اباي وبلىسىندا جاڭادان قۇرىلعان اۋداننىڭ اكىمى تاعايىندالدى

سەمەي. قازاقپارات - اباي وبلىسىندا جاڭادان قۇرىلعان اقسۋات اۋدانىنىڭ اكىمى بولىپ اسحات سمايلوۆ تاعايىندالدى، دەپ حابارلايدى قازاقپارات ءتىلشىسى.

اسحات سايداحمەت ۇلى 1968 -جىلى 1-ناۋرىزدا سەمەي وبلىسى اقسۋات اۋدانى قىزىل كەسىك اۋىلىندا دۇنيەگە كەلگەن. 1991 -جىلى قاراعاندى مەملەكەتتىك ۋنيۆەرسيتەتىن «ەكونوميست» ماماندىعى بويىنشا ءبىتىردى.

ەڭبەك جولىن 1994 -جىلى اقسۋات اۋداندىق قارجى ءبولىمىنىڭ كىرىستەر ءتۇسۋىن بولجاۋ جانە ەكونوميكالىق تالداۋ ءبولىمىنىڭ اعا ەكونوميسى بولىپ باستاعان. كەيىن تارباعاتاي اۋداندىق قارجى ءبولىمى مەڭگەرۋشىسىنىڭ ورىنباسارى، بيۋدجەت ءبولىمىنىڭ باسشىسى قىزمەتتەرىن اتقاردى. 2002-2005 -جىلدار ارالىعىندا تارباعاتاي اۋداندىق ەكونوميكا ءبولىمىن، كەيىن اۋدان اكىمى اپپاراتىنىڭ قارجى- شارۋاشىلىق ءبولىمىن باسقارعان.

ەكى جىل تارباعاتاي اۋداندىق ەكونوميكا جانە بيۋدجەتتىك جوسپارلاۋ ءبولىمىنىڭ باسشىسى لاۋازىمىندا قىزمەت ەتتى.

2009-2010 -جىلدارى تارباعاتاي اۋدانى اكىمى اپپاراتىنىڭ باسشىسى بولدى. 2010-2018 -جىلدارى ارالىعىندا تارباعاتاي اۋدانى اكىمىنىڭ ورىنباسارى، 2018-2020 -جىلدارى كوكپەكتى اۋدانىنىڭ اكىمى لاۋازىمىن اتقاردى. وسى ۋاقىتقا دەيىن تارباعاتاي اۋدانىنىڭ اكىمى بولىپ ەڭبەك ەتتى.