كارىم ءماسىموۆتىڭ ءىنىسى اسا اۋىر قىلمىستار جاسادى دەپ ايىپتالۋدا

استانا. قازاقپارات - پاۆلودار وبلىستىق پوليتسيا دەپارتامەنتىنىڭ بۇرىنعى باستىعى پوليتسيا گەنەرال- مايورى نۇرلان ماسىموۆكە قاتىستى تەرگەۋ ءىسى اياقتالدى. بۇل تۋرالى قازاقپارات سىبايلاس جەمقورلىق اگەنتتىگىنە سىلتەمە جاساپ حابارلايدى.

«پاۆلودار وبلىستىق پوليتسيا دەپارتامەنتىنىڭ بۇرىنعى باستىعى پوليتسيا گەنەرال- مايورى ن. ماسىموۆكە، ونىڭ ورىنباسارى د. سيرازيديموۆكە جانە كاسىپكەر ە. ەۆكوۆيچكە قاتىستى اۋىر جانە اسا اۋىر سىبايلاس جەمقورلىق قىلمىستار جاسادى دەگەن كۇدىكپەن سوتقا دەيىنگى تەرگەۋدى اياقتادى. ءماسىموۆ پەن سيرازيديموۆ مەملەكەتتىك ساتىپ الۋدى وتكىزۋ جانە ۇلەستەس كومپانيالارمەن كەلىسىمشارتتارعا قول قويۋ كەزىندە قامقورلىعى ءۇشىن 90,3 ميلليون تەڭگە سوماسىندا پارا الدى دەپ ايىپتالۋدا»، - دەلىنگەن اگەنتتىك حابارلاماسىندا.

سونداي-اق ولار قارۋ-جاراق ساتىپ الۋعا ارنالعان 420 ميلليون تەڭگە سوماسىندا بيۋدجەت قاراجاتىن ۇرلادى دەپ كۇدىكتەلۋدە.

22- جەلتوقسانىندا وبلىس پروكۋراتۋراسى ايىپتالۋشىلاردى سوتقا بەردى.

ەسكە سالساق، قاڭتار وقيعاسىنان كەيىن پاۆلودار وبلىسى پوليتسيا دەپارتامەنتىنىڭ باسشىسى نۇرلان ءماسىموۆ قىزمەتىنەن بوساتىلدى.

كەيىنىرەك وعان ىزدەۋ جاريالانىپ، ول تۋرالى قانداي دا ءبىر اقپارات بەرگەن ادامعا 12 ميلليون تەڭگە سىياقى بەرىلەتىنى ءمالىم بولدى. شىلدە ايىندا نۇرلان ءماسىموۆ رەسەيمەن شەكارادان جالعان قۇجات ارقىلى وتپەك بولعان كەزدە ۇستالدى.

فوتو: obozrenie.kz