ستوكگولمدە ەۋروپا قازاقتارىنىڭ بيزنەس- فورۋمى ءوتتى
21- قازان كۇنى ستوكگولمدە شۆەتسيا، دانيا، نورۆەگيا جانە فينليانديادا تۇراتىن وتانداستاردىڭ بيزنەس- فورۋمى بولدى. فورۋم - قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ باستاماسىمەن بەكىتىلگەن «وتانداستار قورى» ك ە ا ق جانە دۇنيەجۇزى قازاقتارى قاۋىمداستىعىنىڭ سولتۇستىك ەۋروپادا تۇراتىن قازاقتارمەن بايلانىستى نىعايتۋ باعدارلاماسىنىڭ ءبىر بولىگى.
وعان قازاق دياسپورالارىنىڭ ليدەرلەرى، بەلسەندىلەرى، قازاقستاننىڭ شۆەتسياداعى ەلشىسى قايرات ءابدىراحمانوۆ، دۇنيەجۇزى قازاقتارى قاۋىمداستىعى ءتوراعاسىنىڭ ورىنباسارى ارعىن وسپانوۆ، «وتانداستار قورىنىڭ» جاۋاپتى قىزمەتكەرلەرى، شۆەتسيانىڭ قازاقستانداعى تۇڭعىش ەلشىسى ماننە ۆەنگبورگ، قازاقستاننىڭ دانيا، فينليانديا جانە شۆەتسياداعى قۇرمەتتى كونسۋلدارى، سولتۇستىك ەۋروپا ەلدەرىندەگى كومپانيالاردا جۇمىس ىستەيتىن قازاقتار، تۇركىستان، قاراعاندى وبلىستارىنىڭ ءجۇن وڭدەۋ، اۋىل شارۋاشىلى، اگروتۋريزم سياقتى سالالارداعى بيزنەسمەندەرى قاتىستى.
قاۋىمداستىق پەن قور وكىلدەرى بۇكىل الەمدە «قازاق ءۇيى» قازاق مادەني-ىسكەرلىك ءۇيىنىڭ قۇرامىنا كىرەتىن مادەني ورتالىقتار مەن ىسكەرلىك ۇيلەرىنىڭ جەلىسىن قۇرۋ جوسپارلارىن ءبولىستى.
بيزنەس-فورۋمعا قاتىسۋشىلار شاعىن، ورتا جانە ءىرى بيزنەستەگى باستامالاردى ىنتالاندىرۋ، ءوزارا ىقپالداستىق تەتىكتەرى، ستارتاپتاردى دامىتۋ ماسەلەلەرىن تالقىلادى. قاتىسۋشىلارعا قازاقستان وڭىرلەرىندە بيزنەس اشىپ، دامىتۋعا قولايلى ينۆەستيتسيالىق الەۋەت تانىستىرىلدى. كەزدەسۋدە قالپىنا كەلەتىن ەنەرگيا، اقپارات تەحنولوگيالارى، قۇرىلىس ماتەريالدارى، شيكىزات وڭدەۋ، مۇناي حيمياسى، تاۋ-كەن ونەركاسىبى، كولىك جانە لوگيستيكا، اۋىل شارۋاشىلىعى، ءبىلىم-عىلىم، سونىڭ ىشىندە تۇركولوگيا، تۋريزم سالالارىنداعى وزەكتى جوبالار ايقىندالدى.
سونىمەن قاتار قور وكىلدەرى بارشا قازاق دياسپوراسىمەن تىعىز بايلانىس ورناتۋعا ءازىر ەكەنىن ءبىلدىردى. ول ءۇشىن وتانداستار ماسەلەلەرىنە جاۋاپ بەرەتىن ءبىرىڭعاي بايلانىس ورتالىعى اشىلعان. شۆەتسياداعى بيزنەس- فورۋم بيىل وتكىزىلگەن التىنشى فورۋم بولدى. بۇعان دەيىنگىسى 20- قىركۇيەكتە لوندوندا وتكەن.
شارادا قازاقستان جاستار قاۋىمداستىعىنىڭ ءتوراعاسى ايدانا بەكبەرگەن كوپتىڭ كوزىنشە ەلەكتروندىق فورماتتاعى ۋاقىت كاپسۋلاسىن بەكىتتى. جاس وتانداستارعا ۇندەۋ جولدانعان كاپسۋلا 2025-جىلى اشىلادى.
قازاقستان دەلەگاتسياسى قۇرامىندا بارعان كاسىپكەرلەردىڭ ۇسىنىستارى دا قاتىسۋشىلاردى قىزىقتىردى. «شىمكەنت كاشەمير» جۇن وڭدەۋ فابريكاسىنىڭ باسشىسى شاعانبەك قانجارباي ۇلى ءونىمىن سكانديناۆ ەلدەرىنە ساتۋ نيەتىن ءبىلدىردى. «Toksumak» ەكو- اگرو-كەنتىنىڭ اۆتورى ولجاس وماروۆ تۇرعىنداردىڭ الەۋمەتتىك ءال-اۋقاتىن نىعايتاتىن ءارى ەتنيكالىق قازاقتاردى قازاقستانعا تارتۋعا مۇمكىندىك بەرەتىن جوبالاردى دامىتۋعا ينۆەستيتسيا تارتۋ تۋرالى ۇسىنىستارىن ايتتى.