قازاقتىڭ تاعى ءبىر قارا نارى قۇلادى
1942 -جىلى قىركۇيەكتەن 1944 -جىلى ماۋسىمعا دەيىن دوسىمبەك بايمۇرات ۇلى سالدىرعان شاپقى ءىشى بولگەنساي باستاۋىش مەكتەبىنىڭ ءۇشىنشى سىنىبىنا دەيىن وقىعان. وتباسى جاعدايىنا بايلانىستى وقۋىن جالعاستىرا الماي، 1945 -جىلى مامىردان 1947 -جىلعا دەيىن بايدىڭ مالىن باعادى. ءۇش ايماق (ىلە، التاي، تارباعاتاي) ازات بولعان 1946 -جىلدان كەيىن، ىلە ايماعى كۇنەس اۋدانىننىڭ ورتالىعى بەستوبەدە ورتالاۋ مەكتەپ اشىلادى. وسى مەكتەپكە، ءال- اۋقاتى تومەن كەدەي بالالارىنان قىرىق نەشە بالانى ۇكىمەت قارجىسىمەن جاتاقتا جاتقىزىپ، وقىتادى. ساعات ۇكىمەتتىڭ وسى قامقورلىعىنا ىلىگىپ 1947 -جىلى قىركۇيەكتەن 1951 -جىلى ماۋسىم ايىنا دەيىن تولىقسىزدى وسى ارادادان ۇزدىك بىتىرەدى دە، سول جىلى شىنجاڭ ولكەلىك بيۋرو كادرلار مەكتەبىنىڭ ءۇشىنشى كەزەكتى وقۋىنا ەمتيحان بەرىپ قابىلدانادى. ۇرىمجىدە ءبىر جىلدان ارتىق بيۋرو مەكەمەسىندە وقىپ بىتىرگەننەن كەيىن، 1952 -جىلى قازان ايىندا «شىنجاڭ گازەتى» مەكەمەسىنە جولدامامەن قىزمەتكە تۇرادى. ون جەتى جاسىندا اقپارات كاسىبىنىڭ تابالدىرىعىن وسىلاي اتتاعان ول بۇل مەكەمەدە جاڭا كەلگەندەر وتەتىن العاشقى وتكەلدە كوشىرمەشى، كوررەكتور، قالاماقى ەسەپتەۋ، حابار- ماقالا تىركەۋ سياقتى ۇساق- تۇيەك ىستەردىڭ ىرقىنا كونىپ، ىعىنا جۇگىردى.
س. جايپاق ۇلى وزىنە تيەسىلى مىندەتتەردى ورىنداي ءجۇرىپ، رەداكتورلارعا ەلىكتەپ ماقالا وڭدەۋگە، ماقالا جازۋعا تالپىنادى. تالپىنىسى تابىسقا جەتكىزەدى. سول كەزدە قالامى توسەلگەن ءتىلشى، قازاق ءتىلى گازەتىنىڭ باس رەداكتورى قالي ىسقاق ۇلى، رەداكسيا ءبولىمىنىڭ مەڭگەرۋشىسى بۇلانتاي دوسجانين، ءبىر بەتتىڭ جاۋاپتى رەداكتورى راقىمەتوللا اپشە ۇلى سياقتى اقىن- جازۋشى، رەداكتور اعالارىنىڭ نازارىنا ىلىگەدى. ءبىر جولى باس رەداكتور قالي ىسقاق ۇلى ول وڭدەگەن ءبىر ماقالانى بۇكىل رەداكسيا (حانزۋ، ۇيعىر، مۇڭعۇل تىلىندەگى) بويىنشا اشىلعان جينالىستا ۇلگى رەتىندە وقىپ ونى ماداقتايدى. وسىدان شابىت العان ساعات تىلشىلىك ماماندىعىن يگەرۋگە بارعان سايىن ۇمتىلا بەرەدى. بوس ۋاقىتىندا حانزۋ ءتىلى مەن فوتو سۋرەت ءتۇسىرۋدى ۇيرەنەدى. ول كەزدە رەداكسيادا ادام از، گازەت رەداكتورلارعا مۇقتاج ەدى. نەبارى ەكى جىل ىشىندە س. جايپاق ۇلى كوررەكتورلىقتى يگەرىپ بولىپ، رەداكتسيا بولىمىنە اۋىسادى. سودان كوپ وتپەي گازەتتىڭ ءبىر بەتىنىڭ جاۋاپتى رەداكتورى بولىپ شىعا كەلەدى. 1962 -جىلعا دەيىن «شىڭجاڭ گازەتى» قازاق رەداكسياسىندا رەداكتور، ءتىلشى، فوتو ءتىلشى بولىپ قىزمەت جاسايدى.
