گرۋزيادا قازاق ۇلتتىق تاعامدارىن ۇسىناتىن مەيرامحانا اشىلدى
گرۋزيادا تۇراتىن قازاقستان ازاماتتارى بۇل جاڭالىقتى قۋانا قابىلداپ، الەۋمەتتىك جەلىلەردە ءبولىسىپ جاتىر.
ولار بۇل مەكەن جىراقتا جۇرگەن جەرلەستەر باس قوساتىن ورىنعا اينالدى دەپ جازۋدا.
تبيليسيدە كوپتەگەن ۇلت پەن ءدىن وكىلدەرى تۇرادى. وتانىنان الىستا بولعاندىقتان، ۇلتتىق تاعامدارىنىڭ ءدامىن ساعىناتىنى تۇسىنىكتى.
قالادا يتاليالىق، ۋكراينالىق جانە وزبەك ءدامحانالارى بار. ال جاقىندا قازاق مەيرامحاناسى دا اشىلدى. ايتا كەتەر ءبىر جايت، وندا اسپازشى بولىپ گرۋزين ايەلى جۇمىسى ىستەيدى.
«ءتۇرلى ءدامحانالاردا ىستەدىم، ليۆاندىق، ۋكراينالىق، گرۋزيالىق. قازاق مەيرامحاناسى اشىلاتىنىن ەستىپ، وسىندا جۇمىسقا ورنالاسۋعا كەلدىم. جاڭا تاعامداردى تانىپ ءبىلۋدى ۇناتامىن. وسىندا مەنى قازاق اسپازشى ۇيرەتتى. بۇل گرۋزيا تاعامدارىنان ەرەكشە: قوي مەن جىلقى ەتى، جالپى كوپ مولشەردە ەت پەن پياز سالادى. ماعان ۇنايدى»، - دەيدى اسپازشى نينو كۋركۋنۋلي.
مەيرامحانانى قازاقستاننان كەلگەن ءۇش جاس ادام اشتى. ۇلتتىق تاعامدارىنىڭ ءدامىن ساعىنعاندىقتان، وسىنداي قادامعا بارعانىن ايتادى. گرۋزيادا كەزدەسپەيتىن ءونىمدى، مىسالى جىلقى ەتى قازاقستاننان اكەلىنەدى.
«بۇل ءدامحانانى ەڭ الدىمەن گرۋزيادا تۇراتىن قازاقتار ءۇشىن اشتىق. ولاردان باسقا جاڭا تاعامدارعا قىزىققان جەرگىلىكتى تۇرعىندار كوپتەپ كەلەدى. ولارعا قازاقشا ەت پەن باۋىرساقتار وتە ۇنايدى. مانتىنى وزدەرىنىڭ ۇلتتىق تاعامى - حينكاليمەن سالىستىرادى. اشىلعانىنا ەكى-اق اي وتسە دە، مەيرامحانا تابىستى جۇمىس ىستەپ كەلەدى»، - دەيدى قازاق مەيرامحاناسىنىڭ يەسى ەركەش بايمۇحامبەت.