ۇكىمەت پرەزيدەنت سايلاۋىنا قاجەتتى قاراجاتتى ءبولۋدى باستادى

استانا. قازاقپارات – ق ر قارجى ۆيتسە-ءمينيسترى ەرجان ءبىرجانوۆ كەزەكتەن تىس پرەزيدەنت سايلاۋىنا بولىنگەن قاراجات قايدا جۇمسالاتىنىن ءتۇسىندىردى، دەپ حابارلايدى قازاقپارات ءتىلشىسى.

«جالپى، سايلاۋدى وتكىزۋگە 20,5 ميلليارد تەڭگە كوزدەلگەن.

بۇل قاراجات قازىرگى ۋاقىتتا بەكىتىلدى. ۇكىمەت رەزەرۆىنەن قاراجات ءبولىنىپ جاتىر.

ونىڭ نەگىزگى بولىگى - 16,8 ميلليارد تەڭگەسى نەمەسە 80 پايىزدان استامى جالاقى تولەۋگە جۇمسالادى. جەرگىلىكتى جەرلەردە سايلاۋ ۋچاسكەلەرى قۇرىلادى، ولاردىڭ مۇشەلەرى بولادى. جانە دە جالاقىنىڭ مولشەرى ەڭ تومەنگى ءۇش ايلىق كولەمىنەن از بولماۋ ءتيىس. ول 180 مىڭ تەڭگەنى قۇرايدى. ياعني، بولىنگەن قاراجاتتىڭ باسىم بولىگى جالاقىعا جۇمسالادى»، - دەدى ۆيتسە-مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ب ا ق وكىلدەرىنىڭ ساۋالىنا وراي.

سونىمەن قاتار ول اتالعان قاراجات بيۋللەتەن شىعارۋعا، كولىك شىعىستارىن جابۋعا جۇمسالاتىنىن ايتتى.

«ءبارىن قوسقاندا 20,5 ميلليارد تەڭگە شىعادى. قاراجات نەگىزىنەن ورتالىق سايلاۋ كوميسسياسىنا بەرىلەدى. قاتەلەسپەسەم، ءبىر بولىگى سىرتقى ىستەر مينيسترلىگىنە باعىتتالادى»، - دەدى ەرجان ءبىرجانوۆ.