1962 -جىلى شىڭجاڭ پارتيا كوميتەتى قازاق تىلىندە «ياچيكا تۇرمىسى» جۋرنالىن شىعارۋدى بەكىتەدى. بۇل جۋرنالدا ساعات سەگىز جىل بويى قازاق رەداكسيا ءبولىمىنىڭ مەڭگەرۋشىسى بولىپ جۇمىس جۇرگىزەدى.
مادەنيەت زور توڭكەرىسىنىڭ الاساپىرانى ارناعا تۇسە باستاعان كەزدە «7-مامىر كادرلار مەكتەبىنە» بارىپ شىنىعۋ دەگەن ناۋقان باستالدى. بۇعان اۋەلى شىڭجاڭ اۆتونوميالى رايوندىق پارتيا- ۇكىمەت سالاسىنداعى كادرلار باراتىن بولدى. ساعات سولارمەن بىرگە اۆتونوميالى رايون جاعىنان قۇتىبي اۋدانىندا قۇرىلعان «7-مامىر كادرلار مەكتەبىنە» بارادى.
«7-مامىر كادرلار مەكتەبىنىڭ» ديرەكتورى بولىپ تۇرعان شىڭجاڭ اۆتونوميالى رايوندىق پارتيا كوميتەتى ۇگىت ءبولىمىنىڭ باستىعى فۋۋىن مىرزانىڭ ۇيعارۋىمەن ورتالىقتان كەلگەن ەكى ادامعا اۋدارمادان ەمتيحان تاپسىرادى. ەمتيحاننان سۇرىنبەي وتكەن ساعات بەيجىڭگە بارىپ ورتالىق حالىق راديوستانتسياسىنىڭ قازاق تىلىندە اشىلاتىن راديونىڭ نەگىزىن قالايدى. بۇل 1969 -جىلى قاراشانىڭ سوڭعى كەزى ەدى. ءسويتىپ، ساقاڭنىڭ ورتالىق حالىق راديو ستانتسياسىنداعى 15 جىلدىق ءومىر جولى مىنە، وسىلاي باستالعان بولاتىن. استانامىز بەيجىڭدەگى قازاق راديوسى 1971 -جىلى 1-مامىرىندا قۇرىلدى. س. جايپاق ۇلى وسى راديودا تابانى كۇرەكتەي 15 جىل جاۋاپتى بولىپ، ۇجىمدى باسقارادى.
بۇل ۇجىمدا بەس ۇلتتان قۇرىلعان 18 ادام بولىپ، ءبىر- بىرىنەن ۇيرەنىپ، ءبىرىنىڭ ارتىقشىلىعىمەن ءبىرىنىڭ ولقىلىعىن تولتىرىپ وتىراتىن. ولار توڭىرەكتىڭ ءتورت بۇرىشىنان ءتۇرلى كاسىپتەن، ءتۇرلى ماماندىقتان كەلگەن بولسادا قىسقا ۋاقىتتىڭ ىشىندە ءوز ارا شۇيىركىلەسىپ قىزمەتتى بارلىق ىنتا- پەيلىمەن بەرىلە ىستەدى. جۋباۋچۋان (ۇلتى حانزۋ) مىرزا ساقاڭنىڭ ورىنباسارى بولدى. ەكەۋى ءبولىمنىڭ قىزمەتىنەن شاشاۋ شىعارماۋعا ۇمتىلادى. بەرەكە- بىرلىگى جاقسى بولعاندىقتان پارتيا مەن حالىق تاپسىرعان مىندەتتى شاما شارقىنشا ورىندايدى.
