ەنەسى ولگەن قارلىعاش بالاپاندارىن تاماقتاندىرعان اجەنىڭ ارەكەتى جۇرتتى ەلجىرەتتى - ۆيدەو

استانا. قازاقپارات - قىتايدا تۇراتىن قازاق اجەنىڭ ارەكەتى ەلدى ءسۇيسىندىردى.

قىتايدىڭ الەۋمەتتىك جەلىلەرىندە قازاق اجەنىڭ ەنەسى ولگەن قارلىعاش بالاپاندارىن تاماقتاندىرىپ جاتقان ۆيدەوسى كەڭىنەن تاراعان.

ۆيدەودا اجە ءوزى تويعا كەتكەندە توشالا ۇيىنە ۇيا سالعان قارلىعاشتىڭ ەنەسىن مىسىق جەپ قويعانىن ايتادى.

جانى اشىعان اجە قارلىعاش بالاپاندارىنا انالىق مەيىرىمىن توگىپ، تاماقتاندىرىپ جاتقانى ۆيدەوعا تۇسىرىلگەن. اجە بالاپاندارعا كۇرىش قايناتىپ بەرەتىنىن، جۇرمىرتقا بەرەتىنىن ايتادى.

مەيىربان انانىڭ بۇل ءىسى جەلى قولدانۋشىلارىنىڭ ىستىق ىقىلاسىنا بولەنىپ، قىزۋ تالقىسىنا ءتۇسىپ جاتىر.

«قازاق - وتە مەيىربان حالىق»، «انانىڭ مەيىرىمى شەكسىز»، «اپا، بۇل مەيىرىمىڭىزدى اللا تاعالا ساۋاپقا جازسىن»، «سول جاقتاعى ءبىرىنشى بالاپانعا ازىق از ءتيىپ جاتىر»، «مەيىرىم قانمەن بەرىلەدى! كەرەمەت كورىنىس!»، «قۇداي-اي! وبال بولعان ەكەن. قاناتتارى قاتايىپ ۇشىپ كەتسىن! قارلىعاش قۇس تا اۋليە عوي!»، دەپ جازادى پىكىر قالدىرۋشىلار.

اۆتور:

ريزابەك نۇسىپبەك ۇلى