سايلاۋ ناۋقانى قالاي ۇيىمداستىرىلاتىنىن ايتۋ ازىرگە ەرتە - ماۋلەن اشىمبايەۆ

نۇر-سۇلتان. قازاقپارات - سايلاۋ ناۋقانىنا قاتىستى شەشىمدى مەملەكەت باسشىسى ءوزى قابىلدايدى. بۇل تۋرالى سەنات ءتوراعاسى ماۋلەن اشىمبايەۆ ءمالىم ەتتى، دەپ حابارلايدى قازاقپارات ءتىلشىسى.

«2019-جىلى قاسىم-جومارت كەمەل ۇلىنىڭ سايلاۋ الدىنداعى شتابىن باسقارعان ەدىم. ول كەزدە Nur Otan پارتياسى ءتوراعاسىنىڭ ءبىرىنشى ورىنباسارى قىزمەتىندە بولدىم. قازىر بۇل پارتيا AMANAT دەپ اتالادى. سول كەزدە پارتيا پرەزيدەنتتىككە قاسىم-جومارت توقايەۆتى كانديدات رەتىندە ۇسىندى»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.

ونىڭ سوزىنە قاراعاندا، وسى جولى سايلاۋ ناۋقانى قالاي ۇيىمداستىرىلاتىنىن ايتۋ ازىرگە ەرتە.

«بارلىق شەشىمدى مەملەكەت باسشىسى ءوزى قابىلدايدى. پرەزيدەنتتىك سايلاۋدىڭ رەسمي مالىمدەمەسى جاريالانبادى. بىزدە مەرزىم مەن كۇنتىزبەلىك جوسپار دا جوق. سوندىقتان قازىر قانداي دا ءبىر جورمالدى ايتۋعا ەرتە دەپ ويلايمىن. جالپى، بۇل جاعدايعا قاتىستى مەملەكەت باسشىسى ءوزى شەشىم جاسايدى»، - دەدى سەنات ءتوراعاسى.

بۇدان بۇرىن حابارلانعانداي، سەنات ءتوراعاسى الداعى سايلاۋدا پارلامەنتكە، ۇكىمەتكە جاڭا ادامداردىڭ كەلۋىنە مۇمكىندىك بولاتىنىن ايتتى.

ونىڭ پايىمىنشا، 7 جىلدىق پرەزيدەنتتىك ماندات سايلاۋ الدىنداعى باعدارلامانى جۇزەگە اسىرۋعا، حالىققا بەرگەن ۋادەنى ورىنداۋعا جەتكىلىكتى.