جاسىرارى جوق، ءارقانداي ءىس بىردەن ءساتتى بولا بەرمەيدى. راديو ەفيرگە شىققان تۇس مادەنيەت زور توڭكەرىسىنىڭ قۇرساۋى قول- اياعىن بوساتپاي، ءبىر مەزگىل كىبىرتىكتەپ قالادى. ىلعي اۋدارما ماتەريال بەرۋدەن اسا المايدى. جەرلىك قازاق اۆتورلاردىڭ شىعارماسىن بەرۋگە مۇمكىندىگى بولمايدى. وزىنەن ءتىلشى شىقپايدى. سونىمەن، «ولاي تارتسىڭ وگىز ولەدى، بۇلاي تارتساڭ اربا سىنادىنىڭ» كەرىن كيىپ، تۇيىققا تىرەلەدى. ءسۇيتىپ جۇرگەندە باعىنا جاراي قوعامدىق جاعدايدا كەنەت وزگەرىس بولا باستايدى. پارتيا ورتالىق كوميتەتىنىڭ كورەگەندىگىمەن «تورتتىك توبە» دەيتىن الاپات بيلىكتەن الاستاتىلدى. بۇعان بۇكىل ەل حالقى قۋاندى. بۇرىنعى قات- قابات رەسميەت- كەدەرگىلەر الىندى. «گۇل بىتكەن جاينادى، ءتىل بىتكەن سايرادى». رەفورما مەن سىرتقا ەسىك اشۋدىڭ العاشقى ءۇردىسى باستالدى. بۇرىنعىداي ەمەس، ءوز الدىنا تىلشىلىك ىستەۋگە، اقىن- جازۋشى مەن ونەر ادامدارىنان سۇحبات وتكىزۋگە مۇمكىندىك الادى.
1980 -جىلى شىلدە ايىندا كۇنگەي مۇقاجان ۇلى، ماقاتان ءشارىپقان ۇلى، جاقىپ مىرزاقان ۇلى قاتارلى جازۋشىلار بەيجىڭگە ماجىلىسكە كەلەدى. سوندا س. جايپاق ۇلى ولاردى قازاق ادەبيەتى تۋرالى شولۋ جازۋعا ۇسىنىس ەتەدى. بۇل ءۇش قالامگەر اقىلداسا كەلىپ «كوركەيۋ جولىنداعى قازاق ادەبيەتى» دەگەن تاقىرىپتا ادەبي شولۋ جازادى. شولۋ سول جىلى شىلدەنىڭ 5- جۇلدىزى راديودا وقىلادى. جىيىرما نەشە جىل اتى ءوشىپ، ءىز- توزسىز كەتكەن اعا بۋىن جازۋشىلاردان 30 نەشە كىسىنىڭ اتى اتالىپ، اتاعى ايگىلەنەدى. وسى ادەبي شولۋ جاريالانعاننان كەيىن قالىڭ تىڭدارمان قاۋىمدى، وتە- موتە ونەر ادامدارىن قۋانىشقا بولەپ، ۇمىتكە جەبەگەندىگى اۋىزدان- اۋىزعا اڭىز بولىپ تارايدى. تىڭدارماندار رەداكسياعا حات جازىپ، العىس ايتىپ ماراپاتتايدى. ءبىرىنشى بولىپ اقىن، قوعام قايراتكەرى قۇرمانالى وسپان ۇلى حات جازادى. ول كىسى شولۋدى ەستىگەنىن ايتىپ قانا قويماي، وزگەلەردىڭ دە جاقسى لەبىزىن جەتكىزە كەلىپ: «شولۋدىڭ قۇرىلىمى، مازمۇنى، ءتىل كوركەمدىگى جاعىنان تۇجىرىمدى، كوكەيگە قونىمدى، شىندىق شىمىر بەينەلەگەن» دەپ جوعارى باعا بەرىپ جازعان ەدى حاتىندا.
