تۇرعىنداردى جەلىدە بالاعاتتاعان اكىم نۇرماعامبەتوۆ قاتاڭ سوگىس الدى

كوكشەتاۋ. قازاقپارات - الەۋمەتتىك جەلىدە تىكەلەي ەفير ارقىلى وتكەن ەسەپتىك كەزدەسۋدە قالا تۇرعىندارىنا بالاعات ءسوز ايتقان شۋچە قالاسىنىڭ اكىمى ولجاس نۇرماعامبەتوۆكە «قاتاڭ سوگىس» تۇرىندەگى تارتىپتىك جازا قولدانىلدى.

بۇل تۋرالى ق ر مەملەكەتتىك قىزمەت ىستەرى اگەنتتىگىنىڭ اقمولا وبلىسى بويىنشا دەپارتامەنتىنىڭ باسشىسى دۋمان ابىليەۆ ءمالىم ەتتى، دەپ حابارلايدى قازاقپارات ءتىلشىسى

«ق ر مەملەكەتتىك قىزمەت ىستەرى اگەنتتىگىنىڭ اقمولا وبلىسى بويىنشا دەپارتامەنتىمەن الەۋمەتتىك جەلىلەرگە مونيتورينگ جۇرگىزۋ بارىسىندا بۋراباي اۋدانى شۋچە قالاسىنىڭ اكىمى ولجاس نۇرماعامبەتوۆتىڭ «Instagram» الەۋمەتتىك جەلىسىندەگى دورەكى سوزىنە قاتىستى جاريالانىمدار انىقتالدى. سونىمەن قاتار، اكىمنىڭ ءىس-ارەكەتى قوعام تاراپىنان جاعىمسىز قوعامدىق رەزونانس پەن سىنعا الىپ كەلدى. اتالعان دەرەكتى، سونداي-اق جاريالانىمداردا باياندالعان ءمان-جايلاردى زەردەلەۋ ناتيجەلەرى بويىنشا بيىلىعى جىلعى 8-تامىزدا دەپارتامەنتپەن مەملەكەتتىك قىزمەتشىلەرگە تارتىپتىك جازا قولدانۋ قاعيدالارىنىڭ 34-تارماعىنا سايكەس ولجاس نۇرماعامبەتوۆكە قازاقستان رەسپۋبليكاسى مەملەكەتتىك قىزمەتشىلەرىنىڭ ادەپ كودەكسىنىڭ نورمالارىن بۇزعانى ءۇشىن تارتىپتىك جازا قولدانۋ ءۇشىن ماتەريالدار بۋراباي اۋدانىنىڭ اكىمىنە جولداندى. بۋراباي اۋدانى اكىمىنىڭ 2023 -جىلعى 8-تامىزداعى وكىمىمەن ولجاس نۇرماعامبەتوۆكە «قاتاڭ سوگىس» تۇرىندە تارتىپتىك جازا قولدانىلدى»، - دەپ بەينەۇندەۋ جاسادى دۋمان ابىليەۆ الەۋمەتتىك جەلىدەگى پاراقشاسىندا.

سونىمەن قاتار، دەپارتامەنت باسشىسى ادەپ كودەكسىنە سايكەس مەملەكەتتىك قىزمەتشىلەر ازاماتتارمەن قارىم-قاتىناستا ادەپتىلىك تانىتۋ، دورەكىلىك، ءقادىر- قاسيەتىن كەمسىتۋ، ادەپسىزدىك جانە بەيادەپ مىنەز-قۇلىق فاكتىلەرىنە جول بەرمەۋ، وزدەرىنىڭ ارەكەتتەرىمەن جانە مىنەز-قۇلقىمەن ولاردىڭ تاراپىنان سىنعا سەبەپكەر بولماۋى قاجەت ەكەندىگىن ەسكە سالدى.

ايتا كەتسەك، بۇدان بۇرىن شۋچە اكىمىنە قاتىستى قىزمەتتىك تەكسەرىس ءجۇرىپ جاتقاندىعىن جازعان ەدىك.