مەديتسينالىق ساقتاندىرۋ نەمەسە جۇكتەلگەن مەديتسينالىق ساقتاندىرۋ كەلىسىمشارتى ارقىلى عانا تىركەلە الادى. بۇل پوليستەر ارقىلى ولار باستاپقى مەديتسينالىق-سانيتارلىق كومەك قىزمەتىن پايدالانا الادى»، - دەدى فيليال باسشىسى.
ەڭبەك ميگرانتتارى ەلەكتروندى ۇكىمەت ارقىلى تىركەلە المايدى. تىركەلۋ ءۇشىن ەمحانا باسشىسىنىڭ اتىنا قازاق نەمەسە ورىس تىلىندە ەركىن تۇردە ءوتىنىش جازىلادى. وتىنىشپەن بىرگە پاسپورت، ەرىكتى نەمەسە جۇكتەلگەن مەديتسينالىق ساقتاندىرۋ ءپوليسى قوسا بەرىلەدى.
ەلىمىز بويىنشا اتالعان كەلىسىمشارتتاردى 7 جەكە مەنشىك ساقتاندىرۋ كومپانياسى ارقىلى راسىمدەۋگە بولادى. ولار: «ينتەرتيچ» س ك، «بازەل» س ك، «نوماد» س ك، «فريدوم ينشۋرانس» س ك، «سەنتراس ينشۋرانس» س ك، «نسك» س ك، «بازەل» س ك.
«تىركەلگەننەن كەيىن ەڭبەك ميگرانتتارى ءمامس پاكەتىندەگى قىزمەتتەردى پايدالانا الادى. مىسالى، قاجەتتى كونسۋلتاتيۆتىك-دياگنوستيكالىق قىزمەتتەر، جوسپارلى ستاتسيونارلىق كومەك، مەديتسينالىق وڭالتۋ سىندى تاعى دا باسقا كومەك تۇرلەرى قولجەتىمدى بولادى»، - دەدى تىلەۋحان ابىلدايەۆ.
ەڭبەك ميگرانتتارىنىڭ وزدەرى م ءا م س جۇيەسىنە جۇمىس بەرۋشى تاراپىنان جاسالعان جارنالار مەن اۋدارىمدار ارقىلى قاتىسادى. ال، 18 جاسقا تولماعان بالالارى مەملەكەت تاراپىنان ساقتاندىرىلسا، ولاردىڭ جۇبايلارى (زايىبى) ءوزىن-ءوزى ساقتاندىرۋشى رەتىندە الداعى 12 ايعا جارنا تولەۋى قاجەت.
ەستەرىڭىزگە سالا كەتسەك، قازاقستاندا تۇراقتى تۇراتىن، ىقتيارحاتى بار شەتەلدىكتەر ەل ازاماتتارىمەن بىردەي قۇقىقتارعا يە. ولار ەمحاناعا بۇرىنعىشا كەدەرگىسىز تىركەلە الادى.
ال، ەۋرازيالىق وداققا كىرمەيتىن ەلدەردىڭ ازاماتتارى ەمحاناعا تىركەلە المايدى جانە م ءا م س قىزمەتىن پايدالانبايدى، مەديتسينالىق كومەك ولارعا تەك اقىلى تۇردە كورسەتىلەدى.