ولار ءۇشىن 1970 -جىلداردىڭ سوڭى مەن 1980 -جىلداردىڭ باسى قازاق راديوسىنىڭ التىن ءداۋىرى ەسەپتەلەدى. بۇل جىلدارى ساقاڭ ءبولىم اتىنان قازاقتىڭ ءان- كۇيلەرىن كوبەيتۋ تۋرالى جوعارىعا دوكلات جازادى. دوكلات كوپ وتپەي بەكىتىلەدى. سونىمەن 1979 -جىلى «تورتتىك توبە» تالقاندالىپ، زامان جاقسارا باستاعان تۇستا ورتالىق حالىق راديو ستانتسياسى مەن شىڭجاڭ حالىق راديو ستانتسياسى بىرلەسىپ، كۇيتىڭ قالاسىندا باس قوسىپ، ءۇش ايماقتىڭ ءان- بي ۇيىرمەسىنەن 70-80 ادام شاقىرىپ، ەكى ايعا جۋىق ۋاقىتتا 100 دەن استام ءان- كۇيدى تاسپاعا جازىپ الادى. بۇعان ورتالىق حالىق راديو ستانتسياسىنىڭ قازاق بولىمىنەن مۇقامەت پەن ساعات بارعان ەدى. بۇل رەت جازىپ الىنعان ءان- كۇيلەر راديونى شىت جاڭا بەينەگە ەنگىزەدى. وسى ءان- كۇيلەردىڭ ءبىرتالايى كۇنى بۇگىنگە دەيىن بەرىلىپ كەلەدى.
مۇنىڭ ىشىندە «اق تاماق»، «مايرا»، «اق بيداي»، «اباي كۇنىم- اي»، «القوڭىر»، «سۇرجەكەي» ت. ب سەكىلدى حالىق اندەرى مەن حالىق كومپوزيتورلارىنىڭ اندەرىن ازات ەتىپ راديودا جاريالايدى. بۇل حالىق اراسىندا ۇلكەن ءدۇمپۋ قوزعايدى.
حالقىمىز «كوش جۇرە تۇزەلەدى» دەمەپ پە ەدى. قۇرىلعانىنا نەبارى 10 جىلعا جەتپەگەن، ونىڭ بىرنەشە جىلى سىناق رەتىندە جارتى ساعاتتىق اۋدارما حابار بەرۋمەن جۇرگەن جاعدايدا جاڭاعىداي جەتىستىككە قول جەتكىزۋ وڭاي ەمەس ەدى. سول تۇستاردا استاناعا كەلگەن اقىن- جازۋشىلاردىڭ شىعارمالارىن وزدەرىنە وقىتىپ تاراتا باستايدى. مىسالى، ومارعازى ايتان ۇلى، قاۋسىلقان قوزىبايەۆ، ماقاتان ءشارىپقان ۇلى، كۇنگەي مۇقاجان ۇلى، قۇرمانالى وسپان ۇلى، ەرعالي ءابىلقايىر ۇلى، ابدىرەشىت بايبولاتوۆ، جۇماباي ءبىلال ۇلى، ورازقان احمەتوۆ، ءجۇمادىل مامان، اكپار ءماجىت ۇلى سياقتى قالامگەرلەرىمىز راديودا پوەزيالىق، پروزالىق شىعارمالارىن وقىپ ءوز ۇندەرىن الەمگە تاراتىپ، توماعاسىن العان قىرانداي شارىقتايدى. مۇنىڭ ءوزى وشكىندەپ، ءسونىپ بارا جاتقان قازاق مادەنيەتى مەن ادەبيەتىنىڭ شىراعىن قايتا جاققانداي بولادى. قالىڭ تىڭدارماننىڭ كوڭىل- كۇيىن سەرگىتىپ، بولاشاققا دەگەن سەنىمىن كۇشەيتتى. ايگىلى انشىلەرىمىزدىڭ بەيجىڭگە كەلىپ ءتۇرلى مادەني شارالارعا قاتىسۋ ورايىن قالت جىبەرمەي، ولاردى ستۋدياعا شاقىرىپ، دىبىس تاسپاسىنا