نۇرسۇلتان نازاربايەۆتا بۇرىنعى ارتىقشىلىقتار بولمايدى - ەرلان سايروۆ
«بۇل زاڭعا توقتالساق، وسىعان دەيىن تۇڭعىش پرەزيدەنتتە اۋقىمدى باسىمدىقتار بولعان ەدى. وسى ورايدا پرالامەنت ماجىلىسىندە ءسوز سويلەۋ، وزىنە مينيسترلەردى شاقىرتۋ، مەملەكەتتىك ورگاندارعا ساۋالدار جولداۋ مۇمكىندىگى بولدى. سوندىقتان بۇل زاڭنىڭ كۇشى جويىلاتىنىن ەسكەرە وتىرىپ، ەندى بۇل ساياسي باسىمدىقتارى دا بولمايدى»، - دەدى ە. سايروۆ پارلامەنت پالاتالارىنىڭ بىرلەسكەن وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، ەكس- پرەزيدەنت تۋىستارىنىڭ زاڭ الدىندا قانداي دا ءبىر جاۋاپكەرشىلىگى بولسا، وندا ءتيىستى جازاسىن الۋى كەرەك.
سونىمەن قاتار دەپۋتات تۇڭعىش پرەزيدەنت مارتەبەسىنە قاتىستى نورمالار قامتىلعان 20 زاڭ بار ەكەنىن، وسى ورايدا ەل زاڭناماسىنا اۋقىمدى اۋديت جۇرگىزىلەتىنىن ايتتى.
«بۇل قۇجاتتاردا تۇڭعىش پرەزيدەنت ەڭبەگى تۋرالى ماسەلەلەر قامتىلعان. ءتيىستى اۋديت جۇرگىزىلگەننەن كەيىن، بۇل باپتاردىڭ دا كۇشىن جويۋ تۋرالى باستاما جاسالادى. بيىل ءماجىلىس دەپۋتاتتارى ءتيىستى جۇمىستى اتقاراتىن بولادى. نۇرسۇلتان نازاربايەۆ ەلدىڭ ەكس- پرەزيدەنتى بولىپ سانالادى. ونىڭ قىزمەتى قازاقستان رەسپۋبليكاسىنىڭ پرەزيدەنتى تۋرالى زاڭى اياسىندا رەتتەلەدى. بۇل قۇجاتتا ەكس- پرەزيدەنتتەرگە قاتىستى ناقتى باپتار قامتىلعان»، - دەدى ەرلان سايروۆ.
بۇدان بۇرىن حابارلانعانداي، ق ر پارلامەنتى پالاتالارىنىڭ بىرلەسكەن وتىرىسىندا «ق ر تۇڭعىش پرەزيدەنتى - ەلباسى تۋرالى» كونستيتۋتسيالىق زاڭنىڭ كۇشى جويىلدى دەپ تانۋ تۋرالى» كونستيتۋتسيالىق زاڭ قابىلداندى.
اتالعان زاڭ جوباسى جالپى ۇلتتىق رەفەرەندۋم ناتيجەسىندە قازاقستان كونستيتۋتسياسىنا ەنگىزىلگەن وزگەرىستەردى ىسكە اسىرۋ ماقساتىندا ازىرلەندى.
اۆتور
رۋسلان عابباسوۆ