ۇلتتىق قوردان الىنعان قاراجات تۇسكەن كىرىستەن اسىپ كەتتى - ەسەپ كوميتەتى

نۇر- سۇلتان. قازاقپارات - بىلتىر ۇلتتىق قوردان الىنعان قاراجات تۇسكەن كىرىستەن اسىپ كەتكەن. رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى ناتاليا گودۋنوۆا پارلامەنتتىڭ بىرلەسكەن وتىرىسىندا مۇنداي تەندەنتسياعا الاڭداۋشىلىق ءبىلدىردى، دەپ حابارلايدى قازاقپارات ءتىلشىسى.

«2015 -جىلدان بەرى ۇلتتىق قوردى بەلسەندى پايدالانىپ كەلەمىز. 2019-2020 -جىل تۋرالى ايتىپ وتىرعان جوقپىز. شىنىمەن دە پاندەميامەن بايلانىستى داعدارىسقا قارسى شارالارعا قارجى قاجەت بولدى. ءبىراق 2021 -جىلى جالپى احۋال ايتارلىقتاي جاقساردى»، - دەگەن كوميتەت باسشىسى بىلتىر بيۋدجەت تە پاندەميا كەزىندەگى ينەرتسيامەن جوسپارلاعانىن اتاپ ءوتتى.

«مەملەكەت باسشىسىنىڭ رەسپۋبليكالىق بيۋدجەت ۇلتتىق قوردىڭ قاراجاتىنا ارقا سۇيەمەۋى كەرەكتىگى تۋرالى تاپسىرماسىنا قاراماستان، 2021 -جىلى 4,5 تريلليون تەڭگە جۇمسالدى. ال بۇل كەزەڭدە ۇلتتىق قورعا 4,3 تريلليون تەڭگە عانا كىرىس تۇسكەن»، - دەدى ناتاليا گودۋنوۆا.

ەسەپ كوميتەتىنىڭ ءتوراعاسى ۇلتتىق جوبالار اياسىندا سالىناتىن نىسانداردىڭ ءار شارشى مەترىنە شىعىن ليميتىن بەكىتۋدى ۇسىندى.

«2021 -جىلى مەملەكەتتىك جوسپارلاۋ جۇيەسىنىڭ وزگەرۋىمەن ەستە قالدى - مەملەكەتتىك باعدارلامالاردان ۇلتتىق جوبالارعا كوشتىك. بىلتىرعى كۇزدەن باستاپ ۇكىمەت 10 ۇلتتىق جوبانى ىسكە اسىرۋعا كىرىستى. ونىڭ بارىندە بيۋدجەتتىك قارجىلاندىرۋعا باسىمدىق بەرىلگەن بولاتىن. وكىنىشكە قاراي، ول جوسپار ورىندالمادى. جوبالاردىڭ 43 پايىزى جەتكىلىكتى قارجىلاندىرىلعان جوق. ال ەڭ نەگىزگى ماسەلەلەردى ءتيىمدى شەشۋ ءۇشىن تولىق كولەمدە قارجىلاندىرۋ قاجەت. سوندىقتان ۇلتتىق جوبالاردى تۇزەتىپ، قارجىلىق مۇمكىندىكتەرگە سايكەستەندىرۋ كەرەك. بىلۋىمىزشە، ۇكىمەت بۇل جۇمىستى باستاپ تا كەتتى»، - دەدى ناتاليا گودۋنوۆا پارلامەنتتىڭ بىرلەسكەن وتىرىسىندا.

سوندا- اق ول ۇلتتىق جوبالاردىڭ يگىلىگىن حالىققا قالاي جىلدام جەتكىزۋگە بولاتىنىن اتادى. «ۇلتتىق جوبالار ىسكە اسۋى مۇمكىندىگىنشە قىسقا مەرزىمگە مەجەلەنۋى كەرەك. سوندا عانا وندا قاراستىرىلعان شارالار بيزنەس پەن حالىققا جىلدام جەتەدى. تيپتىك شەشىمدەردەن بولەك، بۇكىل ەل اۋماعىندا ايماقتارعا بايلانىستى الەۋمەتتىك جانە اكىمشىلىك نىسانداردىڭ 1 شارشى مەترىن سالۋعا كەتەتىن شىعىننىڭ ليميتىن بەكىتۋ قاجەت. بۇل بولىنگەن اقشاعا كوبىرەك نىسان سالۋعا مۇمكىندىك بەرەدى»، - دەدى ەسەپ كوميتەتىتىڭ باسشىسى.

اۆتور: ەسىمجان ناقتىباي