ءان جازدىرىپ الىپ قالۋدى ادەتكە اينالدىرادى. مىسالى، قاميت ىسقاق ۇلى، كامال ىشىكباي، كۇلمان شۇلەنباي قىزى، ارزىگۇل تۇرسىن قىزى سىقىلدى انشىلەردەن ورايى كەلگەندە تاسپاعا ءان جازدىرىپ الىپ قالىپ وتىرعان. مادەنيەت زور توڭكەرىسى تۇسىندا قازاق حالقىنىڭ ءتۇرلى مادەنيەتى، اسىرەسە دومبىرا- كۇي مادەنيەتى جوعالۋعا شاق قالعان ەدى. وسىنداي كوكەيكەستى ماسەلەنى ەسكەرىپ 1980 -جىلى ساعات جايپاق ۇلى ورتالىق حالىق راديو ستانتسياسىنىڭ باسشىلارىنا حالىق ءان- كۇي مۇرالارىن جيناۋ جونىندە ءوتىنىش جازۋدى قولعا الادى. ستانتسيا باسشىلىعى بۇل ءوتىنىشىن بەكىتەدى. شىڭجاڭ قازاعىنىڭ ايگىلى كۇيشىلەرىنەن تايىر بەلگىباي ۇلى، داۋلەت حالىق ۇلى، كامال ماقاي ۇلى، عيزات سەيىتقازين سيقتى دومبىراشىلاردى بەيجىڭگە ۇسىنىسپەن شاقىرىپ، كوپتەگەن حالىق كۇيلەرى مەن ءوز كۇيلەرىن التىن قورعا جازدىرادى.
قىزمەت بار جەردە تابىس تا، ولقىلىق تا، قايشىلىق تا، پىكىر تالاس تا ءومىر سۇرەدى. بۇل تابيعىي قۇبىلىس. س. جايپاق ۇلى راديودا جۇمىس جاساعان 15 جىل ۋاقتىن تىپ- تىنىش، مامىراجاي، اقاۋسىز، كەدەرگىسىز، ىلعىي ءساتتى وتكىزدى دەسەك اقىلعا سيمايدى. قىزمەت بارىسىندا كەمشىلىك تە، تالاس- تارتىس تا بولادى. الايدا ولار مۇلدە وتاسا المايتىن مۇددە قاقتىعىسىن تۋدىرعان ەمەس. قايتا قىزمەتتى جاقسارتۋعا، ىنتىماقتى كۇشەيتۋگە، العا باسۋعا، جاڭالىق جاراتۋعا باعىتتالعان كوزقاراسپەن جۇرەدى. تانىم، پىكىر جاعىنداعى ۇقساماستىقتان تۋىنداعان ۋاقىتتىق قۇبىلىس دەپ بىلەدى. ولاردىڭ بارلىعىن ءوز كەزىندە شەشىمىن تاۋىپ وتىردى.
العاش ساعات جايپاق ۇلى جەتەكشىلىك ەتكەن ورتالىق قازاق راديوسى قازىر وتىزعا تارتا ءتىلشى، رەداكتور، اۋدارماشى بار، 44 مەملەكەتكە ءۇنى جەتەتىن مەملەكەتتىك اقپارات قۇرالىنا اينالدى. ەفەرگە شىعاتىن ساعات سانى كوبەيدى. ول زامانىنداعىداي ەمەس، شەكتەۋسىز ءداۋىر تالابىنا ۇيلەسىمدى، سان- سانالى ايدارلار اشىلدى. مۇنىڭ ىشىندە «اۋىل اۋانى»، «پاراسات»، «قاينار»، «زاڭ جانە زامانا»، «ەكونوميكا ايدىنى»، «شيپاگەرلىك»، «تەحنيكا تەتىگى»، «الەم اياسىندا»، «ونەر ولكەسىندە» ت. ب. لار بار. وسىعان قاراپ قۋاناسىڭ، مارقاياسىڭ. قىزمەتكەرلەردىڭ ءبارى جاستاستى، قىزمەتتىڭ ساپاسى مەن مادەني ورەسى ارتتى.
