باۋىرجان ماقۇلبايەۆ - «ءادىل سايلاۋ ءۇشىن» شتابىنا شاعىم تۇسكەن جوق

الماتى. قازاقپارات - سايلاۋ كۇنى الماتىلىقتار «ءادىل سايلاۋ ءۇشىن» ۇيىمىنا زاڭگەرلىك كومەك سۇراپ جۇگىنگەن جوق.

بۇل تۋرالى باسپا ءسوز ءماسليحاتىندا «قازاقستان زاڭگەرلەر وداعى» الماتى قالالىق فيليالىنىڭ ءتوراعاسى، «ءادىل سايلاۋ ءۇشىن» قالالىق شتابىنىڭ جەتەكشىسى باۋىرجان ماقۇلبايەۆ ءمالىم ەتتى، دەپ حابارلايدى قازاقپارات ءتىلشىسى.

سپيكەر قايتا سايلاۋ قۇقىعىنسىز 7 جىلدىق پرەزيدەنتتىك مەرزىم - پوستكەڭەستىك كەڭىستىكتەگى ابسوليۋتتى جاڭالىق ەكەنىن اتاپ ءوتتى.

«7 جىل پرەزيدەنتتىك مەرزىمگە سايلانعان كانديداتقا ءوز باعىتىن جۇزەگە اسىرۋعا تولىق كوڭىل بولۋگە مۇمكىندىك بەرەدى جانە پرەزيدەنتتىك بيلىكتى مونوپولياسىزداندىرۋعا باعىتتالعان كونستيتۋتسيالىق رەفورمانىڭ جالعاسى بولىپ تابىلادى»، - دەدى باۋىرجان ماقۇلبايەۆ.

ونىڭ ايتۋىنشا، سايلاۋ كۇنى «ءادىل سايلاۋ ءۇشىن» شتابىنا ەشكىمنەن ارىز-شاعىم تۇسكەن جوق.

«دەسە دە، قوعام وكىلدەرى بارعان سايلاۋ ۋچاسكەلەرىندە ەسكەرتۋلەر بولدى. مىسالى، داۋىس بەرۋ كابينالارىنىڭ بىرىنە ەرلى-زايىپتىلار بىرگە كىرگەن، بۇل جاعدايعا بايلانىستى انىقتاۋ بارىسىندا جۇبايى مۇگەدەك بولىپ شىقتى جانە زاڭعا سايكەس، وعان سەنىمدى تۇلعانىڭ كومەگى قاجەت ەدى»، - دەدى سپيكەر.

سونىمەن قاتار، ول قىركۇيەك ايىندا قۇرىلعان «ءادىل سايلاۋ ءۇشىن» بىرلەستىگىنىڭ قۇرامىندا تەك زاڭگەرلەر عانا ەمەس، نوتاريۋستار، قورعاۋشىلار جانە 400 گە جۋىق ءتۇرلى مامان يەسى بار ەكەنىن ەسكە سالدى.