پرەزيدەنت سايلاۋىنا «اۋىل» پارتياسىنىڭ اتىنان كىم تۇسەتىنى بەلگىلى بولدى

استانا. قازاقپارات - «اۋىل» حالىقتىق-دەموكراتيالىق پاتريوتتىق پارتياسىنىڭ كەزەكتەن تىس ⅩⅩ سەزى ءوتىپ، الداعى پرەزيدەنت سايلاۋىنا پارتيا اتىنان تۇسەتىن ۇمىتكەردىڭ ەسىمى بەلگىلى بولدى، دەپ حابارلايدى قازاقپارات ءتىلشىسى.

پارتيا ءتوراعاسى ءالي بەكتايەۆ كەزەكتەن تىس ساياسي كەڭەستىڭ شەشىمى بويىنشا پرەزيدەنت سايلاۋىنا ۇمىتكەر رەتىندە قازاقستان فەرمەرلەر قاۋىمداستىعىنىڭ باسقارما ءتوراعاسى جيگۋلي مولداحالىق ۇلى دايرابايەۆ ۇسىنىلاتىنىن ايتتى.

«اۋىل» پارتياسىنىڭ ساياسي كەڭەسى كەزەكتەن تىس پرەزيدەنت سايلاۋىندا پرەزيدەنتتىككە كانديدات رەتىندە پارتيانىڭ اتىنان قازاقستان فەرمەرلەر قاۋىمداستىعىنىڭ باسقارما ءتوراعاسى دايرابايەۆ جيگۋلي مولداحالىق ۇلىنىڭ كانديداتۋراسىن سەز قاراۋىنا ۇسىنادى»، - دەدى ءالي بەكتايەۆ.

سەزگە قاتىسقان دەلەگاتتار جيگۋلي دايرابايەۆتىڭ كانديداتۋراسىن ءبىراۋىزدان ماقۇلداپ داۋىس بەردى.