س. جايپاق ۇلى 1984 -جىلى ورتالىق راديو ستانتسياسىنان اۋىسىپ شىنجاڭ حالىق باسپاسىنا كەلەدى. ول 1984 -جىلى قاراشادان 1995 -جىلى ماۋسىمعا دەيىن شىڭجاڭ حالىق باسپاسىنىڭ قازاق رەداكتسيا بولىمىندە ورىن باسار مەڭگەرۋشى، تەتە اعا رەداكتور، «وقىرمان ورەسى» جۋرنالى باس رەداكتورىنىڭ ورىنباسارى بولىپ جۇمىس ىستەيدى. ساقاڭ اقپارات عىلىمىنىڭ بەلدى سالاسى ەسەپتەلەتىن گازەت- جۋرنال، راديو جانە باسپا ءسوز سالاسىندا 40 نەشە جىل جەمىستى قىزمەت ىستەيدى. اشىعىن ايتساق، س. جايپاق ۇلى ءوز ومىرىندە ءتورت سالانىڭ كاسىبىنە ارالاسىپتى. وسى ءتورت سالادا ىستەگەن ەڭبەگىنىڭ ءبارىن جىپكە ءتىزىپ ايتىپ وتىرماي- اق، تەك شىڭجاڭ حالىق باسپاسىندا ىستەگەن كەزىندە ءوزى جاۋاپتى رەداكتور بولىپ شىعارعان كىتاپتار مەن ادەبي اۋدارمالاردىڭ باستىلارىن ايتا كەتەيىك. ولار: «قىتايدىڭ قازىرگى زامان تاريحى تۋرالى ءبىلىم» (ەكى كىتاپ) ، «سوتتسياليزم تاريحى» ، «ءتىل عىلىمى ماسەلەسى تۋرالى»، «پسيحولوگيا تۋرالى سۇراۋ- جاۋپ»، «تاريح ءبىلىمى سوزدىگى»، «زاڭ ءبىلىمى تۋرالى» (7 كىتاپ)، «جاڭا داۋىردەگى پارتيا قۇرلىسى» ت. ب. 200 گە تارتا كىتاپتى رەداكتسيالاپ باسپاعا جولداپ، قىرىق نەشە كىتاپتىڭ جاۋاپتى رەداكتورى بولادى. «وقىرمان ورەسى» جۋرنالىنىڭ 60 سانى ساقاڭنىڭ جاۋاپكەرشىلىگىندە جارىق كوردى. اۋدارعان ادەبي تۋىندىلارى: «باتىسقا ساپار» (رومان، ەكى ادام بىرلەسىپ اۋداردىق)، «ەرگەجەيلى ەلى مەن الىپتار ەلى» (روماننان ءۇزىندى)، «ءومىر»، «ءبىز جاستار» (پوۆەست)، ۋاڭميڭنىڭ «سوڭعى تاۋ» ، «ساپىرىلعان سالاشىلار» (اڭگىمە)، حانزۋتىلىندە جازاتىن قالامگەر اكپار ءماجىت ۇلىنىڭ «اقساق قۇلان»، «ون بەستەگى حاليدا»، «اتتەڭ رومكاباي» ت. ب. اڭگىمەلەرى. مۇنىڭ سىرتىندا حانزۋ اۆتورلارىنىڭ شىعارمالارىنان ءتارجىمالاعان ون نەشە اڭگىمە مەن ءوزى قۇراستىرعان ءۇش كىتاپ بار. مىنە، وسىنداي ەڭبەكتەرىنەن تىس، ءوزى قالام تەربەپ جازعان وچەرەك، شالقىما، ەسسە، جاڭا جىلعا ارناۋ سياقتى ادەبي ماقالالارى دا ءوز زامانىندا وقىرمانىڭ العىسىن الىپ، جاقسى اسەر قالدىرعان ەدى.
