كۆانتتىق وقۋ: قىتاي بالالارى «ءۇشىنشى كوزگە» جاتتىعىپ ءجۇر

نۇر-سۇلتان. قازاقپارات - ينتەرنەتتە ميلليونداعان عالامتور پايدالانۋشىسىنىڭ جاعاسىن ۇستاتقان ۆيدەو شارلاپ كەتتى.

مەكتەپ قابىرعاسىنداعى وقۋشىلار كوزدەرىن تاڭىپ الىپ، كىتاپ وقيدى. مۇنى وزدەرى «كۆانتتىق وقۋ» دەپ اتايدى. كۆانتتىق وقۋ دەگەنىمىز نە؟

جالعان عىلىم با الدە ادام مۇمكىندىگىن دامىتۋ ءتۇرى مە؟ كىتاپتا جازىلعانداردى تاڭۋلى كوزبەن پاراقتاي وتىرىپ، ونىڭ مازمۇنىن يگەرە الا ما؟ بۇگىندە كۆانتتىق وقۋ تەحنولوگياسىنا بەيىمدەلۋ قىتايدا تانىمال تاسىلگە اينالعان.

ولاردىڭ ايتۋىنشا، كۆانتتىق-تولقىندى وقۋدىڭ (Quantum Speed ​​Reading, QSR) بولاشاعى زور. Quantum Speed ​​Reading ءادىسى ءاۋ باستا جاپونيادا پايدا بولعان. سوڭعى بىرنەشە جىلدارى اتالمىش ءتاسىلدى تەك بالالار عانا ەمەس، سونىمەن قاتار، ەرەسەكتەر دە پايدالانادى.

سونىمەن، QSR ادەتتەگى وقۋدان قالاي ايرىقشالانادى؟

بۇل ساۋالعا جاۋاپتى QSR دى قولدانىپ جۇرگەندەردىڭ ءوز اۋزىنان بىلەيىك: بۇل ءتاسىل ءبىلىمدى شاپشاڭ يگەرۋگە كومەكتەسەدى-مىس. سونداي-اق، جادىنى نىعايتۋعا، سترەستەن ارىلۋعا، جاعىمدى ويلاۋعا سەپتەسەدى.

QSR-تى ويلاپ تاپقان يۋميكو توبيتاني ەسىمدى ماكوتا شيچيدى بالالار اكادەمياسىنىڭ وقىتۋشىسى، ءتىپتى، وسى باعىتتا ارنايى كىتاپ جازعان ەكەن. وندا اۆتور اتالمىش ءادىستىڭ پايدا بولۋ تاريحىن، ونى تاجىريبەدە قولدانۋ ءتاسىلىن بايانداعان.

اۆتوردىڭ ۋاجىنە قاراعاندا، ادام QSR كومەگىمەن كەز كەلگەن تىلدە جازىلعان كىتاپتى وقي الادى. بۇلاي وقۋ ءاربىر سويلەمدى، ءسوزدى ەجىكتەپ وقۋدى ۇيعارمايدى، كەرىسىنشە، تۇتاس، سينتەتيكالىق تۇرعىدان وقيدى. ولاردىڭ ايتۋىنشا، ءبىزدىڭ «كۆانتتىق كومپيۋتەر» - دومالاق بەز -  «ءۇشىنشى كوز» ىسكە قوسىلادى.

اتاقتى فيلوسوف دەكارت اتالمىش اعزانى «جاننىڭ قۇيىمشاعى» دەپ اتاپ كەتكەن. دومالاق بەزدە قۇم توزاڭىنا ۇقساس ۇساق تۇيىرشىكتەر بولادى. بۇل اعزا وسى زامانعى عىلىمعا بەيمالىم دەسە دە بولادى. كۆانتتىق وقۋ ادىستەمەسى «ءۇشىنشى كوزدى» دامىتۋعا باعىتتالعان.

وسى ءۇشىن ارنايى جاتتىعۋلار مەن ترەنينگتەر ازىرلەنگەن. بەينەلەر مەن تۇستەر بىىردەن ساناعا تاپ بولادى. بىلايشا ايتقاندا، كوزسىز كورۋگە نەگىزدەلگەن.

islam.kz