ماڭعىستاۋدا امال مەرەكەسىنە وراي وتپان تاۋدا قىرىقتان اسا كيىز ءۇي تىگىلدى

اقتاۋ. قازاقپارات - ماڭعىستاۋدىڭ وتپان تاۋ باۋرايىنداعى «قاراشاڭىراق» كەشەنىندە امال مەيرامى كەڭ اۋقىمدا اتاپ ءوتىلدى.

ءبىرقاتار مادەني-تانىمدىق ءىس-شارالار ۇيىمداستىرىلدى، دەپ حابارلايدى قازاقپارات ءتىلشىسى.

امال مەيرامى اياسىندا وتپان تاۋ باۋرايىنا 42 اقشاڭقان كيىز ءۇي تىگىلدى. بيىلعى شارانى لايىقتى ۇيىمداستىرۋ ءۇشىن جاۋاپكەرشىلىكتى توبىش اتا ۇرپاقتارى العان بولاتىن.

«بۇل مەيرام بىزگە اتا-بابامىزدان مۇرا بولىپ جەتكەن. اسىرەسە كىشى ءجۇز قازاقتارى ءۇشىن 14 ناۋرىز - امال مەرەكەسى، جەرگىلىكتى حالىق اراسىندا كورىسۋ كۇنى ەرەكشە اتاپ وتىلەدى. وزىمىزگە تاپسىرىلعان مىندەتتى ابىرويمەن، جاقسى اتقارۋدامىز دەگەن سەنىمدەمىن»، - دەدى ۇيىمداستىرۋشىلاردىڭ ءبىرى قالنياز وڭداباي.

سونداي-اق مەيرام اياسىندا قولونەر شەبەرلەرىنىڭ بۇيىمدارىنان كورمە ۇيىمداستىرىلىپ، كورەرمەن كوزايىمىنا اينالدى. دۋماندى مەرەكە «استانا سازى» فولكلورلىق انسامبلىنىڭ كونسەرتىمەن جالعاستى.

جالپى، شاراعا 10 مىڭعا جۋىق ادام قاتىستى. بۇدان بولەك ەسترادا ءانشىسى جەڭىس ىسقاقوۆا، ءداستۇرلى ءانشى ايگۇل قوسانوۆا، قاراقالپاقستان ەلىنىڭ ءانشىسى جەڭىسبەك پيازوۆ ارنايى كەلىپ، ساحنادا ءوز ونەرلەرىن پاش ەتتى.

اۆتور

ينديرا ساتەنباي