اباي وبلىسىنىڭ ورتالىعى بولاتىن سەمەيدىڭ ينفراقۇرىلىمى جاقسارادى - قالا اكىمى

سەمەي. قازاقپارات - سەمەي قالاسىنىڭ اكىمى باقىتجان باياحمەتوۆ ساناۋلى كۇندەردەن كەيىن قۇرىلاتىن اباي وبلىسىنىڭ ورتالىعى بولاتىن شاھاردىڭ ينفراقۇرىلىمى جاقسارا تۇسەتىنىن ايتتى.

العاشقى كەزەكتەگى ماسەلەنىڭ ءبىرى - جول جوندەۋ جۇمىستارى، دەپ حابارلايدى قازاقپارات ءتىلشىسى.

قالا اكىمدىگىنىڭ مالىمەتىنە سۇيەنسەك، بۇگىندە سەمەيدە جول جوندەۋ جۇمىستارى قارقىندى جۇرگىزىلىپ جاتىر. بيىل 60-تان استام كوشە جولى ورتاشا جوندەۋدەن وتەدى دەپ جوسپارلانعان.

«پرەزيدەنت قاسىم-جومارت توقايەۆتىڭ شەشىمىمەن اباي وبلىسىنىڭ قۇرىلاتىندىعى بەلگىلى. بۇل قالا ينفراقۇرىلىمىنىڭ جاقسارا تۇسۋىنە جول اشادى. ونىڭ ىشىندە جولداردىڭ ساپاسىن ارتتىرۋ - باستى ماقساتتاردىڭ ءبىرى. ساتبايەۆ كوشەسى - سەمەيدەگى نەگىزگى كوشەلەردىڭ ءبىرى. بۇل ۇزىن كوشە بىرنەشە اۋداندى بىرىكتىرەدى. ساتبايەۆ كوشەسى ارقىلى «ومبى- مايقاپشاعاي» تاسجولىمەن بىزگە كورشىلەس ەلدەردەن كەلۋشىلەر كوپ. 25 مامىردان باستاپ مەردىگەر ۇيىم وسى جانە 2-زاگورودنيايا كوشەسىنەن ومبى- مايقاپشاعاي تاسجولىنا دەيىنگى ارالىقتا جوندەۋ جۇمىستارىن باستادى»، - دەدى باقىتجان باياحمەتوۆ.

ايتۋىنشا، بۇل جۇمىستارعا 45 ادام مەن 20 تەحنيكا جۇمىلدىرىلعان. بارلىق جۇمىستار وسى جىلدىڭ ماۋسىم ايىنىڭ سوڭىندا اياقتالادى دەپ جوسپارلانعان.

ەسكە سالساق، ۇكىمەت اباي، جەتىسۋ جانە ۇلىتاۋ وبلىستارىن قۇرۋ جونىندەگى ءىس- شارالار جوسپارىن بەكىتتى.

اۆتور: تالعاتجان مۇحامەتبەك ۇلى