بەكبولات تىلەۋحان ءبىلىم مينيسترىنە: ورتا بىلىمدەگى پروبلەمالاردى شەشسەڭ، حاتشىڭ بولۋعا دايىنمىن

نۇر- سۇلتان. قازاقپارات - ورتا ءبىلىم سالاسىنداعى پروبلەمالار شەشىلسە، ءبىلىم ءمينيسترىنىڭ كومەكشىسى بولۋعا دايىنمىن. پارلامەنت ماجىلىسىندەگى ءبىلىم ماسەلەسىنە ارنالعان ۇكىمەت ساعاتىندا دەپۋتات بەكبولات تىلەۋحان وسىلاي ءماىم ەتتى،

 دەپ حابارلايدى قازاقپارات ءتىلشىسى.

«ءبىلىم سالاسىنان، ونىڭ ىشىندە ورتا بىلىمنەن ماڭىزدى ماسەلەنى كورىپ تۇرعانىم جوق. جاسىراتىنى جوق ورتا بىلىمدەگى سوراقىلىق، وقۋلىق ماسەلەسى قوعامنىڭ تيتىعىنا ءتيىپ ءبىتتى. بالا تۇگىلى اتا- اناسى تۇسىنبەيتىن تاقىرىپ، شەشىلمەيتىن ەسەپ قوعام تاراپىنان قانداي سىنعا ۇشىراسا دا ءمىز باققان جۇيە جوق. مازاق پا، ەنجارلىق پا، ونى تۇسىنبەدىك. بىزدە كونستيتۋتسيا بويىنشا جالپى نەگىزى ءبىلىم الۋ اقىسىز، ءبىراق جاقسىلاپ وقىتۋ ءۇشىن رەپەتيتور جالداۋعا ءماجبۇر بولامىز»، - دەدى بەكبولات تىلەۋحان.

سونىمەن قاتار دەپۋتات سالادا بىلىكتى مامان دايارلاۋ پروبلەمالارىنا دا توقتالدى.

«بۇگىنگى ءبىلىم جۇيەسىن قاراپ وتىرساق، قۇردىمعا بەتتەپ بارا جاتىر. قاي جاعىنان كەلسەك تە، سىن كوتەرمەيدى. سوندىقتان جۇيەنى تۇبەگەيلى قايتا قاراۋ كەرەك. وقۋلىق شىعارۋ جۇيەسىن، مۇعالىمدەر دايارلاۋدى قايتا قاراعان ءجون. اسحات، جاقسى جىگىتسىڭ، ازاماتسىڭ. ەندى وسى ماسەلەلەرگە قاجىر- قايراتپەن كىرىسەيىكشى. تاپ وسى ماسەلە شەشىلەتىن بولسا، دەپۋتاتتىق مانداتىمدى بەرىپ، كومەكشى ءارى حاتشى بولىپ بارۋعا دايىنمىن»، - دەدى ب. تىلەۋحان ق ر  ءبىلىم جانە عىلىم ءمينيسترى اسحات ايماعامبەتوۆكە قاراتا ايتقان سوزىندە.

اۆتور: رۋسلان عابباسوۆ