التاي ولكەسىندە قازاق ءانى شىرقالدى

استانا. قازاقپارات - رەسەيدىڭ التاي ولكەسىنىڭ بارناۋىل قالاسىندا قاراعاندى وبلىسى تاتتىمبەت اتىنداعى اكادەميالىق ۇلتتىق اسپاپتار وركەسترىنىڭ «ۇلى دالا سازى» اتتى كونسەرتى ءوتتى، دەپ حابارلايدى قازاقپارات.

تاتتىمبەت اتىنداعى اكادەميالىق وركەستر الەمنىڭ 40 تان استام ەلىندە گاسترولدىك ساپاردا بولىپ، الەمگە تانىلسا دا بارناۋلدا قازاقستاننىڭ سىرتقى ىستەر مينيسترلىگىنە قاراستى وتانداستار قورىنىڭ ۇيىتقى بولۋىمەن ءبىرىنشى رەت ونەر كورسەتتى.

كونسەرتتىڭ وتۋىنە سەپتىگى تيگەن تاعى ءبىر ۇيىم - التاي ولكەسىندەگى قازاق ۇلتتىق اۆتونومياسى. اۆتونوميا جەتەكشىسى مۇرات بەكمۇراتوۆتىڭ ايتۋىنشا، ۇلتتىق اۋەندەر بابالار رۋحىن وياتادى. ءبىر جارىم ساعاتقا سوزىلعان كونسەرتتىڭ سوڭىندا قانداستارىمىز «اتامەكەن» ءانىن قوسىلا شىرقادى.

تاتتىمبەت اتىنداعى اكادەميالىق وركەستر مۇشەلەرىنە التاي ايماعىنىڭ گۋبەرناتورى ۆيكتور تومەنكو، التاي ايماعىنىڭ زاڭ شىعارۋشى ورگانىنىڭ ءتوراعاسى الەكساندر رومانەنكو، بارناۋىل قالاسىنىڭ اكىمى ۆياچەسلاۆ فرانك جانە بارناۋىل قالالىق دۋماسىنىڭ ءتوراعاسى بۋيەۆيچ گالينا ىستىق ىقىلاستارىن ءبىلدىرىپ، ارنايى گۇل شوقتارىن جىبەردى.

ق ر پارلامەنتى دەپۋتاتتارى عالياسقار سارىبايەۆ پەن بولات كەرىمبەك جانە جازۋشىلار بوتا بامان، ءجادي شاكەن ۇلى، كادىربەك قۇنىپيا ۇلى، اقىن، جۋرناليست اۋىت مۇقيبەك ۇلى بار زيالى قاۋىم وكىلدەرى جەرگىلىكتى تۇرعىندارمەن تىلدەسىپ، ۇسىنىس-پىكىرلەرىن تىڭدادى.

كونسەرتتىڭ جابىلۋ سالتاناتىن تۇيىندەگەن «وتانداستار قورىنىڭ» پرەزيدەنتى ابزال ساپاربەك ۇلى ءوز سوزىندە ستراتەگيالىق ارىپتەس ەكى ەل اراسىندا ساياسي- ەكونوميكالىق، ينۆەستيتسيالىق ىنتىماقتاستىقپەن قاتار، مادەني-گۋمانيتارلىق بايلانىستار جوعارى دەڭگەيدە ەكەنىنە توقتالىپ، وسى كونسەرت تە حالىقتار اراسىنداعى دوستىق قارىم-قاتىناسقا وڭ سەپتىگىن تيگىزەدى دەپ سەنىم ءبىلدىردى. جالپى، وتانداستار قورىنىڭ ەتنيكالىق قازاقتارمەن قاتار، كەزىندە قازاقستاندا تۋىپ- وسكەن، كەيىننەن ءوز تاريحي وتانىنا ورالعان بۇرىنعى وتانداستارمەن دە جۇمىس جۇرگىزۋگە جاۋاپتى رەسمي مەكەمە ەكەنىن اتاپ ءوتتى.

سونداي-اق، قور باسشىسى ابزال ساپاربەك ۇلى التاي ولكەسىندەگى قازاق ۇلتتىق اۆتونومياسىنىڭ جەتەكشىسى مۇرات بەكمۇراتوۆتى قازاقستان رەسپۋبليكاسى پرەزيدەنتى قاسىم-جۇمارت توقايەۆتىڭ العىس حاتىمەن ماراپاتتادى. سونىمەن قاتار، ءبىرقاتار بەلسەندى ازاماتتارعا، اتاپ ايتقاندا، جانات مىرزاحمەت ۇلىنا، جانار سۇلەيمەنوۆاعا، باقىتجان سولتانعازينوۆاعا، ايدا بەكسۇلتانوۆاعا وتانداستار قورىنىڭ العىس حاتى جانە «العىس» ەستەلىك مەدالى تابىس ەتىلدى.