قىتايمەن اراداعى تاۋار اينالىمى بويىنشا ستاتيستيكالىق دەرەكتەردىڭ الشاقتىعى تومەندەدى

نۇر- سۇلتان. قازاقپارات - بىلتىر قىتايمەن اراداعى تاۋار اينالىمى بويىنشا ستاتيستيكالىق دەرەكتەردىڭ الشاقتىعى تومەندەدى.

بۇل تۋرالى ءماجىلىستىڭ جالپى وتىرىسىندا 2021 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتى قاراۋ كەزىندە ق ر پرەمەر- ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.

«قىتاي حالىق رەسپۋبليكاسىنىڭ ەكسپورتى - قازاقستان رەسپۋبليكاسىنىڭ يمپورتى باعىتى بويىنشا ستاتيستيكالىق دەرەكتەردەگى الشاقتىق 40,5 پايىزعا دەيىن تومەندەدى (2019 -جىلى - % 47، 2020 -جىلى - % 45,5) «، - دەدى ە. جاماۋبايەۆ.

ونىڭ ايتۋىنشا، سوڭعى 3 جىلدا سالىق سالاسىندا ءارى كەدەندىك اكىمشىلەندىرۋدى سيفرلاندىرۋ بويىنشا ءىس- شارالاردان بيۋدجەتكە 2 تريلليون تەڭگەدەن استام قوسىمشا تۇسىمدەر قامتاماسىز ەتىلدى. وسى باعىتتاعى جۇمىستار جالعاساتىن بولادى.

بۇدان بۇرىن حابارلانعانداي، بىلتىر الەۋمەتتىك شىعىستار 910 ميلليارد تەڭگەگە ۇلعايدى. سونىمەن قاتار ەرۇلان جاماۋبايەۆ بىلتىرعى بيۋدجەت كىرىستەرىنە قاتىستى تۇسىنىك بەردى.

ە. جامۋبايەۆ رەسپۋبليكالىق بيۋدجەتتىڭ اتقارىلۋى كورسەتكىشتەرىنە توقتالا كەلە: «تۇسىمدەر 100,8 پايىزعا اتقارىلىپ، 12,7 تريلليون تەڭگەنى قۇرادى. شىعىستار 99,2 پايىزعا يگەرىلدى جانە 15,2 تريلليون تەڭگەنى قۇرادى. الەۋمەتتىك شىعىستار 2020 -جىلمەن سالىستىرعاندا 910 ميلليارد تەڭگەگە ۇلعايىپ، 7,5 تريلليون تەڭگەنى قۇرادى. بۇل رەسپۋبليكالىق بيۋدجەتتىڭ جالپى كولەمىنىڭ 50 پايىزىن قامتىدى»، - دەدى ول.

اۆتور: رۋسلان عابباسوۆ