ۇكىمەت جارتى عاسىر توككەن تەرى مەن ەلگە سىڭىرگەن ەڭبەگىن باعالاپ ساقاڭنىڭ ءومىربايانى مەن ەڭبەگى تۋرالى جازىلعان شاعىن تانىستىرۋ 1989 -جىلى بەيجىڭدەگى كىتاپ باسپا مەكەمەسى جاعىنان جارىق كورگەن «جۇڭگونىڭ باسپا ءسوز سالاسىنداعى ايگىلى ادامدار سوزدىگىنىڭ» (قىتاي تىلىندە) 481-بەتىنە جانە 1994 -جىلى لياۋليڭ ۇلتتار باسپاسى جاعىنان جارىق كورگەن «قىتاي از ۇلت ماماندارى، وقىمىستىلارى سوزدىگىنىڭ» (قىتاي تىلىندە) 593-بەتىندە بەرىلەدى. ال 1999 -جىلى بەيجىڭدە جارىق كورگەن «دۇنيە ءبىلىم قامباسى» اتتى ۇلكەن جەلىلەس كىتاپتىڭ ءبىرىنشى تومىنىڭ 991-بەتىندەگى «دومبىرا» تاقىرىپتاعى حانزۋ تىلىنە اۋدارىلعان وچەرگى باسىلادى ءارى وچەرك التىن مەدالمەن سىيلاندى.
ساقاڭ زەينەت جاسىنا تولىپ دەمالىسقا شىققاننان كەيىندە قالامىن قولىنان تاستاعان جوق. جۇبايى، جۇيرىك جۋرناليست، مارقۇم تۇرسىن جولىنبەت قىزى ەكەۋكە ءبىر- بىرىنە رۋحاني دەمەۋشى بولا ءجۇرىپ، حالقىنا ومىرشەڭ تۋىندىلارىن ۇسىنىپ ۇلگەردى. ساقاڭنىڭ سوڭعى جىلدارى شىققان «ءىز» دەگەن كىتابىنا اۆتوردىڭ ءومىرباياندىق ەسسەلەرى، وچەركتەرى مەن سىر سۋحباتتارى ەنىپ، وقىرماندارىنىڭ جاقسى باعاسىن الادى.
«ءورلى- قىرلى ءومىر جولىمدا شىعانداپ شىڭعا، قارا ءۇزىپ وزىپ كەتپەسەم دە، شاما شارقىمشا تالاي كەزەڭدەردى استىم. ومىردە وسى جۇرىسىمە ريزامىن. مەن ەكى ءسوزدىڭ بىرىندە بۇگىنگى باقىتتى زاماندا جاساعانىما رازى- حوش بولىپ «ءومىر ساعان راحمەت!» دەگەن ءسوز ماتەلىمە اينالىپ كەتكەن كورىنەدى»، - دەپ مارقۇم ماقات اعانىڭ ءوزى جازىپ كەتكەنىندەي، شىنىندا سولاي، وتكەن وگەي ءومىردىڭ اشتى- تۇشتىسىن ازدا بولسا تاتىپ قالعان ساعات جايپاق ۇلى سەكىلدى قاريالاردىڭ قازىرگى باقىتتى زامانىن ەرەسەن قاستەرلەپ، ءداۋىردىڭ تالابىنا ساي بۇكىل كۇش- قۋاتىن قوعام قاجەتىنە سارقا جۇمساعانى انىق. «ءومىر ساعان راحمەت!» دەگەن مارقۇم ساقاڭنىڭ ءوزىنىڭ ۇيرەنشىكتى ماتەلىن بىزدە قايتالاي بەرگىمىز كەلەدى.. .
ساعات جايپاق ۇلى 2023 -جىلى 12-ماۋسىمدا 88 جاسقا قاراعان شاعىندا قايتىس بولادى.
باقۇل بولىڭىز، ارداقتى ساعات اعا!
ءالىمجان ءاشىم ۇلى
Abai.kz